Diit 31 - RUAC KUƆTH IN RƐL RƆ

Pal kɛ kui̱ ŋäthä Kuɔth

(Dit Dee-bid)

¹ Bä rɔ lua̱k ji̱ lö Kuoth Nhial, cu ɣä jak kä po̱c, kän ɣä kɛ ɣöö ɛ ji̱n gua̱n cuŋni!

² Gäŋni ji̱thdu ɣä, kä kän ɣä kɛ pɛ̈th! Jak ni rɔ kä päm lua̱kdä, jak ni rɔ kä ko̱t mi gaŋ ɣä!

³ Ɛ ji̱n pämdä kä gääŋdä, kä kɛ kui̱ cio̱tädu bo̱th ɣä,

⁴ kä lony ɣä kä cambak in dɛ̈pkɛ ni ɣä, kɛ ɣöö ɛ ji̱n gääŋdä.

⁵ Cä tëkdä la̱th tetniku, kän ɣä lö Kuoth Nhial, Kuoth in thuɔ̱k.

⁶ Ɣän lökä nɛy tin palkɛ kuth baaŋ, duundɛ ɣöö ŋa̱a̱thä ni Kuoth Nhial.

⁷ Bi lɔcdä tɛ̈ɛ̈th rɛy nho̱kädu min thil pek, kɛ ɣöö ci cuɔ̱cdä nɛn kä ŋäci rikä,

⁸ kä /keni ɣä ka̱m ji̱ tɛ̈r, ci la̱th ni ɣä guäth känä.

⁹ A lɔcdu kɔ̱c kɛ ɣä lö Kuoth Nhial, kɛ ɣöö ɣän ta̱a̱ rikä, ci wäŋkä bɛ̈c kɛ wiee, kä ci puɔ̱nydä kɛnɛ ti̱eydä cuuc.

¹⁰ Ci ni̱n teekädä thuɔ̱k ni cucä, kä ci run teekädä thuɔ̱k kɛ lul, ci buɔ̱mdä thuuk kɛ ɣöö ta̱a̱kɛ rik, a ci cɔ̱wkä kɔ̱a̱c ɛ they.

¹¹ A ci ɣän cua̱ cäät kä ji̱ tɛ̈rä diaal, kä ɛ ɣän mi jiääk kä ji̱ thieekädä, kä dual mäthnikä kɛ ɣä, kä bar nɛy tin ro̱m kɛ ɣä duɔ̱pni rɔ̱ kɛ ɣä.

¹² Ca ɣä cu pa̱l ruëëc ce̱tkɛ ram mi ci li̱w, cä cu ce̱tnikɛ dhaar mi ci tiath.

¹³ Kä ɣän liɛŋä ruac nɛɛni ti nyin ŋuan, ci rik ɣä go̱l kui̱cni diaal! Lät kɛn ni ca̱a̱p ti jiäk kɛ kui̱dä, go̱o̱r kɛn ni ɣöö ba ɣä näk.

¹⁴ Kä ɣän ŋa̱a̱thä ni ji̱, lö Kuoth Nhial, kä cä wee i̱, “Ɛ ji̱n Kuothdä.”

¹⁵ Kä tëkdä tëë tetkädu, kän ɣä tetni ji̱ tɛ̈rä kɛnɛ nɛy tin juɔckɛ ɣä!

¹⁶ Nyuthni ja̱ŋdu gɔɔydu, kän ɣä kɛ nhökdu min thil pek!

¹⁷ /Cu ɣä jak kä po̱c, lö Kuoth Nhial, kɛ ɣöö ɣän cɔalä ni ji̱, a po̱c ni ji̱ nyuɔɔni akɛ wä ni jɔɔkni bitdä.

¹⁸ A lëëp ka̱a̱cnikiɛn bit, tin la ruac ɛ liakɛ rɔ̱ kɛ nɛy tin tekɛ cuŋ.

¹⁹ Kä ku gɔyku lɛ ŋuan i̱di tin ci lät kä nɛy tin luɔ̱thkɛ ji̱, tin ci la̱t ni nhiam nath kɛ kui̱ nɛɛni tin lua̱kɛ rɔ̱ ji̱!

²⁰ Kä la kɛ a kumi kɛ ta̱a̱du kɛɛl kɛ kɛ kä ca̱a̱p nath ti jiäk, guäth cieŋädu gaŋikɛ kä rieet ti jiäk.

²¹ A liak tekɛ Kuoth Nhial, kɛ ɣöö cɛ ɣä nyuɔ̱th nhökdɛ min gääy naath kä thil pek mëë ca ɣä göl wi̱c.

²² Kä cua̱ ruac kɛ jɔw mi di̱i̱t i̱, “Ca ɣä ŋuɔk jɔ̱ɔ̱r nhiamdu.” Duundɛ ɣöö ci ruacdä liŋ, mëë cä ji̱ thiec kɛ luäk.

²³ Nhɔakɛ Kuoth Nhial, yɛn nɛɛkɛ diaal! La päl Kuoth Nhial ji̱ ŋäthä ikä kä bɛ nɛy tin la̱a̱t jiäkni culikä.

²⁴ Cuɔmɛ rɔ̱, kä a lo̱ckun bum, yɛn nɛy diaal tin ŋa̱thkɛ ni Kuoth Nhial!