Diit 29 - RUAC KUƆTH IN RƐL RƆ

Pal kɛ kui̱ lua̱k.

(Dit Dee-bid)

¹ Liakɛ Kuoth Nhial yɛn ja̱a̱k Nhial diaal, liakɛ Kuoth Nhial kɛ kui̱ bumädɛ kɛnɛ wuɔ̱tdɛ.

² Liakɛ Kuoth Nhial kɛ buɔ̱m cio̱tädɛ. Palɛ Kuoth Nhial kɛ ɣöö rɛl gɔɔydɛ rɔ̱.

³ Cua jɔw Kuɔth Nhial liŋ wi̱i̱ pi̱i̱ni, Kuoth in buɔy ma̱a̱rɛ, ce̱tnikɛ nhial, ɛn Kuoth Nhial ma̱a̱rɛ wi̱i̱ pi̱i̱ni ti ŋuan.

⁴ Kä jɔw Kuɔth Nhial bumɛ ɛlɔ̱ŋ jɔw Kuɔth Nhial thiɛkɛ li̱ŋ.

⁵ Jɔw Kuɔth Nhial la to̱lɛ thep Kuoth Nhial to̱lɛ thep rööl Lɛ-ba-nɔn.

⁶ Kä jakɛ Lɛ-ba-nɔn kä tuɔ̱k ce̱tnikɛ kɔ̱a̱l, kä jakɛ Thir-yon kä wur ce̱tnikɛ dɔw mök.

⁷ Kä jɔw Kuɔth Nhial no̱o̱ŋɛ bo̱l maac.

⁸ Kä jɔw Kuɔth Nhial lathɛ därdɔaar, Kuoth Nhial lathɛ därdɔaar Ka-dɛc.

⁹ Kä jɔw Kuoth Nhial yɔ̱kɛ jiɛn gilä, kä tɛŋɛ ji̱th thepni piny. Kä rɔal nɛy diaal tin te luaakdɛ i̱, “Liak akɛ Kuoth!”

¹⁰ Kä Kuoth Nhial tëë nyuurä wi̱c kɔamdɛ wi̱i̱ pi̱i̱ni, Kuoth Nhial cɛ nyuur ala kuäär mi do̱raar.

¹¹ A Kuoth Nhial moc nɛɛkɛ kɛ buɔ̱m! Kä ɛ Kuoth Nhial poth nɛɛkɛ kɛ mal!