Diit 28 - RUAC KUƆTH IN RƐL RƆ

Pal kɛ lär tɛthä lɔaac.

(Dit Dee-bid)

¹ Cɔalä ni ji̱ lö Kuoth Nhial gääŋdä /cu ɣä ɣɔ̱th, kɛ ɣöö mi wi̱i̱ wä biɛt kä cɔalä ji̱ ɣän bä ce̱tnikɛ nɛy tin ci wä jɔɔkni.

² Liŋ jɔw palädä min thiëëcä ji̱ mi cɔalä ji̱ kɛ kui̱ lua̱k, mi wa̱a̱ tetkä wä tar nhial lotdä luaakdu min rɛl gɔɔydɛ rɔ.

³ Cu ɣä bi naŋ kɛɛl kɛ ji̱ nyuɔɔni, kɛnɛ nɛy tin la la̱tkɛ jiäk, tin la latkɛ mal kɛ ji̱ thieekädiɛn, kä thiäŋ ni lo̱ckiɛn kɛ tiɛɛl.

⁴ Tɔ̱ŋkɛ kɛ kui̱ ciɛŋädiɛn in jiääk, kɛnɛ lät nyuɔɔni tin ca la̱t. Tɔ̱ŋkɛ kɛ kui̱ kä tin ca lat ɛ kɛn, kämnikɛ min ro̱ŋ kɛ lätkiɛn.

⁵ Kɛ ɣöö /kenkɛ lät Kuɔth Nhial luɔ̱th, tin cɛ la̱t kɛ tetkɛ, bɛ kɛ da̱k ni piny kä /cɛ kɛ bi nyɔk kɛ no̱o̱ŋ nhial.

⁶ A puɔ̱th tekɛ Kuoth Nhial, kɛ ɣöö cɛ jɔw palädä liŋ.

⁷ Kuoth Nhial ɛ buɔ̱mdä kä ɛ ko̱tdä, kä ŋa̱a̱thä ni jɛ kɛ lɔcdä. Inɔ cɛ ɣä luäk, kä tɛth lɔcdä, bä jɛ puany kɛ diitkä kɛ tɛ̈th lɔaac.

⁸ Kuoth Nhial ɛ buɔ̱m nɛɛnikɛ, kä jɛn ɛ gua̱th lua̱k kä nɛɛkɛ tin cɛ mɛk.

⁹ Kän nɛɛku, kä poth kɛ, ku la yieendiɛn, kä titkɛ amäni cäŋ kɛl.