Diit 27 - RUAC KUƆTH IN RƐL RƆ

Diit puɔnyä ŋäthä

(Dit Dee-bid)

¹ Kuoth ɛ buaydä kä ɛ käändä, ɛŋa mi bä dual kɛ jɛ? Kuoth Nhial ɛ gääŋ yieynikä, kuɛ la ŋa bä dual kɛ jɛ mɔ?

² Mi wä ji̱ nyuɔɔni ɣä wä mak, a görkɛ näkdä, kɛn ji̱ tɛ̈rä kɛnɛ löökä, bikɛ kɔa̱a̱th kɔ̱thikä kä bikɛ tëth.

³ A cäŋ ca ɣä go̱l ɛ ji̱ tɛ̈rä, /ci lɔcdä bi baath. A cäŋ ca ɣä ka̱p ko̱r, bä ŋot ta̱a̱ kɛ ŋa̱th.

⁴ Ɣän bä thiec ni kɛl kä Kuɔth Nhial, ɛ jɛn nɔmɔ bä thiec ɔ, ɛ ɣöö bä ciɛŋ ni luak Kuoth Nhial kɛ ni̱n teekädä diaal, kɛnɛ ɣöö bä gɔɔy Kuɔth Nhial guic, bä jɛ wä nɛn ni rɛy luaakdɛ.

⁵ Kɛ cäŋ rikä, bɛ ɣä tɛ̱̈ɛ̱̈ guäth ciɛŋädɛ, bɛ ɣä wä ga̱k rɛy duëëlɛ, kä bɛ ɣä wä la̱th ni wi̱i̱ pa̱a̱m.

⁶ Kä täämɛ bä wi̱cdä kap nhial kɛ ji̱ tɛ̈rä tin te gëëknikä, kä bä jɛ thöp muc rɛy luaakdɛ kɛ tɛ̈th lɔaac. Ɣän bä Kuoth Nhial puany kɛ dit kä bä jɛ pua̱t ni thom.

⁷ Liŋ ɣä lö Kuoth Nhial, mi wa̱a̱ ji̱ cɔl, te ni kɛ päl lɔaac piny kɛ ɣä, kä loc ɣä!

⁸ Kä cu lɔcdä ɣä jiök kɛ kui̱du i̱, “Wër palɛ.” Kä cua̱ pal ni ji̱n Kuoth Nhial.

⁹ /Cu nhiamdu tëë kä ɣä. /Cu ja̱ŋdu loc jɔk kɛ gak, ɛ ji̱n ɛ nëë la luäk ɣä. /Cu ɣä lo̱k kä /cu ɣä päl lö Kuoth käändä!

¹⁰ Cäŋ ci gua̱a̱r kɛnɛ maar ɣä päl, bi Kuoth Nhial ɣä käp.

¹¹ Ŋi̱i̱cni ɣä kɛ duɔ̱ɔ̱pdu, lö Kuoth Nhial, bo̱th ɣä kɛ duɔ̱ɔ̱p mi cuŋ kɛ ɣöö ta̱a̱ kɛ ji̱ tɛ̈r.

¹² /Cu ɣä käm ji̱ tɛ̈rä, kɛ ɣöö lat kɛn ni kac kɛ kui̱dä, kä lat kɛn ni ko̱r.

¹³ Kä ɣän ŋa̱a̱thä jɛ ɛn ɣöö bä tëk a bä gɔɔy Kuɔth Nhial nɛn rɛy teekä nɛmɛ!

¹⁴ Lip ni luäk Kuɔth Nhial, bum rɔ a lɔcdu /ci bath, lip ni luäk Kuɔth Nhial!