Diit 26 - RUAC KUƆTH IN RƐL RƆ

Pal kɛ kui̱ raam mi gɔaa

(Dit Dee-bid)

¹ Bër luk ɣä ɛ ji̱n, lö Kuoth Nhial, kɛ ɣöö la̱tdä ni cuɔ̱ɔ̱ŋ, kä ŋa̱a̱thä ni ji̱ kɛ lɔcdä kɛɛliw.

² Bër ɣɔ̱n ɣä, lö Kuoth Nhial, bër ɣɔ̱n lɔcdä kɛnɛ ca̱rä.

³ Kɛ ɣöö nhökdu min thil pek tëë nhiamdä, kä ja̱a̱lä ni duɔ̱ɔ̱pdu min thuɔ̱k.

⁴ /Ka̱n met te kɛɛl kɛ ji̱ nyuɔɔni, kä thilɛ ɣä mat kɛ ji̱ mɛɛtdä.

⁵ Ɣän lökä ja̱l kɛɛl kɛ ji̱ la̱a̱t jiäkni, kä /cä bi met nyuur kɛɛl kɛ ji̱ nyuɔɔni.

⁶ Ɣän bä te̱tkä lak kä bä nyoth ɛn ɣöö thilɛ ɣä ŋu, kä bä ben wi̱i̱ yi̱kädu lö Kuoth Nhial.

⁷ Kä bä ji̱ puany kɛ jɔw mi di̱i̱t, kä bä lätku diaal tin ga̱ykɛ naath lat.

⁸ Ɣän nhɔakä luak in cieŋi thi̱n, lö Kuoth Nhial, min la gua̱a̱th in te buɔ̱mdu thi̱n.

⁹ /Cu ɣä bi näk kɛɛl kɛ ji̱ dueeri kä cu yiëëdä bi naŋ kɛɛl kɛ nɛy tin la wuɔ̱thkɛ rim nath piny,

¹⁰ nɛy tin la̱tkɛ ni ti jiäk, nɛy tin thieŋ tetkiɛn kɛ tin ca kɔknikɛ.

¹¹ Duundɛ ɣöö ɣän, ta̱a̱ ni rɛy gɔɔyädä, kän ɣä, kä a lɔcdu kɔ̱c kɛ ɣä.

¹² La cuɔ̱ŋä ni guäth mi car car, bä Kuoth Nhial liak rɛy bunä min di̱i̱t.