Diit 25 - RUAC KUƆTH IN RƐL RƆ

Pal kɛ kui̱ ga̱ŋ kɛnɛ luäk

(Dit Dee-bid)

¹ Ɣän cä ti̱eydä ka̱m ji̱ lö Kuoth Nhial.

² Ɣän ŋa̱a̱thä ji̱ lö Kuothdä, luäk ɣä, a ɣä /ca bi moc pöc. Ɛ ji̱ tɛ̈rä /ca rɔ̱ bi liak kɛ ɣä.

³ Kä thilɛ ram mi ŋääth ji̱ mi la tekɛ pöc. Ka̱mkɛ pöc gua̱n jiäkni mi thil ŋa̱th.

⁴ Jakni ɣä kä ŋäc duɔ̱pku lö Kuoth Nhial, nyuthni ɣä duɔ̱pku.

⁵ Bo̱th ɣä rɛy thukä, kɛ ɣöö ɛ ji̱n Kuoth in la käändä. Kɛ ɣöö ŋa̱a̱thä ni ji̱ kä rɔa ni ciaŋ.

⁶ Tim kɔ̱a̱c lɔaacdu, kä tim nhökdu lö Kuoth Nhial, kɛ ɣöö tekɛ thi̱n ni wal.

⁷ /Cu dueer ŋuɛɛtädä kɛnɛ nyuɔɔnkä lɛ tim, ku tim ni ɣä rɛy nho̱kädu min thil pek, kɛ ɣöö gɔaa i̱ lö Kuoth Nhial!

⁸ Kä kɛ ɣöö Kuoth Nhial gɔaaɛ, kɛ kui̱ ɛmɔ nyuthɛ ji̱ dueeri duɔ̱ɔ̱p in thuɔ̱k.

⁹ Bo̱o̱th ɛ nɛy tin mua̱l mua̱a̱l kɛ min la cuɔ̱ɔ̱ŋ, kä nyuthɛ nɛy tin kɔ̱c duɔ̱ɔ̱pdɛ.

¹⁰ Duɔ̱p Kuɔth Nhial diaal tekɛ nhök mi thil pek kɛnɛ ŋa̱th mi lɛny ni dɔɔr, kä nɛy tin ka̱pkɛ mat ruacdɛ kɛnɛ nyuuthnikɛ.

¹¹ Kɛ kui̱ cio̱tädu, lö Kuoth Nhial, päl duerä kɛ ɣöö di̱tdɛ ɛlɔ̱ŋ.

¹² Kä kɛ ŋaani kɛn tin luɔ̱thkɛ Kuoth Nhial? Bi Kuoth Nhial kɛ nyuɔ̱ɔ̱th kɛ duɔ̱ɔ̱p in görkɛ.

¹³ Bikɛ ni̱nkiɛn thuk rɛy ciɛɛŋä mi gɔaa, kä bi gaatkiɛn mun ciɛŋ ala duŋdiɛn.

¹⁴ Kä Kuoth Nhial, ɛ määth nɛɛni tin luɔ̱thkɛ jɛ, kä la nyuthɛ kɛ mat ruacdɛ.

¹⁵ Kä la guɛcä ni ji̱n Kuoth Nhial, kɛ ɣöö bi ɣä ka̱m raar rɛy cambakä min ca dɛɛpni ɣä.

¹⁶ Lunyni kä ɣä, kä a lɔcdu kɔ̱c kɛ ɣä, kɛ ɣöö ɛ ɣän kä rɔa, kä ta̱a̱kɛ riɛk.

¹⁷ Luär bɛ̈c bɛ̈ɛ̈c tin te lɔɔcdä kä kämni ɣä raar rɛy cucädä.

¹⁸ Guic rikä kɛnɛ cuɔ̱cdä kä päli ɣä dueerkä diaal.

¹⁹ Kä guic ji̱ tɛ̈rä ŋuankɛ i̱di! Kä nɛn gak kɛnɛ lo̱k in lökɛ ni ɣä.

²⁰ Ku tëkdä gaŋ, kä kän ɣä, a ɣä /ca bilɛ moc kɛ pöc, kɛ ɣöö cä rɔɔdä lua̱k ji̱.

²¹ Kä a gɔykä kɛnɛ cuŋkä gaŋkɛ ɣä, kɛ ɣöö ɣän ŋa̱a̱thä ni ji̱.

²² Kän I-thɛ-rɛl, lö Kuoth, rɛy bɛ̈c bɛ̈ɛ̈cnikɛ diaal.