Diit 22 - RUAC KUƆTH IN RƐL RƆ

Pal kɛ kui̱ lua̱k rɛy rikä

(Dit Dee-bid)

¹ Kuothdä, Kuothdä, ɛŋu ci ɣä ba̱ny piny ɔ? Ɛŋu ci rɔ nɔ̱a̱n kɛ ɣöö deri ɣä luäk ɔ, kɛ wiee jiɛthä lɔaacdä?

² Kä lö Kuothdä, ɣän cä wiee kɛ cäŋ kɛɛliw, kä /keni ɣä loc, cɔalä ji̱ kɛ wäär a thil lɔ̱a̱ŋ.

³ Kä ŋotdi rɛl gɔɔydu rɔ, kä liakɛ ni ji̱ ɛ ji̱ I-thɛ-rɛl.

⁴ Kä cu gua̱a̱ri ŋäth ni ji̱, kɛ ŋa̱thdiɛn curikɛ kän.

⁵ Cua ji̱ thiec kɛ luäk, kä curikɛ kän, mëë ca ji̱ ŋäth, cukɛ thil jiath lɔaac.

⁶ Ɣän cä cu ce̱tnikɛ ciek, a /ci mua wut, yɔaŋkɛ ni ɣä ɛ wutni, kä lo̱k naath ɣä.

⁷ Kä nɛy diaal tin guɛckɛ ɣä, dɔalkɛ ɣä, yɔny kɛn thukiɛn kɛ ɣä, kä tiɛŋkɛ wuɔ̱thkiɛn, wä kɛ i̱,

⁸ “Jɛn ŋääthɛ ni Kuoth Nhial, a Kuoth Nhial luäk jɛ, a jɛ luäk jɛ kɛ ɣöö cɛ nhɔk ni jɛ!”

⁹ Kä ɛ ji̱n ɛ nëë jak ɣä kä dapkɛ, kä ɛ ji̱n ɛ nëë tiit ɣä baap maar.

¹⁰ Kä cua̱ rɔ thi̱eŋ ji̱ ni mëë dapkɛ ɣä, nikɛ bendä raar jic maar ɛ ji̱n Kuothdä.

¹¹ /Cu nɔ̱a̱n kɛ ɣä, riɛk ɛ ni thie̱kä, kä thilɛ ram mi bi ɣä luäk.

¹² Ci nɛy ti ŋuan ti ce̱tkɛ mök ɣä go̱l, nɛy ti buɔ̱m buɔ̱ɔ̱m ti ce̱tkɛ mök kä Ba-can ɣä göl piny.

¹³ Cikɛ thukiɛn lëp ɣööŋ kɛ ɣä, ce̱tnikɛ lony mi bur mi näk buɔth ɛ.

¹⁴ Ca ɣä cu kiɛth raar ce̱tnikɛ pi̱w, ci cɔ̱wkä diaal ben raar wäŋkurikiɛn. Ci lɔcdä cu ce̱tnikɛ kɔl mi ci lëër.

¹⁵ Kä ci buɔ̱mdä cu kööt ce̱tnikɛ dhaar muɔ̱ɔ̱n, kä ci lɛpdä cu dɔp ni jio̱o̱mdä, ci cu ba̱ny ni ɣä rɛy tupä ce̱tkɛ ram mi ci li̱w.

¹⁶ Ca ɣä go̱l ɛ nɛy ti ji̱ nyuɔɔni, buɔ̱n nɛɛni ti la̱a̱t jiäkni ca ɣä göl piny, cikɛ tetkä kɛnɛ ciökä put kä piny.

¹⁷ Ɣän dëë cɔ̱wkä diaal luäŋ kɛ kuën, kɛ ɣöö di̱l naath ni ɣä guec.

¹⁸ Cikɛ da̱a̱k ni bieynikä kamnikiɛn, kä cukɛ gaakni yuɔr kɛ kui̱ bieydä min bäär.

¹⁹ /Cu na̱n lö Kuoth Nhial! Bër luäk ɣä kɛ pɛ̈th!

²⁰ Bër kän ti̱eydä kä thɛp, kän tëkdä kä jio̱o̱k ti̱ti̱!

²¹ Bër kän ɣä thok luɔny! Bër kän ti̱eydä kä mök!

²² Ɣän bä ciötdu la̱t gaatmaar kä bä ji̱ puany rɛy bunä nɛɛni ti ŋuan.

²³ Kä yɛn nɛy tin luɔ̱thkɛ Kuoth Nhial puanyɛ jɛ! Kä liakɛ jɛ lö gaat Je-kɔb! Kä palɛ jɛ lö gaat I-thɛ-rɛl!

²⁴ Kä /kenɛ nɛy tin ciaŋkɛ kɛ jiäk lo̱k, /cɛ rɔ tëë kä kɛ, la liŋɛ kɛ mi ca jɛ thiec kɛ luäk.

²⁵ La liakä ji̱ rɛy bunä mi di̱i̱t, kä bä ya̱cdä la̱t nhiam nɛɛni tin luɔ̱thkɛ ji̱.

²⁶ Kä bi can mi̱th amäni mi cikɛ ria̱ŋ, kä nɛy tin palkɛ Kuoth Nhial ba jɛ puany! Kä a lo̱ckun tɛth ni ciaŋ!

²⁷ Bi pëk ɣɔaa diaal ɛ tim kä bikɛ rɔ̱ ri̱et Kuoth Nhial. Kä bi thuk duëli dööri diaal ben pal nhiamdɛ.

²⁸ Kɛ ɣöö Kuoth Nhial ɛ jɛn la kuäär, kä ɛ jɛn ruaac döör ɔ.

²⁹ Nɛy diaal tin liakɛ rɔ̱ bikɛ mi̱th nhiamdɛ kä ba jɛ pal, nɛy diaal tin wä li̱th ba rɔ̱ goŋ nhiamdɛ kɛn nɛy tin /ca rɔ̱ dëë jak kä tëk.

³⁰ Kä nɛy tɔ̱ bi ben tɔ̱, ba Kuoth Nhial lätikä, kä ba jɛ la̱t ri̱c ɔ bi ben ɔ,

³¹ kä bikɛ luäkdɛ la̱t nɛy tɔ̱ /ka̱n ni dap tɔ̱ ɛn ɣöö cɛ nɛmɛ la̱t.