Diit 17 - RUAC KUƆTH IN RƐL RƆ

Pal raam mi thil lua̱ŋ

(Ɛ Pal Dee-bid)

¹ Liŋ ɣä lö Kuoth Nhial mi latdä ni cuɔ̱ɔ̱ŋ, kä liŋ wieedä kɛ kui̱ lua̱k, liŋɛ kɛ ɣöö thilɛ ɣä mɛ̈ɛ̈t.

² Ku lukdä luk ɛ ji̱n, kä guic cuɔ̱ɔ̱ŋdä.

³ Mi ci lɔcdä ɣɔ̱n, mi ci ɣä gui̱l kɛ wäär, mi ci ɣä ɣɔ̱n kä diaal, deri ɣä jek thilɛ ɣä nyuɔɔn, kä /ci thokdä duer lat.

⁴ Ɣän /ka̱n guɔ̱ɔ̱r ni la̱t jiäk nath, kä ɣän /cä gak gaakni lät, kɛ ɣöö luɔ̱thä ruacdu.

⁵ Kä ɣän la ja̱a̱lä ni duɔ̱ɔ̱pdu /ka̱n met kac gekä.

⁶ Kä ɣän cɔalä ni ji̱ lö Kuoth kɛ ɣöö bi ɣä luäk, gäŋni ji̱thdu ɣä, kä liŋ rieetkä.

⁷ Nyuthni nɛɛku nhökdu min di̱i̱t, kɛ ɣöö ɛ ji̱n la gääŋ nɛɛni tin görkɛ luäk kä ji̱ kɛ kui̱ ji̱ tɛ̈riɛn.

⁸ Gaŋ ɣä ce̱tnikɛ ti̱ey waŋdu, gaŋ ɣä kɛ ti̱eepdu ce̱tnikɛ manpalɛ̈ɛ̈k mi gaŋ dɛykɛ,

⁹ kä ji̱ nyuɔɔni tin makɛ ɣä, kɛnɛ ji̱ tɛ̈rä tin gölkɛ ɣä.

¹⁰ Kä ci lo̱ckiɛn rɔ̱ ri̱t, thilɛ kɛ pälikä, kä ruac kɛn a jiäk.

¹¹ Kɛn görkɛ ɣä amäni, min ca ɣä go̱l ɛ kɛn guic kɛn ni gua̱a̱th mi dëë ɣɔ̱ɔ̱k ni ɣä piny.

¹² Cikɛ ce̱tnikɛ lony mi ci ŋɛ̈ɛ̈ny, ce̱tkɛ kɛ dɔw luɔny mi ci rɔ tɛ̱̈ɛ̱̈ mi dhɔm duɔ̱ɔ̱r.

¹³ Ku jiɛɛn lö Kuoth Nhial ro̱mni kɛ kɛ, bër bikɛ ben joc! Kän tëkdä kä ji̱ nyuɔɔni kɛ mutdu.

¹⁴ Bër kän ɣä lö Kuoth Nhial kɛ buɔ̱mdu kä nɛy tin ca tëkdiɛn la̱th kä nyin ɣɔaa ɛmɛ. Dëë jia̱a̱ckiɛn thia̱a̱ŋ kɛ tɔ̱ɔ̱ŋ in ci tɔ̱w kɛ kui̱diɛn, a dëë gaatkiɛn tekɛ kui̱c in di̱t ni jɛn thi̱n, a dëë tha̱a̱ŋdɛ jek ɛ gaat gankiɛn.

¹⁵ Kä ɣän bä ji̱ nɛn rɛy cuŋni, kä mi wa̱a̱ wä jiɛɛn li̱th, ɣän bä cu ro̱ŋ kɛ guecdu pa̱ny.