Diit 148 - RUAC KUƆTH IN RƐL RƆƐ nɛy diaal liakɛ Kuoth Nhial 1 Liakɛ Kuoth Nhial! Liakɛ Kuoth Nhial ni puɔ̱rä, liakɛ jɛ ni nhial! 2 Liakɛ jɛ yɛn ja̱a̱kɛ diaal, liakɛ jɛ yɛn nyinkɛ diaal! 3 Cäŋ yɛnɛ pay liakɛ jɛ, liakɛ jɛ yɛn ciɛr diaal tin riaw! 4 Liakɛ ji̱n pua̱a̱r in te ni nhial, kä liakɛ jɛ yɛn pi̱w tin te ni nhial puɔ̱rä! 5 Ɛ kɛn diaal liakɛ ciöt Kuɔth Nhial, kɛ ɣöö jɛn cuɛ lar ni rieet kä cua kɛn diaal cak. 6 Cuɛ kɛ yiath piny amäni cäŋ kɛl, kä cuɛ kɛ moc kɛ ŋut mi /ca dëë bäl. 7 Liakɛ Kuoth Nhial yɛn nyin piɛny, kɛnɛ yɛn ley yiëër diaal tin di̱t. 8 Kä cu buay kɛnɛ yiel kɛ ruur kɛnɛ thäc, kä cu thul ruacdɛ la̱t! 9 Kä yɛn pääm kɛ rët diaal, kɛ yɛn dɛy jiɛn kɛnɛ yɛn ŋuër diaal! 10 Kɛ yɛn ley dɔaar kɛ ɣɔ̱k diaal, amäni yɛn muɔɔl piɛny kɛnɛ diit diaal tin pär! 11 Kä yɛn kua̱r wec muɔ̱ɔ̱n kɛ nɛy diaal, kɛ yɛn bööth kɛ ruëëc wec muɔ̱ɔ̱n diaal! 12 Kɛ yɛn ŋuɛ̈tni wutni kɛnɛ ŋuɛ̈tni nyieet kɛɛl, kɛ yɛn dɔŋ wutni kɛnɛ gaat kɛɛl! 13 Ɛ kɛn diaal liakɛ ciöt Kuɔth Nhial, kɛ ɣöö di̱tni ciötdɛ kä ciööt diaal, kä buɔ̱mdɛ di̱tni jɛn kä nhial kɛnɛ piny. 14 Kä jɛn cɛ nɛɛkɛ moc kɛ buɔ̱m, ɛ jɛ liakɛ ɛ nɛɛkɛ diaal tin gɔw, kɛ ɣöö nhɔkɛ ji̱ I-thɛ-rɛl ɛlɔ̱ŋ. Liakɛ Kuoth Nhial! |
Nuer Bible © Bible Society in South Sudan 1998,2012.
Bible Society in South Sudan