Diit 147 - RUAC KUƆTH IN RƐL RƆ

Liakɛ Kuoth kɛ ti̱etdɛ kɛ Jɛ-ru-tha-lɛm

¹ Liakɛ Kuoth Nhial! Agɔaa ɛn ɣöö banɛ Kuothdan puany, kɛ ɣöö ɛ cuɔ̱ɔ̱ŋ kä ɛ tɛ̈th lɔaac, ɛn ɣöö banɛ jɛ puany kɛ diit.

² Ci Kuoth Nhial Jɛ-ru-tha-lɛm täth, kä cɛ ji̱ I-thɛ-rɛl luɔ̱ɔ̱c jɔk pɛɛcä.

³ Kä cɛ nɛy tin ci lo̱ckiɛn baath nyɔk kɛ buɔ̱m, kä cɛ buɔ̱ɔ̱tkiɛn jakä gɔw.

⁴ Kä jɛn ŋäcɛ pek ciɛri, kä cɛ kɛn diaal mockɛ ciööt.

⁵ Kuääran di̱tdɛ, kä tëë kɛ buɔ̱m mi di̱i̱t. Kä ŋäc ŋɔaanidɛ /ca dëë luäŋ kɛ thëm.

⁶ Kä jɛn Kuoth Nhial kapɛ ga̱y nhial, kä yorɛ ji̱ nyuɔɔni piny.

⁷ Ki̱etdɛ Kuoth Nhial diit tɛthä lɔaac, ki̱etdɛ Kuothdan diit kɛ thom.

⁸ Kä cɛ nhial thiäŋ kɛ pua̱a̱r, kä cɛ nhiaal rialikä kɛ kui̱ piɛny, kä cɛ juaac jakä wuɔ̱thni päämni.

⁹ Kä cɛ ley moc mi̱ethdiɛn, kä mi̱i̱thɛ dɛy diitni mi cikɛ ciöt.

¹⁰ /Ci lɔcdɛ tɛth kɛ buɔ̱m jiöŋkööri, kä /ci lɔcdɛ tɛth kɛ pual ran,

¹¹ duundɛ ɣöö tɛth lɔc Kuɔth Nhial kɛ nɛy tin luɔ̱thkɛ jɛ, kɛnɛ nɛy tin ŋa̱thkɛ ni nhökdɛ mi thil pek.

¹² Liakɛ Kuoth Nhial lö Jɛ-ru-tha-lɛm! Liakɛ Kuothdu lö Dha-yɔn!

¹³ Kä cɛ thiekni wecdun jakä bum, kä cɛ gaatku poth rɛydu.

¹⁴ Kä cɛ ji̱ moc mal kɛ ji̱ thieekädu, kä cɛ ji̱ moc kɛ bɛl ti gɔw.

¹⁵ Jɛn cɛ ruacdɛ la̱t wi̱c muɔ̱ɔ̱n, kä cua ruacdɛ la̱t kɛ pɛ̈th.

¹⁶ Kä cu thäc ɣɔw kum ce̱tkɛ pa̱ta̱n, kä cuɛ pi̱w tin ca rɔ̱ käp ruɔr piny ce̱tkɛ ŋɛ̈th.

¹⁷ Kä cuɛ nhiaal guiiyni yuɔr piny ce̱tnikɛ dööl, kä ɛŋa mi dëë kɔ̱c in cɛ ja̱k luäŋ kɛ ruɔ̱t?

¹⁸ Kä cuɛ ruacdɛ lat, kä cu pi̱ tin ca rɔ käp dhia̱y. Kä cuɛ jiɔamdɛ jakä put, kä cuɛ pi̱w cu lɔk.

¹⁹ Kä cuɛ ruacdɛ la̱r Je-kɔb, kä cuɛ ŋuɔ̱tkɛ kɛnɛ luëëkɛ la̱r I-thɛ-rɛl.

²⁰ /Kenɛ lät inɔ kɛ döör tin kɔ̱ŋ, kui̱c kɛn ŋuɔ̱tkɛ. Liakɛ Kuoth Nhial!