Diit 146 - RUAC KUƆTH IN RƐL RƆ

Kuoth Nhial ɛ jɛn la luääk ɔ

¹ Liakɛ Kuoth Nhial! Liakɛ Kuoth Nhial lö ti̱eydä!

² Ɣän bä Kuoth Nhial liak min ta̱a̱ teekä. Ɣän bä Kuothdä puany kɛ diit kɛ pek teekädä.

³ /Cu ŋa̱thdu läth kä ruëëc, kɛ ɣöö /ci luäk bi jek kä gat ran.

⁴ Mi wä yiëëdiɛn wä jiɛɛn bikɛ loc muun. Niɛ cäŋ ɛ mɔ bi cärkiɛn cu riaw.

⁵ Tɛ̈th lɔaac akɛ nɛy tin luääkdiɛn Kuoth Je-kɔb, tin te ŋa̱thdiɛn kä Kuoth Nhial ni Kuothdiɛn,

⁶ mëë cak nhial kɛnɛ piny, kɛ yiër kɛnɛ tin diaal tin te thi̱n. Ɛn ram in tiit gɔɔydɛ amäni cäŋ kɛl,

⁷ jɛn ram in käm nɛy tin yɔaŋkɛ cuɔ̱ɔ̱ŋdiɛn, kä mooc nɛy tin näk buɔthkɛ kɛ mi̱eth. Kuoth Nhial cɛ ji̱ yieenä lony,

⁸ kä cɛ nyin ciööri lɛp. Kä Kuoth Nhial la kapɛ nɛy tin ca ɣɔak piny nhial, kä jɛn nhɔkɛ ji̱ cuŋni.

⁹ Kuoth Nhial la gaŋɛ jur, la luäkɛ rɛ̈tni kɛnɛ män jɔɔkni, duundɛ ɣöö la yärɛ cär ji̱ nyuɔɔni.

¹⁰ Kuoth Nhial bɛ ruëc amäni cäŋ kɛl, Kuothdu lö Dha-yɔn bɛ ruëc ri̱cni diaal. Liakɛ Kuoth Nhial!