Diit 144 - RUAC KUƆTH IN RƐL RƆ

Tɛ̈th lɔaac kɛ kui̱ ga̱ŋ kä Kuoth

(Dit Dee-bid)

¹ Puɔ̱th akɛ Kuoth Nhial in la gääŋdä, mëë ci ɣä ŋi̱eec kɛ ko̱r, kä ci ɣä nyuɔ̱ɔ̱th kɛ tër köör.

² Jɛn ɛ gääŋdä kä ɛ käändä, ɛ ko̱tdä kä ɛ luääkdä, kä ɛ jɛn min la lɛ̱̈nyä rɔ thi̱n, kä ɛ jɛn ɛ nëë läth döör pinydä.

³ Kä raan ɛŋu lö Kuoth Nhial mɔ tiitdi mɔ, ɛn gat ran ɛ diɛɛri kɛ kui̱dɛ mɔ?

⁴ Kɛn ce̱tkɛ kɛ duäŋ thuɔk, kä ce̱t tëkdiɛn nikɛ ti̱eep.

⁵ Lɛp thiekni nhial lö Kuoth Nhial kä bër piny, thiap pääm kɛ ɣöö bikɛ kɛɛŋ kɛ tol.

⁶ Jäkni yiel nhial mi bi ji̱ tɛ̈ru riaw kä piny, kä yuri kui̱n kui̱ndu biɛ jocnikɛ.

⁷ Ku tetdu riny ni nhial, kä bër kän ɣä kä luäk ɣä rɛy pi̱i̱ni ti ŋuan ti̱ti̱, bër kän ɣä te̱tni ji̱ tɛ̈r,

⁸ tin latkɛ ni ka̱a̱cni, nɛy tin /ka̱n thuɔ̱k met lat.

⁹ Ɣän bä ji̱ ki̱et dit mi pay cak lö Kuoth, bä ji̱ ki̱et diit kɛ thom,

¹⁰ ji̱n ram in käm kua̱r juc nath, ji̱n ram ëë kään ja̱ŋdɛ ni Dee-bid.

¹¹ Kän ɣä kä luäk ɣä tetni juri, tin la latkɛ ni ka̱a̱cni, nɛy tin /ka̱n thuɔ̱k met lat.

¹² Ku gaatkɔ jakä pith kɛ buɔ̱m ni gaatädiɛn, kä ɛ nyieekɔ ce̱tnikɛ thieer ti la̱tkɛ dhɔr kua̱r.

¹³ Kä ɛ duël tɔ̱wnikɔ thiäŋ, kɛ kuay bɛɛl diaal ti gööl, kä ɛ detkɔ rëpkɛ rɔ kɛ bathdɔɔri ti bathdɔɔri da̱ŋ wäl rɛy ka̱a̱knikɔ,

¹⁴ kä ɛ ɣɔ̱ɔ̱kɔ diëthkɛ rɔ̱ ɛ ŋuan. Kä a jɛ thil kal mi ba lɛ to̱l, kä a jɛ thil nɛy ti naŋkɛ pɛɛcä, kä a jɛ thil wiee rɛy duɔ̱pnikɔ.

¹⁵ Tɛ̈th lɔaac akɛ nɛy tin bi puɔ̱ɔ̱th ti̱ti̱ jek, kä tɛ̈th lɔaac akɛ nɛy tin Kuothdiɛn Kuoth Nhial.