Diit 143 - RUAC KUƆTH IN RƐL RƆ

Pal kɛ kui̱ lua̱k

(Dit Dee-bid)

¹ Liŋ palä lö Kuoth Nhial, liŋ palä kɛ kui̱ gɔɔyädu, kä loc ɣä rɛy cuŋniku.

² Cu ja̱ŋdu lɛ luk, kɛ ɣöö thilɛ ram mi tëk mi te cuŋ nhiamdu.

³ Ji̱ tɛ̈rä guɔ̱ɔ̱rkɛ ɣä, dhiɛlkɛ tëkdä ni piny, cikɛ ɣä jakä cieŋ ni rɛy muɔ̱th ce̱tnikɛ nɛy tëë ci li̱w ni wal.

⁴ Kɛ kui̱ ɛmɔ ci yi̱eykä bɛ̈c, kɛ ci lɔcdä baath.

⁵ Kä cua̱ tim ni ni̱n tëë wal, kä cua̱ lätku diaal car, kä cua̱ nyiath ni lät tetniku.

⁶ Ɣän cua̱ tetkä tar nhial kä ji̱, ɣän cua̱ ji̱ go̱r ce̱tnikɛ mun mi kööt mi go̱o̱r pi̱w.

⁷ Loc ɣä kɛ pɛ̈th, lö Kuoth Nhial, ci yi̱eykä bɛ̈c. /Cu rɔ lɛ tɛ̱̈ɛ̱̈ kɛ ɣä, kiɛ bä ce̱tnikɛ nɛy tin ci li̱w.

⁸ Kä ɛ nhökdu min thil pek liɛŋä kɛ runwaŋ, kɛ ɣöö ŋa̱a̱thä ni ji̱. Nyuthni ɣä duɔ̱ɔ̱p in bi wä kɛ ɣä, kɛ ɣöö palä ni ji̱.

⁹ Kän ɣä kä ji̱ tɛ̈rä lö Kuoth Nhial, kɛ ɣöö cä rɔ lua̱k ji̱.

¹⁰ Nyuthni ɣä kɛ ɣöö bä la̱tdu la̱t, kɛ ɣöö ɛ ji̱n Kuothdä. Kä ɛ yiëëdu min gɔaa bo̱o̱th ɣä kɛ duɔ̱ɔ̱p mi car car.

¹¹ Kä kɛ kui̱ cio̱tädu lö Kuoth Nhial, kän tëkdä. Kä kɛ kui̱ gɔɔyädu kämni ɣä raar rɛy rikni.

¹² Kɛ nhökdu min thil pek, jakni ji̱ tɛ̈rä kä bit, kä däk ji̱ gɛmädä diaal, kɛ ɣöö ɛ ɣän ja̱ŋdu.