Diit 142 - RUAC KUƆTH IN RƐL RƆ

Pal kɛ kui̱ lua̱k kä gua̱n tɛ̈r

(Dit Dee-bid ëë kɛtdɛ mëë tëë rɛy kɔ̱a̱kä)

¹ Ɣän cɔalä ni Kuoth Nhial, kɛ jɔwdä cä tin dhalkɛ ɣä thöp jɛ.

² Ɣän cä rikä nööŋ nhiamdɛ, ɣän cä cuɔ̱cdä lat nhiamdɛ.

³ Mi ci yiëëdä bɛ̈c, ji̱n ŋäci min bi tuɔɔk kä ɣä. Kä dup diaal tin ja̱lä thi̱n, ci ji̱ tɛ̈r dhuur la̱th thi̱n.

⁴ Kä min cä pek cuëëcdä liɛc, thilɛ ram kɛl mi diɛɛr kɛ kui̱dä. Thilɛ ɣä gua̱a̱th känä, thilɛ ram mi diɛɛr kɛ tëkdä.

⁵ Ɣän cɔalä ni ji̱ lö Kuoth Nhial. Cua̱ wee i̱, “Ɛ ji̱n luääkdä, kä göörä ni ji̱ rɛy teekä nɛmɛ.”

⁶ Ku wieedä mal liŋ, kɛ ɣöö cä thil lua̱ŋ. Luäk ɣä kä ji̱ tɛ̈rä, kɛ ɣöö bumnikɛn kä ɣä.

⁷ Kämni ɣä raar rɛy yieenä, kɛ ɣöö dëë ciötdu liak. Kä bi nɛy tin gɔw ɣä go̱l, kɛ kui̱ gɔɔyädu kɛ ɣä.