Diit 139 - RUAC KUƆTH IN RƐL RƆ

Kuoth mi te gua̱thni diaal

(Dit Dee-bid)

¹ Mëë ci ɣɔ̱n lö Kuoth Nhial curi ɣä ŋa̱c.

² Ji̱n ŋäci gua̱a̱th in nyuur kɛ ɣä kä ŋäci gua̱a̱th in jiacä rɔ, ŋäci cärkä ni nɔ̱nä.

³ Ji̱n ŋäci gua̱th tin wa̱a̱ thi̱n kɛnɛ gua̱a̱th tin tɔ̱a̱cä thi̱n, kä dupkä diaal ŋäci kɛ.

⁴ Ɛ /ken ri̱et ni ben raar thokdä, ŋäci jɛ kɛɛliw lö Kuoth Nhial.

⁵ Ji̱n ci ɣä go̱l jɔkdä kɛnɛ nhiamdä, kä ci tëtdu la̱th puɔ̱ɔ̱nydä.

⁶ Ɛn ŋäc ŋɔaani mɛmɛ ɛ mi gääy ɣä, cɛ ɣä leny /cä jɛ dëë luäŋ kɛ ŋäc.

⁷ Kä winith dëë yiëëdu lɛ̱̈ny thi̱n ɔ lö Kuoth Nhial? Kiɛ ɛ winith dëë rɔ bar thi̱n ɔ kɛ ji̱?

⁸ Cäŋ bä wä puɔ̱rä ji̱n ti̱i̱ thi̱n ɛn wi̱ni, kä cäŋ bä wä jɔɔkni ti̱i̱ thi̱n ɛn wi̱ni.

⁹ Kä cäŋ ta̱a̱ kɛ gɔ̱k ti pärkɛ ɣä kui̱ känyä ca̱ŋ, kä bä lɛ wä cieŋ ni kui̱ konyä ca̱ŋ,

¹⁰ niɛ wi̱ni bi ɣä bo̱th bi ɣä gaŋ kɛ tët cuëëcdu.

¹¹ Kä mi wa̱a̱ wä wee i̱, “Kɛ thuɔ̱k bi muth ɣä kum, kä ɛ buay in te thi̱n loc rɔɔdɛ wäär,”

¹² kä cäŋɛ ni muth /cɛ col kä ji̱, kä wäär la buay ni jɛn, kä ji̱ ce̱tnikɛ cäŋ däär.

¹³ Kä ɛ ji̱n ɛ nëë cak cuŋ pua̱a̱nydä, curi cuŋkä rol kɛl ni jic maar.

¹⁴ Ɣän liakä ji̱ kɛ ɣöö ci ɣä cak ɛla mi gääy naath kä yi̱i̱c wi̱c nath. Kä lätku kɛ ti ga̱ykɛ naath. Kä ŋa̱cä kɛ agɔaa.

¹⁵ Kä ji̱n ŋäci ɣä agɔaa, ni mëë tuɔɔkä rɔ kɛ ca̱k jic maar, mëë duɔ̱ɔ̱lkɛ ɣä ni jic maar.

¹⁶ Kä curi ɣä nɛn ni mëë /ka̱n ɣä ni cak. Kä rɛy buɔkdu ca ni̱n teekädä diaal gɔ̱a̱r thi̱n, ɛ ŋotkɛ /kenkɛ ni tuɔɔk.

¹⁷ Kä cärku gɔwkɛ ɛlɔ̱ŋ kɛ ɣä lö Kuoth! Kä ŋuan kɛn ɛlɔ̱ŋ!

¹⁸ Mëë ɛ ɣän i̱ kuɛ̈ɛ̈nä kɛ, cu ŋuan nikɛn kä liɛt, kä mëë cä keer cua̱ ŋot ta̱a̱ kɛɛl kɛ ji̱.

¹⁹ Cua̱ go̱r ni mi näki ji̱ nyuɔɔni lö Kuoth, kä ɛ nɛy tin la luɔ̱ckɛ naath na̱n kɛ ɣä,

²⁰ kɛn nɛy tin la ruac ɛ jiäk kɛ kui̱du, nɛy tin liakɛ rɔ kɛ mi jiäk kɛ kui̱du!

²¹ Ɣän lökä nɛy tin lökɛ ji̱ lö Kuoth Nhial, kä lökä nɛy tin ca rɔ̱ luɔ̱c ji̱.

²² Ɣän lökä kɛ, nikɛ lo̱k in lo̱k, kä cɔalä kɛ ni ji̱ tɛ̈rä.

²³ Bër ɣɔ̱n ɣä lö Kuoth, kä ŋäcni lɔcdä, bër ɣɔ̱n ɣä bi cärkä ŋa̱c.

²⁴ Kä guic lɔcdä mi tëë kɛ nyuɔɔn ti te thi̱n, kä bo̱th ɣä kɛ duɔ̱ɔ̱pdu min do̱raar.