Diit 135 - RUAC KUƆTH IN RƐL RƆ

Liak Kuɔth kɛ kui̱ lätnikɛ tin bum

¹ Liakɛ Kuoth Nhial! Liakɛ ciöt Kuɔth Nhial, ka̱mɛ Kuoth Nhial liak lö ja̱a̱ŋkɛ,

² yɛn nɛy tin te cuŋä rɛy luaak Kuɔth Nhial, yɛn tin cuŋ rɛy kal luaak Kuɔthda.

³ Liakɛ Kuoth Nhial kɛ ɣöö gɔaaɛ, puanyɛ ciötdɛ kɛ ɣöö ɛ mi gɔaa.

⁴ Ci Kuoth Nhial Je-kɔb mëk rɔ, kä I-thɛ-rɛl ɛ duŋdɛ.

⁵ Ɣän ŋa̱cä jɛ ɛn ɣöö Kuoth Nhial di̱tdɛ, ɛn Kuäära di̱t ni jɛn kä kuth diaal.

⁶ Kä mɔ ci lɔc Kuoth Nhial nhɔkɔ la lätdɛ jɛ, puɔ̱ɔ̱rä kɛnɛ wi̱c muɔ̱ɔ̱n, rɛy yiëëri kɛnɛ lööli.

⁷ Kä ɛ jɛn la wuɔ̱n a jiɛɛc ɔ pek ɣɔaa, kä ɛ jɛn moc nhiaal kɛ yielɔ, kä ɛ jɛn la jiɔam a lony ɔ raar guäth tɔ̱ɔ̱wädɛ.

⁸ Kä ɛ jɛn ɛ nëë näk key gan I-jëp, mëë näk key nath kɛnɛ ley,

⁹ kä ɛ jɛn ɛ nëë jäk nyuuthni kɛnɛ lät tin ga̱ŋkɛ naath kä rɛydu lö I-jëp, kä ɛ jɛn ɛ nëë gak kɛ Pɛro kɛnɛ ji̱ kɔaarɛ.

¹⁰ Kä ɛ jɛn ɛ nëë näk döör ti ŋuan, kä ɛ jɛn ɛ nëë näk kua̱r tin buɔ̱m buɔ̱ɔ̱m,

¹¹ Thi-yon kuäär Ɛ-mor, kɛnɛ Ög kuäär Ba-can, kɛ kuäär Kɛ-naan kɛɛliw,

¹² kä cuɛ mundiɛn thöp, cuɛ jɛ thöp nɛɛkɛ ni ji̱ I-thɛ-rɛl.

¹³ Bi ciötdu te thi̱n amäni cäŋ kɛl lö Kuoth Nhial, bi kɛ̈kdu te thi̱n rɛy ri̱cni diaal.

¹⁴ Bi Kuoth Nhial nɛɛkɛ gaŋ, kä bɛ tekɛ kɔ̱a̱c lɔaac kɛ ja̱a̱ŋkɛ.

¹⁵ Kuth guääyni dööri kɛ ciɛk in bo̱r kɛnɛ da̱a̱p, tin la̱tkɛ ɛ naath kɛ tetkiɛn.

¹⁶ Tekɛ kɛ thuk, duundɛ ɣöö /ci kɛ ruac, kä tekɛ kɛ waŋ duundɛ ɣöö /cikɛ nën,

¹⁷ tekɛ kɛ ji̱th duundɛ ɣöö /cikɛ li̱ŋ, kä thilɛ yiëë mi te thokdiɛn.

¹⁸ Kä bi nɛy tin la̱tkɛ kɛ kɛnɛ nɛy tin ŋa̱thkɛ ce̱tnikɛ kɛ!

¹⁹ Liakɛ Kuoth Nhial lö dhɔr I-thɛ-rɛl! Liakɛ Kuoth Nhial lö dhɔr Ä-ron!

²⁰ Kä liakɛ Kuoth Nhial lö ji̱ Lii-bay! Kä liakɛ Kuoth Nhial lö yɛn tin luɔ̱thkɛ Kuoth Nhial!

²¹ Ɛ Kuoth Nhial liakɛ kä Dha-yɔn, jɛn min cieŋ kä Jɛ-ru-tha-lɛm! Liakɛ Kuoth Nhial!