Diit 132 - RUAC KUƆTH IN RƐL RƆ

Bi Kuoth cieŋ kä Dha-yɔn amäni cäŋ kɛl

(Dit mi la kiɛtkɛ ɛ nɛy tin la wäkä Jɛ-ru-tha-lɛm mi wäkɛ ti̱em runä la̱t thi̱n)

¹ Aɣ, Kuoth Nhial car Dee-bid, kɛnɛ bɛ̈c bɛ̈ɛ̈c diaal tëë cɛ rut.

² Car ruac ëë cɛ la̱r lö Kuoth Nhial, kɛnɛ ya̱c ëë cɛ rɔ ya̱c ji̱, ji̱n Kuoth Je-kɔb in leny buɔ̱mdu ti diaal mëë wëë i̱,

³ “Ɣän /cä bi wä dhɔrä kiɛ /cä bi wä dhaŋädä.

⁴ Ɣän /cä bi dɔ̱ɔ̱l kä /cä bi niɛɛn,

⁵ amäni mi cä gua̱a̱th jek kɛ kui̱ Kuɔth Nhial, gua̱a̱th mi bi Kuoth Je-kɔb in di̱t ni jɛn cieŋ thi̱n.”

⁶ Kɔn cakɔ thanduk matdä ruac liɛŋ kä Ɛp-ra-tha, kä cua̱kɔ jɛ jek rɛy ka̱a̱kni Yaar.

⁷ Cua̱kɔ ruac wakɔ i̱, “Wanɛ luaak Kuoth Nhial, wanɛ jɛ pal ni nhiam kɔam kuäärädɛ.”

⁸ Jiɛc rɔ lö Kuoth Nhial bër wër guäth lɔ̱ŋädu, ji̱n yɛnɛ thanduk bumädu.

⁹ Kä ɛ bööth palädu kuɔ̱mkɛ rɔ̱ kɛ cuŋ, kä ɛ nɛɛku tin ŋa̱thkɛ ji̱ ki̱t kɛ tɛ̈th lɔaac.

¹⁰ Kɛ ɣöö ci mat ruac la̱t kɛ ja̱ŋdu ni Dee-bid, /cu raandu min ci mɛk lo̱k.

¹¹ Kuoth Nhial cɛ ruac mi thuɔ̱k la̱r Dee-bid, ruac mi /cɛ bi luny jɔk thi̱n, cuɛ wee i̱, “Ram kɛl kä gaatku tin di̱eth ni ji̱n, bä jɛ jakä nyuur wi̱i̱ kɔam kuäärädu.

¹² Kä mi wä gaatku ŋuɔ̱tkä wä käp kɛnɛ luëëkä tin bä ŋi̱i̱cnikɛ, amäni gaatkiɛn bä bikɛ ruëc amäni cäŋ kɛl.”

¹³ Kä kɛ ɣöö ci Kuoth Nhial Dha-yɔn mɛk, go̱o̱rɛ ɣöö bɛ jɛ jakä gua̱a̱th cieŋädɛ, wëë i̱,

¹⁴ “Bi gua̱a̱th ɛmɛ a gua̱a̱th cieŋäda amäni cäŋ kɛl, ɛn gua̱a̱th ɛmɛ ɣän bä cieŋ thi̱n, kɛ ɣöö nhɔakä jɛ.

¹⁵ Ɣän bä Dha-yɔn moc kɛ ria̱ŋ mi di̱i̱t, kä bä ji̱kɛ tin can ro̱ŋ kɛ mi̱eth.

¹⁶ Kä bä bööth palädɛ poth kɛ kui̱ lätnikiɛn diaal, kä bi ji̱kɛ tin tekɛ ŋa̱th ki̱et kɛ tɛth lɔaac.

¹⁷ Ɛn wanɛ bä raan pith kä kuay Dee-bid mi bi la kuäär mi di̱i̱t, ɛn wanɛ bä ruec rialikä kɛ kui̱ kua̱rä min cä mɛk.

¹⁸ Kä bä ji̱ tɛ̈rɛ kum kɛ buar, duundɛ ɣöö bi kuäärɛ rep ni rɔ.”