Diit 122 - RUAC KUƆTH IN RƐL RƆ

Liak kɛnɛ pal kɛ kui̱ Jɛ-ru-tha-lɛm

(Dit Dee-bid mi la kiɛtkɛ ɛ nɛy tin la wä kä Jɛ-ru-tha-lɛm mi wäkɛ ti̱em runä la̱t thi̱n)

¹ Cu lɔcdä tɛɛth mëë cikɛ ɣä jiök i̱, “Wanɛ luaak Kuɔth Nhial!”

² Täämɛ kɔn ti̱n, ta̱kɔ cuŋä thiekniku lö Jɛ-ru-tha-lɛm.

³ Jɛ-ru-tha-lɛm ca jɛ la̱t ce̱tkɛ wec mi ca lɔth kɛɛl kɛ la̱t.

⁴ Ɛ jɛn gua̱a̱th in wä thuk duëli thi̱n, ji̱ thuk duëli Kuɔth Nhial, bäkɛn kɛ ɣöö ba Kuoth Nhial ben la̱r tɛ̈th lɔaac, ce̱tnikɛ mëë ca la̱r I-thɛ-rɛl.

⁵ Kɛ ɣöö ɛn wi̱ni ca kɔamni luɔ̱k la̱th thi̱n, kɛn kɔamni kuäärä dhɔaar Dee-bid.

⁶ Palɛ kɛ kui̱ malä Jɛ-ru-tha-lɛm i̱, “Ɛ nɛy tin nhɔakɛ ji̱ ciaŋdiɛn gɔaa.

⁷ Kä ɛ mal te rɛy pa̱nyniku, kä ɛ ti̱ecku tin bum tekɛ mal.”

⁸ Kä kɛ kui̱ dämaari kɛnɛ mäthnikä, ɣän bä Jɛ-ru-tha-lɛm jiök i̱, “Ɛ mal te rɛydu.”

⁹ Kɛ kui̱ luaak Kuɔth Nhial ni Kuothda, ɣän bä pal kɛ kui̱ gɔɔydu.