Diit 119 - RUAC KUƆTH IN RƐL RƆ

Liak ŋuɔ̱tni Kuɔth Nhial

¹ Tɛ̈th lɔaac akɛ nɛy tin thil bɛ̈ɛ̈l, tin guɔ̱ɔ̱rkɛ ni ŋuɔ̱t Kuɔth Nhial!

² Tɛ̈th lɔaac akɛ nɛy tin tiɛtkɛ luëëkɛ, nɛy tin görkɛ jɛ kɛ lɔcdiɛn kɛɛliw,

³ tin thilɛ dueer ti la̱tkɛ, tin guɔ̱ɔ̱rkɛ ni dupkɛ!

⁴ Ci ŋuɔ̱tku ka̱m naath kɛ ɣöö bakɛ guɔ̱ɔ̱r ɛgɔaa.

⁵ Ɣän göörä ɣöö bi dupkä a thuɔ̱ɔ̱k kɛ ti̱etdä kɛ ciaaŋdu!

⁶ Inɔ /cä bilɛ tekɛ pöc, mi wa̱a̱ ŋuɔ̱tku diaal wä tit.

⁷ Ɣän bä ji̱ puany kɛ lɔc mi gɔaa, mi wa̱a̱ rieetku tin gɔw wä ŋa̱c.

⁸ Ɣän bä laatku tit, /cu ɣä päl ruëëc.

⁹ Dëë ŋuɛ̈tni dupkiɛn tit ɛgɔaa i̱di? Deekɛ jɛ tit kɛ luthdiɛn kɛ ruacdu.

¹⁰ Göörä ji̱ kɛ lɔcdä kɛɛliw, /cu ɣä jak kä bath kä ŋuɔ̱tku.

¹¹ Ɣän cä ruacdu la̱th lɔcdä, kɛ ɣöö /cä ji̱ bilɛ duer duer.

¹² Ɛ liak wä kä ji̱ lö Kuoth Nhial, nyuuthni ɣä kɛ ciaaŋdu.

¹³ Kɛ lɛpdä ɣän bä ŋuɔ̱tku diaal tin ci lar lat raar.

¹⁴ Tɛth lɔcdä kɛ guuridä kɛ luëëku, ce̱tkɛ ram mi tɛth lɔcdɛ kɛ ria̱ŋ kɛ ti ŋuan.

¹⁵ Ɣän bä ciaaŋdu nyiath, kä bä dupku guɔ̱ɔ̱r.

¹⁶ Ɣän nhɔakä ŋuɔ̱tku, kä /cä ruacdu bi pa̱l ruëëc.

¹⁷ Lätni agɔaa kɛ ja̱ŋdu, kɛ ɣöö bä tëk kä bä ruacdu luɔ̱th.

¹⁸ Lɛp waŋdä kɛ ɣöö bä tin ga̱ykɛ naath nɛn rɛy ŋuɔ̱tniku.

¹⁹ Ɛ ɣän ram mi jääl wi̱i̱ muɔ̱ɔ̱n, /cu ɣä tëë kä luëëku.

²⁰ Ci yiëëdä thuuk kɛ go̱r ŋuɔ̱tniku gua̱thni diaal.

²¹ La lueeki ji̱ liakä, tin ca lam, kɛnɛ nɛy tin ci bath kä luëëku.

²² /Cu kɛ jak kä kuëthkɛ ɣä ba ɣä lo̱k kɛ ɣöö tiɛɛtdä luëëku.

²³ A cäŋ ci ruëëc nyuur kɛɛl ɛ latkɛ ɣä jɔ̱ɔ̱r, bi ja̱ŋdu nyiath ni ciaaŋdu.

²⁴ Ŋuɔ̱tku kɛ kɛn la tɛ̈th lɔaacdä mɔ, kä kɛ kɛn la luëëkä tɔ̱.

²⁵ Ci ti̱eydä wä ni rɛy tupä, nyɔk ɣä kɛ tëk ce̱tnikɛ mëë ci lar.

²⁶ Mëë cä ji̱ la̱r tëkdä, curi ɣä loc, nyuuthni ɣä kɛ ciaaŋdu.

²⁷ Jakni ɣä kä ŋa̱cä rieetku, kä bä guɔ̱ɔ̱r ni lätku tin ga̱ykɛ naath.

²⁸ Ci ti̱eydä cuuc kɛ rik, bumä ce̱tnikɛ mëë ci lar.

²⁹ Gaŋ ɣä kä dup tin jiäk, ŋi̱i̱cni ɣä kɛ ŋuɔ̱tku agɔaa.

³⁰ Ɣän cä mɛk ni duɔ̱ɔ̱p cuŋni, cä luëëku la̱th nhiamdä.

³¹ Ɣän bä käp ni ŋuɔ̱tku, lö Kuoth Nhial, /cu ɣä jak kä bi pöc.

³² Bi wur ni ɣän dup luëëkniku, kɛ ɣöö ci ŋäc ŋɔaanidä rep.

³³ Ŋi̱i̱cni ɣä kɛ ciaaŋdu, lö Kuoth Nhial, bä jɛ tit amäni guut.

³⁴ Moc ɣä ŋäc ŋɔaani mi bä rɔm ni ŋuɔ̱tku, mi bä titnikɛ kɛ lɔcdä kɛɛliw.

³⁵ Bo̱th ɣä kɛ ciaŋ luëëkniku, kɛ ɣöö nhɔakä ni jɛ.

³⁶ Ri̱tni lɔcdä kä ŋuɔ̱tku, ɛ /ci mua duɔ̱ɔ̱p jek ŋɔaani.

³⁷ /Cu waŋdä jak kä guicni ti thil luɔt, jakni ni ɣä kä tëk kɛ ruacdu.

³⁸ Jakni ruecdu kä thuɔ̱k kɛ ja̱ŋdu, jakni jɛ kä thuɔ̱k kä nɛy tin luɔ̱thkɛ ji̱.

³⁹ Woc ciaŋ jiääk in la̱tdä, kɛ ɣöö ŋuɔ̱tku gɔwkɛ.

⁴⁰ Kä nɛnɛ, ɣän göörä ta̱a̱du, kä kɛ gɔɔydu jakni ɣä kä tëk.

⁴¹ Ɛ nhökdu min thil pek bëë kä ɣä, lö Kuoth Nhial, ɛ ka̱ndu bëë ce̱tkɛ min ci lar,

⁴² kɛ ɣöö bä ram in ci ɣä kuëth kulɛ loc, kɛ ɣöö ŋa̱a̱thä ni ruacdu.

⁴³ Kä /cu ruac thukä woc kä ɣä, kɛ ɣöö ŋa̱a̱thä ni rieetku.

⁴⁴ Ɣän bä ŋuɔ̱tku tit ni ciaŋ, amäni cäŋ kɛl.

⁴⁵ Kä bä cu ja̱l ɛ thil dual, kɛ ɣöö cä guɔ̱ɔ̱r ni ruacdu.

⁴⁶ Kä bä rieetku lat nhiam kua̱ri, kä /ca ɣä bi jak kä po̱c,

⁴⁷ kɛ ɣöö tɛth lɔcdä kɛ ŋuɔ̱tku, tin nhɔakä ɛlɔ̱ŋ.

⁴⁸ Kä cua̱ ŋuɔ̱tku tin nhɔakä go̱r, kä bä nyiath ni ciaaŋdu.

⁴⁹ Tim ruacdu kɛ ja̱ŋdu, mëë ci ɣä jak kä ŋa̱th.

⁵⁰ Kä min moc ɣä kɔ̱a̱c lɔaac ɛ ruacdu min ci ɣä te̱k.

⁵¹ Kä nɛy tin ji̱ liakä yɔaŋkɛ ɣä, kä duundɛ ɣöö /ka̱n ŋuɔ̱tku päl.

⁵² Kä mëë cä ŋuɔ̱tku tëë wal tim, cukɛ ɣä bum, lö Kuoth Nhial.

⁵³ Kä cua̱ ŋɛ̈ɛ̈ny kɛ ji̱ nyuɔɔni, nɛy tëë ca ŋuɔ̱tku pa̱l ruëëc.

⁵⁴ Kä luëëku kɛ kɛn la diitkä tɔ̱ rɛy duëël in ciaŋä.

⁵⁵ Kä la caarä ciötdu kɛ wäär, lö Kuoth Nhial, kä tiɛɛtdä ŋuɔ̱tku.

⁵⁶ Nɔmɔ ɛ jɛn min la̱tdä, kɛ ɣöö tiɛɛtdä ruaacniku.

⁵⁷ Kuoth Nhial ɛ ji̱n duŋdä, cä rɔ yac kɛ ɣöö bä rieetku yop.

⁵⁸ Bä ji̱ go̱r kɛ lɔcdä kɛɛliw, gɔaani kɛ ɣä ce̱tnikɛ mëë ci lat.

⁵⁹ Kä mɔ cä dupku carɔ, la luɔ̱nyä kä luëëku.

⁶⁰ Ɣän bä pɛ̈th /cä bi gaal, kɛ ti̱et luëëkniku.

⁶¹ Ɛ cäŋ ca cio̱o̱kdä yiɛn ɛ gua̱n nyuɔɔni, /cä ŋuɔ̱tku bi pa̱l ruëëc.

⁶² Kɛ wäärdäär cua̱ rɔ jiɛc liakä ji̱, kɛ kui̱ ruaacniku tin thuɔ̱ɔ̱k.

⁶³ Ɛ ɣän määth nɛɛni diaal tin luɔ̱thkɛ ji̱, nɛy tin tiɛtkɛ ciɛŋku.

⁶⁴ Kä wi̱c muɔ̱ɔ̱n, lö Kuoth Nhial, cɛ thia̱a̱ŋ kɛ nhökdu min do̱raar, ŋi̱i̱cni ɣä kɛ ŋuɔ̱tku.

⁶⁵ Ci lät ɛgɔaa kɛ ja̱ŋdu, lö Kuoth Nhial, ce̱tnikɛ ruacdu.

⁶⁶ Ŋi̱i̱cni ɣä kɛ luk mi gɔaa kɛnɛ ŋäc ŋɔaani, kɛ ɣöö ŋa̱a̱thä ni luëëku.

⁶⁷ Mëë /ka̱n ni cuuc ta̱a̱ bathä, duundɛ ɣöö tiɛɛtdä ŋuɔ̱tku.

⁶⁸ Ji̱n gɔaa i̱ kä lätdi ti gɔw, ŋi̱i̱cni ɣä kɛ ciaaŋdu.

⁶⁹ Ji̱ liakä latkɛ ka̱a̱cni kɛ kui̱dä, duundɛ ɣöö bä ŋuɔ̱tku käp kɛ lɔcdä kɛɛliw.

⁷⁰ Kɛ nɛy ti thil lo̱ckiɛn ca̱r, duundɛ ɣöö nhɔakä ni ŋuɔ̱tku.

⁷¹ Ɛ mi gɔaa ɛn ɣöö cä cuuc, kɛ ɣöö bä luëëku ŋa̱c.

⁷² Kä ŋuɔ̱tku gɔw ni kɛn, kä da̱a̱p kɛnɛ ciɛk in bo̱r ti bathdɔɔr.

⁷³ Ci ɣä cak ɛ ci ɣä täth nikɛ tetku, moc ɣä kɛ ŋäc ŋɔaani kɛ ɣöö bä ŋuɔ̱tku kulɛ ŋa̱c.

⁷⁴ Bi nɛy tin luɔ̱thkɛ ji̱ lo̱ckiɛn tɛɛth mi wa ɣä nɛn, kɛ ɣöö ŋa̱a̱thä ni ruacdu.

⁷⁵ Kä ŋa̱cä jɛ lö Kuoth Nhial ɛn ɣöö lukdu ɛ cuɔ̱ɔ̱ŋ, kä ɛ cuɔ̱ɔ̱ŋ kä ji̱ ɛn ɣöö bi ɣä luk.

⁷⁶ Ɛ nhökdu min thil pek buum ɣä, ce̱tnikɛ mëë ci la̱r ja̱ŋdu.

⁷⁷ Ɛ lɔcdu kɔ̱c kɛ ɣä kɛ ɣöö bä tëk, kɛ ɣöö nhɔakä ni ŋuɔ̱tku.

⁷⁸ Ɛ ji̱ liakä jakɛ kä po̱c, kɛ ɣöö gɔanykɛ ɣä kɛ mi thil luɔt, duundɛ ni ɣöö bä nyiath ni ciaaŋdu.

⁷⁹ Ɛ nɛy tin luɔ̱thkɛ ji̱ bëë kä ɣä, nɛy tin ŋa̱ckɛ luëëku.

⁸⁰ A tiɛɛtdä ruaacniku a thil bɛ̈l, kɛ ɣöö /cä bi lɛ pöc.

⁸¹ Ci ti̱eydä cuuc kɛ go̱r känädu, duundɛ ɣöö ŋa̱a̱thä ni ruacdu.

⁸² Ci wäŋkä cuuc kɛ guec ruac ëë ci lar, kä cua̱ wee i̱, “Bi ɣä bum i̱ nɛy?”

⁸³ Cäŋni mi cä ce̱tnikɛ ɣök kɔŋä mi ci tɔɔrɛ, cä luëëku bi pa̱l ruëëc.

⁸⁴ Bi ja̱ŋdu liep amäni nɛy? Kä bi nɛy tin ciaŋkɛ ɣä a jiäk duäc i̱ nɛy?

⁸⁵ Ci ji̱ liakä pul mi bä pɛn thi̱n tɛt, nɛy tin gua̱c kɛ luëëku.

⁸⁶ Ŋuɔ̱tku diaal kɛ thuɔ̱ɔ̱k, luäk ɣä, kɛ ɣöö gur naath ɣä baaŋ.

⁸⁷ Ci kɛn ɣä thuŋ woc wi̱i̱ muɔ̱ɔ̱n, duundɛ ɣöö /cä ciaaŋdu bi päl.

⁸⁸ Kän tëkdä kɛ nhökdu min thil pek, kɛ ɣöö bä luëëku kulɛ tit.

⁸⁹ Kä ruacdu, lö Kuoth Nhial ɛ do̱raar, kä thilɛ mi wany jɛ puɔ̱ɔ̱rä.

⁹⁰ Kä gɔɔydu tëë rɛy ri̱cni diaal, kä ci piny la̱t, kä cuɛ cu te thi̱n.

⁹¹ Kä ti diaal tekɛ thi̱n amäni walɛ kɛ ruacdu, kä ti diaal la̱tkɛ ni ji̱ ikä.

⁹² Duŋ mi /ciɛ ɣöö nhɔakä ni ŋuɔ̱tku, ce̱t cä li̱w rɛy rikädä.

⁹³ Ɣän cä luëëku bi pa̱l ruëëc, kɛ ɣöö ci ɣä moc tëk kɛ kɛ.

⁹⁴ Kän ɣä kɛ ɣöö ɛ ɣän raandu, kɛ ɣöö ɣän göörä ni ciɛŋku.

⁹⁵ Ji̱ jiäkni bi̱emkɛ ɣöö ba ɣä däk, duundɛ ɣöö bä tit ni ŋuɔ̱tku.

⁹⁶ Ti diaal cä kɛ nɛn tekɛ gua̱a̱th mi pekɛ thi̱n, duundɛ ɣöö luëëku thilɛ kɛ pek.

⁹⁷ Kua̱ ŋuɔ̱tku lɛ nhɔk i̱di! Bä ku nyiath ni kɛ kɛ cäŋ kɛɛliw.

⁹⁸ Kä luëëku jakɛ ɣä kä pɛl ɛlɔ̱ŋ kä ji̱ tɛ̈rä, kɛ ɣöö tekɛ kɛɛl kɛ ɣä.

⁹⁹ Ɛ ɣän ŋäc ŋɔak ɔ kä ŋi̱eeckä diaal, kɛ ɣöö guɔ̱ɔ̱rä ni ciɛŋku.

¹⁰⁰ Ɛ ɣän ŋäc ŋɔak ɔ kä di̱t, kɛ ɣöö cä tit ni ŋuɔ̱tku.

¹⁰¹ Cä rɔ tit duɔ̱pni ji̱ jiäkni, kɛ ɣöö bä guɔ̱ɔ̱r ni ruacdu.

¹⁰² Ɣän /ka̱n rɔ ri̱et gekä kä luëëku, kɛ ɣöö ci ɣä ŋi̱eec ɛ ji̱n.

¹⁰³ Ku rieetku lɛ liɛm i̱di kä ɣä, limnikɛn kä liɛɛth tuar thokdä!

¹⁰⁴ Kɛ ŋuɔ̱tku cä ŋäc ŋɔaani jek, kɛ kui̱c ɛmɔ bä dup mɛɛtdä lo̱k.

¹⁰⁵ Ruacdu ɛ lɛmbär kä ɣä, kä ɛ buay ciöknikä.

¹⁰⁶ Ɣän cä yac kä bä cuɔ̱p, ɛn ɣöö bä guɔ̱ɔ̱r ni ŋuɔ̱tku tin thuɔ̱ɔ̱k.

¹⁰⁷ Ɣän cä cuuc ɛlɔ̱ŋ, lucni ɣä tëk, lö Kuoth Nhial, ce̱tnikɛ ruacdu.

¹⁰⁸ Nhɔk palä kɛ ji̱, lö Kuoth Nhial, kä ŋi̱i̱cni ɣä kɛ ŋuɔ̱tku.

¹⁰⁹ Ɛ cäŋ ni min rɔamä tëkdä kɛ tetdä, ɣän cä ŋuɔ̱tku bi pa̱l ruëëc.

¹¹⁰ Ci nɛy tin ji̱ nyuɔɔni ɣä dɛp, duundɛ ɣöö /cä bi ciɛc kä ciɛŋku.

¹¹¹ Kä luëëku kɛ kɛn la kui̱dä tɔ̱ amäni cäŋ kɛl, kä kɛ kɛn la tɛ̈th lɔaacdä mɔ.

¹¹² Ɣän cä lɔcdä la̱th nɛy ŋuɔ̱tniku, amäni cäŋ guutdä.

¹¹³ Ɣän lökä ram mi tekɛ cär rɛw, duundɛ ɣöö nhɔakä dupku.

¹¹⁴ Ɛ ji̱n gääŋdä kä ko̱tdä, kä ŋa̱a̱thä ni ruacdu.

¹¹⁵ Nɔa̱a̱nɛ rɔ̱ kɛ ɣä yɛn la̱a̱t jiäkni, kɛ ɣöö bä rɔm ni luëëk Kuɔthdä.

¹¹⁶ Luäk ɣä ce̱tnikɛ ruacdu kɛ ɣöö bä tëk, /cu ɣä jak kä po̱c kä min ŋa̱a̱thä.

¹¹⁷ Luäk ɣä, kɛ ɣöö bä kään, ɣän bä guɔ̱ɔ̱r ni luëëku.

¹¹⁸ Lo̱ki nɛy diaal tin pa̱lkɛ ruaacniku ruëëc, kɛ ɣöö mɛɛtdiɛn thilɛ jɛ luɔt.

¹¹⁹ Kä ji̱ nyuɔɔni ɣɔaa diaal ce̱tkɛ kɛ gɔak kä ji̱, kɛ kui̱c ɛmɔ nhɔakä ni ciaaŋdu.

¹²⁰ Cuɛ puɔ̱nydä lath kɛ dual kɛ ji̱, kä cua̱ dual kɛ ŋuɔ̱tku.

¹²¹ Ɣän cä la̱t ni mi thuɔ̱k kä cuɔ̱ɔ̱ŋ, /cu ɣä bäny ji̱ tɛ̈rä.

¹²² Ŋäcni jɛ ɛn ɣöö bi ja̱ŋdu la̱t ɛgɔaa, ɛ nɛy tin thil kuoth /ca ɣä ciɛŋ a jiäk.

¹²³ Ci waŋdä cuuc kɛ guec duɔ̱p känädu, kɛnɛ ɣöö bi ruacdu min thuɔ̱k cuɔ̱p.

¹²⁴ Lätni kɛ ja̱ŋdu ce̱tnikɛ nhökdu, ŋi̱i̱cni ɣä kɛ ciɛŋku.

¹²⁵ Ɛ ɣän ja̱ŋdu, moc ɣä kɛ ŋäc ŋɔaani, kɛ ɣöö dëë ŋuɔ̱tku kulɛ ŋa̱c.

¹²⁶ Ɛ gua̱a̱th kä ji̱ Kuoth Nhial, kɛ ɣöö bi duɔ̱ɔ̱r la̱t, kɛ ɣöö ca ŋuɔ̱tku töl.

¹²⁷ Kɛ kui̱c ɛmɔ nhɔakä luëëku, la̱nyäkɛ da̱a̱p mi lɛy lɛy.

¹²⁸ Kɛ ɣöö cä guɔ̱ɔ̱r ni ciɛŋku tin cuŋ, ɣän lökä dup dueeri.

¹²⁹ Luëëku gɔwkɛ ɛlɔ̱ŋ, kɛ kui̱c ɛmɔ luɔ̱thä kɛ.

¹³⁰ Ŋäc ruacdu mocɛ naath kɛ buay, kä jakɛ dɔ̱a̱r kä ŋäcɛ ŋɔak.

¹³¹ Ɣä cä thia̱k kɛ lia̱a̱, kɛ göörä kɛ ŋäc luëëkniku.

¹³² Lunyni kä ɣä, teni kɛ kɔ̱a̱c lɔaac kɛ ɣä, ce̱tkɛ min la lätdi kä nɛy tin nhɔakɛ ciötdu.

¹³³ Jakni dupkä kä cuŋ ce̱tnikɛ ruacdu, /cu duer jak kä tiaamɛ ɣä.

¹³⁴ Kän ɣä kä ciaaŋ jiääk nath, kɛ ɣöö bä ciɛŋku kulɛ luɔ̱th.

¹³⁵ Ɛ lɔcdu tɛth kɛ ja̱ŋdu, kä ŋi̱i̱cni ɣä kɛ ŋuɔ̱tku.

¹³⁶ Lo̱ny mer nyinkä ce̱tnikɛ waŋ pi̱i̱ni, kɛ ɣöö /ken naath ŋuɔ̱tku yop.

¹³⁷ Lö Kuoth Nhial ɛ ji̱n cuɔ̱ɔ̱ŋ, kä luɔ̱ɔ̱ku kɛ cuŋ.

¹³⁸ Kä ŋuɔ̱t tin ci la̱th piny kɛ cuŋ, kä kɛn diaal kɛ thuɔ̱ɔ̱k.

¹³⁹ Ŋɛ̈ɛ̈nydä cɛ ɣä cuc ɛlɔ̱ŋ, kɛ ɣöö ci ji̱ tɛ̈rä rieetku pa̱l ruëëc.

¹⁴⁰ Ruacdu min ci lat ɛ thuɔ̱k, kä nhɔk ja̱ŋdu jɛ.

¹⁴¹ Ɛ cäŋ ni mi ɛ ɣän ram mi tɔtdɛ kä lökɛ, ŋuɔtdä /cä luëëku bi pa̱l ruëëc.

¹⁴² Kä cuɔ̱ɔ̱ŋdu ɛ do̱raar, kä ŋuɔ̱tdu ɛ thuɔ̱k.

¹⁴³ Riɛk kɛnɛ jiath lɔaac cikɛ ben kä ɣä, duundɛ ɣöö nhɔakä ni luëëku.

¹⁴⁴ Kä luëëku kɛ cuŋ amäni cäŋ kɛl, mocä kɛ ŋäc ŋɔaani kɛ ɣöö bä tëk.

¹⁴⁵ Ɣän cɔalä ji̱ kɛ lɔcdä kɛɛliw, loc ɣä lö Kuoth Nhial! Ɣän bä luëëku luɔ̱th.

¹⁴⁶ Ɣän cɔalä ni ji̱, kän ɣä, ɣän bä ŋuɔ̱tku tit.

¹⁴⁷ Ɣän cä keer ni bakä cua̱ ji̱ cɔl kɛ luäk, kä ɣän ŋa̱a̱thä ni ruacdu.

¹⁴⁸ Kui̱c waŋdä ni̱en ce̱tnikɛ yiëën wa̱r, kɛ ɣöö dëë ruacdu kulɛ nyiath.

¹⁴⁹ Liŋ jɔwdä rɛy nho̱kädu min thil pek, kä tit tëkdä lö Kuoth Nhial ce̱tnikɛ ruacdu.

¹⁵⁰ Kä nɛy tin la̱a̱t jiäkni thia̱kɛ kɛ ɣä, kä na̱nkɛ ɛlɔ̱ŋ kɛ ŋuɔ̱tku.

¹⁵¹ Kä thia̱ki, lö Kuoth Nhial, kä luëëku diaal kɛ thuɔ̱ɔ̱k.

¹⁵² Kɛ gua̱a̱th ëë ci wä, cua̱ ŋuɔ̱tku ŋa̱c, kɛ ɣöö cikɛ jak kä te thi̱n amäni cäŋ kɛl.

¹⁵³ Guic cuɔ̱cdä kä luäk ɣä, kɛ ɣöö /ka̱n ŋuɔ̱tku pa̱l ruëëc.

¹⁵⁴ Käni lukdä kä kän ɣä, jakni ɣä kä tëk ce̱tnikɛ ruacdu.

¹⁵⁵ Ka̱n na̱nɛ kɛ ji̱ dueeri, kɛ ɣöö /ci kɛ ciaaŋdu go̱r.

¹⁵⁶ Di̱t kɔ̱a̱c lɔaacdu, lö Kuoth Nhial, jakni ɣä kä tëk ce̱tnikɛ ŋuɔ̱tku.

¹⁵⁷ Nɛy ti ŋuan guɔ̱rkɛ ɣä kä ji̱ tɛ̈rä, duundɛ ɣöö /ka̱n rɔ ri̱t kä luëëku.

¹⁵⁸ La guiɛcä nɛy tin thil kuoth ɛ jiäk, kɛ ɣöö /ken kɛn ŋuɔ̱tku tit.

¹⁵⁹ Nɛnɛ ɣän nhɔakä ŋuɔ̱tku i̱di, tit tëkdä lö Kuoth Nhial ce̱tnikɛ nhökdu min do̱raar.

¹⁶⁰ Kä rieetku diaal kɛ thuɔ̱ɔ̱k, kä ŋuɔ̱tku diaal kɛ cuŋ amäni cäŋ kɛl.

¹⁶¹ Joc ruëëc ɣä baaŋ, duundɛ ɣöö dualä kɛ ruacdu.

¹⁶² Ɣän tɛth lɔcdä kɛ ruacdu, ce̱tkɛ ram mi ci kuak ti ŋuan jek pec.

¹⁶³ Ɣän lökä nyin ka̱a̱cni, duundɛ ɣöö nhɔakä ŋuɔ̱tku.

¹⁶⁴ La puanyä ji̱ nikä bärɔw kɛ cäŋ kɛ kui̱ ruaacniku tin cuŋ.

¹⁶⁵ Mal mi di̱i̱t akɛ nɛy tin nhɔakɛ ŋuɔ̱tku, thilɛ mi deekɛ jak kä tëth.

¹⁶⁶ Bä lip ni ka̱ndu, lö Kuoth Nhial, kä ɣän bä la̱t ni ŋuɔ̱tku.

¹⁶⁷ Ɣän bä tit ni luëëku, kɛ ɣöö nhɔakä kɛ ɛlɔ̱ŋ.

¹⁶⁸ Ɣän tiɛtdä ciaaŋdu kɛnɛ ŋuɔ̱tku, kɛ ɣöö dupkä diaal ŋäcikɛ.

¹⁶⁹ Ɛ wieedä cup nhiamdu, lö Kuoth Nhial, moc ɣä kɛ ŋäc ŋɔaani ce̱tnikɛ ruacdu.

¹⁷⁰ Ɛ palä cup nhiamdu, kä kän ɣä ce̱tnikɛ ruacdu.

¹⁷¹ Ɣän bä ji̱ liak ɛlɔ̱ŋ, kɛ ɣöö ci ɣä ŋi̱eec kɛ luëëku.

¹⁷² Kä bi lɛpdä ruacdu kit ala dit, kɛ ɣöö luëëku diaal kɛ cuŋ.

¹⁷³ Kä ɛ tetdu luäk ɣä, kɛ ɣöö cä mɛk ni ciaaŋdu.

¹⁷⁴ Ɣän göörä ka̱ndu lö Kuoth Nhial, kä ɣän nhɔakä ni ŋuɔ̱tku.

¹⁷⁵ Jakni ɣä kä tëk kɛ ɣöö bä ji̱ puany, kä ɛ ŋuɔ̱tku lua̱kɛ ɣä.

¹⁷⁶ Ɣän ca̱tdä kɛ dɛl mi ci bath, go̱r ja̱ŋdu, kɛ ɣöö /ka̱n luëëku pa̱l ruëëc.