Diit 118 - RUAC KUƆTH IN RƐL RƆ

Dit puɔnyä kɛ kui̱ juɔ̱c

¹ La̱rɛ Kuoth Nhial tɛ̈th lɔaac, kɛ ɣöö gɔaa ɛ, nhökdɛ min thil pek tëë thi̱n amäni cäŋ kɛl!

² Kä ɛ I-thɛ-rɛl lar jɛ i̱, “Nhökdɛ min thil pek tëë thi̱n amäni cäŋ kɛl.”

³ Kä ɛ dhɔr Ä-ron larkɛ jɛ i̱, “Nhökdɛ min thil pek tëë thi̱n amäni cäŋ kɛl.”

⁴ Kä ɛ nɛy tin luɔ̱thkɛ Kuoth Nhial larkɛ jɛ i̱, “Nhökdɛ min thil pek tëë thi̱n amäni cäŋ kɛl.”

⁵ Rɛy riknikä la cɔalä ni ji̱ lö Kuoth Nhial, kä curi ɣä loc ɛ ɣöö ci ɣä lony ɛlɔr.

⁶ Kɛ ɣöö te Kuoth Nhial kɛɛl kɛ ɣä /cä bi dual. Kä ɛŋu mi dëë raan ɛ lät kä ɣä?

⁷ Kuoth Nhial tëë kɛɛl kɛ ɣä bɛ ɣä luäk, ɣän bä ji̱ tɛ̈rä guic ɛ juɔckɛ kɛ.

⁸ Gɔaa ni ɣöö dëë raan ŋa̱thdɛ la̱th kä Kuoth Nhial, kä ɣöö dëë raan ŋa̱thdɛ la̱th kä naath.

⁹ Gɔaa ni ɣöö dëë raan ŋa̱thdɛ la̱th kä Kuoth Nhial, kä ɣöö dëë raan ŋa̱thdɛ la̱th kä bööth.

¹⁰ Ci döör diaal ɣä göl piny, kä kɛ ciöt Kuɔth Nhial ɣän bäkɛ joc!

¹¹ Cikɛ ɣä go̱l, cikɛ ɣä go̱l pëkni diaal, kä kɛ ciöt Kuɔth Nhial ɣän bäkɛ joc!

¹² Kɛn cikɛ rɔ̱ duɔ̱l ɣä ce̱tnikɛ tuaar, duundɛ ɣöö li̱wkɛ ŋut ce̱tnikɛ mac kuiini, kä kɛ ciöt Kuɔth Nhial ɣän bäkɛ joc!

¹³ Ca ɣä ɣɔk ɛlɔ̱ŋ kɛ ɣöö bä tɛɛth, duundɛ ɣöö cu Kuoth Nhial ɣä luäk.

¹⁴ Kuoth Nhial ɛ jɛn buɔ̱mdä kä ɛ ditdä, kä ɛ jɛn cia̱ käändä mɔ.

¹⁵ Tëë kɛ diit jucä ti gɔw tia̱ kiɛtkɛ ni dho̱ri ji̱ cuŋni, wäkɛ i̱, “Buɔ̱m Kuɔth Nhial cɛ ti buɔ̱m buɔ̱ɔ̱m la̱t!

¹⁶ Kɛ buɔ̱mdɛ cɛ kɔn ka̱m juc, buɔ̱m Kuɔth Nhial cɛ ti buɔ̱m buɔ̱ɔ̱m la̱t.”

¹⁷ Ɣän /cä bi li̱w, bä tëk, kä bä tin ci Kuoth Nhial kɛ la̱t wä lat.

¹⁸ Kuoth Nhial cɛ ɣä tɔ̱ŋ ɛlɔ̱ŋ, duundɛ ɣöö /kenɛ ɣä jakä li̱w.

¹⁹ Lepni ɣä thiekni cuŋni, kɛ ɣöö dëë coth rɛy kɛ kɛ dëë Kuoth Nhial wä la̱r tɛ̈th lɔaac.

²⁰ Mɛmɛ ɛ jɛn thi̱i̱k Kuɔth Nhial, bi ji̱ cuŋni wä rɛc kɛ jɛ.

²¹ Ɣän la̱rä ji̱ tɛ̈th lɔaac kɛ ɣöö ci ɣä loc, kä ci ji̱n a käändä.

²² Jɛn päm in ci ta̱a̱th duëli jɛ lo̱k, ɛ jɛn ci ben a päm in tuɔkɛ ta̱th duëël ɔ.

²³ Mɛmɛ ɛ la̱t Kuɔth Nhial, kä ɛ mi gääy kɔn.

²⁴ Mɛmɛ ɛ jɛn cäŋ in ci Kuoth Nhial ɛ la̱t, ta̱nɛ kɛ gɔɔy kɛnɛ tɛ̈th lɔaac thi̱n.

²⁵ Känkɔ thieec nɛy ni ji̱ lö Kuoth Nhial! Aɣ, Kuoth Nhial thieec nɛy ni ji̱, jakni nyinkɔ kä gɔw!

²⁶ Puɔ̱th akɛ ram mi bëë kɛ ciöt Kuoth Nhial. Bakɔ ji̱ poth ni luaak Kuɔth Nhial.

²⁷ Kuoth Nhial ɛ Kuoth, kä cɛ kɔn ka̱m buay. Ɛ te tetkun kɛ kar jiɛn matdɛ rɔ̱ kɛ cäŋ ti̱mä, biaa amäni gëk yi̱kä.

²⁸ Ɛ ji̱n Kuothdä, kä ɣän bä ji̱ la̱r tɛ̈th lɔaac, ɛ ji̱n Kuothdä ɣän bä ji̱ puany.

²⁹ La̱rɛ Kuoth Nhial tɛ̈th lɔaac kɛ ɣöö jɛn gɔaa ɛ, kä nhökdɛ min thil pek tëë thi̱n amäni cäŋ kɛl.