Diit 116 - RUAC KUƆTH IN RƐL RƆ

Liak raam mi ci kään li̱th kɛ Kuoth

¹ Ɣän nhɔakä Kuɔth Nhial, kɛ ɣöö cɛ wieedä kɛnɛ palä liŋ.

² Kɛ kui̱ kä ɣöö cɛ ɣä ga̱ŋ ji̱thdɛ, ɣän bä la cɔalä ni jɛ min ŋuɔtdä ta̱a̱ teekä.

³ Kä cu dep li̱eth ɣä yian, kä cu dual wä jɔɔkni ben kä ɣä, ɣän cu rik ɣä cuc kɛnɛ jiath lɔaac.

⁴ Kä ɣän cua̱ Kuoth Nhial cɔl wa̱a̱ i̱, “Liɛpä ni ji̱ lö Kuoth Nhial, kän tëkdä!”

⁵ Kuoth Nhial gɔaaɛ kä tëë kɛ cuŋ, Kuothda tëëkɛ kɔ̱a̱c lɔaac.

⁶ Kuoth Nhial la gaŋɛ can, mëë ta̱a̱ kɛ riɛk cuɛ ɣä luäk.

⁷ Ku lɔ̱a̱ŋ nyɔk lö ti̱eeydä, kɛ ɣöö ci Kuoth Nhial gɔaaɛ ji̱.

⁸ Kɛ ɣöö ci Kuoth Nhial ɣä kän li̱th, kä cɛ wieedä jakä cuŋ, kä ci ɣä gaŋ kä ɣöö dëë tɛɛth.

⁹ Kä ɣän cua̱ ja̱l ni nhiam Kuɔth Nhial muun in tëk ji̱kɛ.

¹⁰ Ɣän cua̱ ŋa̱thdä käp, ɛ cäŋ ɛ mëë wa̱a̱ i̱, “Ɣän cä da̱k ɛlɔ̱ŋ.”

¹¹ Rɛy gääyädä cua̱ wee i̱, “Nɛy diaal kɛ ji̱ kacä.”

¹² Kuɛ la ŋu mi bä luɔ̱c Kuoth Nhial, kɛ kui̱ gɔɔyädɛ kɛ ɣä?

¹³ Ɣän bä jɛ ka̱m muc kɔaŋ kɛ kui̱ käänä, kä bä jɛ la̱r tɛ̈th lɔaac kɛ ɣöö cɛ ɣä kän.

¹⁴ Ɣän bä ya̱cdä jak kä thuɔ̱k kɛ Kuoth Nhial, nhiam nɛɛnikɛ diaal.

¹⁵ Min bɛc ɛlɔ̱ŋ kä Kuoth Nhial, ɛ lia̱a̱ nɛɛni tin ŋa̱thkɛ jɛ.

¹⁶ Ɛ ɣän ja̱ŋdu lö Kuoth Nhial, ɛ ɣän ja̱ŋdu, min la gat nya läätädu. Ji̱n ci ɣä lony rɛy yieenädä.

¹⁷ Ɣän bä ji̱ moc muc tɛthä lɔaac, kä bä cɔl ni ji̱n Kuoth Nhial.

¹⁸ Ɣän bä ya̱cdä jak kä thuɔ̱k kɛ Kuoth Nhial, nhiam nɛɛnikɛ diaal,

¹⁹ rɛy kal luaak Kuɔth Nhial, ni rɛydu lö Jɛ-ru-tha-lɛm. Liakɛ Kuoth Nhial!