Diit 115 - RUAC KUƆTH IN RƐL RƆ

Dääk Kuɔth kɛnɛ jɔɔk

¹ /Ciɛ kui̱da lö Kuoth Nhial, /ciɛ kui̱da, duundɛ ɣöö ɛ ciötdu ɛ nin ba ka̱m guëth, kɛ kui̱ nho̱kädu mi thil pek kɛnɛ gɔɔydu.

² Kä ɛŋu mɔ jio̱k döör kɔ mɔ i̱, “Kuothdiɛn a nikä?”

³ Kä jɛn Kuothda tëë nhial, kä jɛn lätdɛ ni tin diaal tin nhɔkɛ.

⁴ Kä kuthkiɛn ɛ ciɛk in bo̱r kɛnɛ da̱a̱p, tin la lät tetni ran.

⁵ Tekɛ kɛ thuk, kä /ci kɛ ruac, kä tekɛ kɛ nyin kä /cikɛ nën.

⁶ Tekɛ kɛ ji̱th, kä /cikɛ li̱ŋ, kä tekɛ kɛ wum, kä /cikɛ ŋuäc.

⁷ Tekɛ kɛ te̱t kä /cikɛ ŋɔak käp, tekɛ kɛ ciök kä /cikɛ jäl, kä thilɛ jɔw rölikiɛn.

⁸ Kä nɛy tin la̱tkɛ kɛ päärkɛn kɛ kɛ, amäni nɛy tin ŋa̱thkɛ kɛ.

⁹ Yɛn ji̱ I-thɛ-rɛl ŋa̱thɛ ni Kuoth Nhial! Jɛn ɛ luääkdu kä ɛ ko̱tdu.

¹⁰ Kä yɛn ji̱ thuɔk duëël Ä-ron ŋa̱thɛ ni Kuoth Nhial! Jɛn ɛ luääkdu kä ɛ ko̱tdu.

¹¹ Kä yɛn nɛy tin luɔ̱thkɛ Kuoth Nhial ŋa̱thɛ ni Kuoth Nhial! Jɛn ɛ luääkdu kä ɛ ko̱tdu.

¹² Kä Kuoth Nhial caarɛ kɔn kä bɛ kɔn poth, kä jɛn bɛ dhɔr I-thɛ-rɛl poth, kä bɛ dhɔr Ä-ron poth,

¹³ ba nɛy tin luɔ̱thkɛ jɛ poth, nɛy tin luɔ̱thkɛ kɛnɛ nɛy tin luth.

¹⁴ Kä ci Kuoth Nhial yɛ mal rep, yɛn amäni gaatkun.

¹⁵ Ci Kuoth Nhial yɛ mal poth, ɛn ram in cak nhial kɛnɛ piny.

¹⁶ Kä pua̱a̱r ɛ duŋ Kuɔth Nhial, duundɛ ɣöö cɛ piny ka̱m raan.

¹⁷ Kä /ci nɛy ti ci li̱w Kuoth Nhial dëë liak, kɛn nɛy tin te bitdä jɔɔkni.

¹⁸ Duundɛ ɣöö kɔn bakɔ Kuoth Nhial liak, ɛn täämɛ ɛ wä mäni cäŋ kɛl. Liak Kuoth Nhial!