Diit 11 - RUAC KUƆTH IN RƐL RƆ

Läthni ŋa̱thdu kä Kuoth Nhial

(Dit Dee-bid)

¹ Ɣän cä rɔ lua̱k Kuoth Nhial, deri ɣä kulɛ jiök i̱di i̱, “Barni rɔ wi̱i̱ pa̱a̱mdu ce̱tkɛ dit,

² kɛ ɣöö nɛnɛ, ci ji̱ nyuɔɔni kuen kueenikiɛn ka̱n, kä cikɛ bäärikiɛn la̱th thi̱n, kɛ ɣöö bikɛ ji̱ cuŋni ba̱r rɛy muɔ̱th.

³ Kä mi ca ŋuɔ̱t ku töl, ɛŋu dëë ji̱ cuŋni jɛ lɛl ɔ?”

⁴ Kuoth Nhial a rɛy luaakdɛ min rɛl rɔ, Kuoth Nhial tëë nyuurä kɔam kuäärädɛ puɔ̱ɔ̱rä, jɛn guicɛ gaat nath, kä ɣɔ̱nɛ kɛ.

⁵ Kuoth Nhial ɣɔ̱nɛ gua̱n cuŋni kɛnɛ gua̱n nyuɔɔni, kä lo̱k ti̱eydɛ ram in nhɔk ni ko̱r.

⁶ Bɛ ji̱ nyuɔɔni jäk kä mac miim mi ci bo̱o̱l, kä bɛ ka̱m nikɛ jiɔam ka̱lwa̱w.

⁷ Kuoth Nhial ɛ gua̱n cuŋni, kä nhɔkɛ ni lät cuŋni, kä bi ji̱ cuŋni ben nhiamdɛ.