Diit 109 - RUAC KUƆTH IN RƐL RƆ

Jiääk lɔaac raam mi te rɛy rikni

(Dit Dee-bid)

¹ Ɣän kua̱ puany ni ji̱ lö Kuoth, /cu lɛ biɛt.

² Kɛ ɣöö ruac ji̱ nyuɔɔni kɛnɛ ji̱ ka̱a̱cni kɛ kui̱dä, latkɛn ni ka̱a̱cni kɛ kui̱dä.

³ Lat kɛn ni ruac nyi̱rä mi jiäk, kä makɛn ɣä kɛ mi thil thar.

⁴ Ɛ cäŋ nhɔakä kɛ gɔny kɛn ɣä, ɛ cäŋ pal ni ɣän kɛ kui̱diɛn.

⁵ Kä kɛn cuɔ̱lkɛ ɣä mi gɔaa kɛ mi jiääk, kä luɔckɛ nhökdä kɛ lo̱k.

⁶ Cukɛ wee i̱, “Kuenyni jɛ ram mi jiääk mi bi ruac kɛ kui̱dɛ, ɛ ram mi gɔɔny jɛ cuŋ gekädɛ.

⁷ Kä mi wa jɛ luk a jɛ tekɛ duer, kä ɛ palɛ kua̱ ni duer.

⁸ Kä ɛ ni̱n teekädɛ kuiy, kä ɛ ram mi dɔ̱ŋ kän gua̱a̱thdɛ.

⁹ Kä a gaatkɛ thil gua̱ndiɛn kä ɛ ciekdɛ doth ɛla ciek jɔkä.

¹⁰ Kä ɛ gaatkɛ ku yi̱ec ɛla li̱eem, kä akɛ juɔckɛ raar gua̱thni tin ci da̱k, tin cieŋkɛ thi̱n.

¹¹ Kä ɛ nyinkɛ naŋkɛ ɛ ji̱ ŋuälikɛ, kä ɛ tin diaal tin cɛ la̱t naŋkɛ ɛ jur.

¹² A jɛ thil ram kɛl mi nyuth jɛ gɔɔy, kiɛ ram mi bi tekɛ nhök kɛ kui̱ gankɛ tin rɛ̈tni.

¹³ Kä ɛ kuaykɛ diaal li̱w, kä ɛ ciötdɛ tɛ̈mkɛ raar kä ri̱c in bi ben.

¹⁴ Kä ɛ Kuoth Nhial tiim dueer gua̱ni, kä ɛ dueer man /ca kɛk raar.

¹⁵ Kä ɛ dueerkiɛn te nhiam Kuɔth Nhial gua̱thni diaal, kä ɛ kɛ̈kdiɛn ku thil wi̱i̱ muɔ̱ɔ̱n.

¹⁶ Kɛ ɣöö /kenɛ met ca̱r ɛn ɣöö bɛ mi gɔaa la̱t, duundɛ ɣöö la jocɛ ni can kɛnɛ nɛy tin go̱o̱r ni duɔ̱ɔ̱r, kɛ nɛy tin jiɛth lo̱ckiɛn amäni lia̱a̱diɛn.

¹⁷ La nhɔkɛ ni ɣöö biitdɛ naath, ɛ bit ku ben kä jɛ. Kä la lo̱kɛ ɣöö pothɛ naath, ɛ puɔ̱th ku na̱n kɛ jɛ.

¹⁸ Cɛ rɔ kum kɛ bit ɛla bi̱i̱dɛ, cɛ coth puɔ̱ɔ̱nydɛ ce̱tkɛ pi̱w, cɛ coth rɛy cɔ̱ɔ̱nikɛ ce̱tnikɛ liɛɛth.

¹⁹ Kɛ kui̱c ɛmɔ ɛ bit ku jɛ kum ce̱tnikɛ bi̱i̱ mi cɛ rith ni rɔ, kɛnɛ la̱a̱k in la yiɛnɛ ni lɛ̈tdɛ ni ciaŋ.”

²⁰ Ci mɛmɛ mal a jɛn min dëë Kuoth Nhial ɛ lät, kä nɛy tin gɔanykɛ ɣä, nɛy tin latkɛ ni jiäk kɛ kui̱dä.

²¹ Duundɛ ɣöö ji̱n Kuoth Nhial Kuäärä, lätni kɛ ɣä ɛgɔaa kɛ kui̱ cio̱tädu, kɛ gɔɔy nho̱kädu min thil pek, kän ɣä.

²² Kɛ ɣöö ɛ ɣän ram mi can mi go̱o̱r ni duɔ̱ɔ̱r, kä ci lɔcdä jiath ɛlɔ̱ŋ.

²³ Ɣän bä cu bath ce̱tnikɛ ti̱eep thiaŋ, bɛ ɣä cu lɔk ce̱tnikɛ kɔryɔm mi lɔk jiɔamɛ.

²⁴ Cɛ mua̱a̱lkä duäny kɛ thil mi̱eth, ɛ ci ri̱ŋdä thuuk kɛ nua̱n.

²⁵ Cä cua̱ ram mi dɔalkɛ ɛ göönykä, mɔ ca ɣä nɛn ɔ la tiɛŋkɛ ni wuɔ̱thkiɛn.

²⁶ Luäk ɣä lö Kuoth Nhial ni Kuothdä! Kän ɣä kɛ kui̱ nho̱kädu min thil pek.

²⁷ Ɛ kɛn ɛ ŋäc ɛn ɣöö ɛ tetdu, ɛn ɣöö ɛ ji̱n Kuoth Nhial lät jɛ mɔ.

²⁸ Dɔ̱ŋ bikɛ ɣä lam, duundɛ ɣöö bi ɣä poth, kä ɛ ji̱ tɛ̈rä ku tekɛ poc, kä bi ja̱ŋdu tekɛ tɛ̈th lɔaac.

²⁹ Ɛ göönykä kuɔ̱mkɛ kɛ buar, ɛ kɛ riɛthkɛ rɔ̱ kɛ pöc ce̱tkɛ bi̱i̱.

³⁰ Ɣän bä Kuoth Nhial la̱r tɛ̈th lɔaac, ɣän bä jɛ liak rɛy nɛɛni diaal.

³¹ Kɛ ɣöö cɛ cuɔ̱ŋ kɛɛl kɛ ram min can, kɛ ɣöö bɛ jɛ luäk tetni nɛɛni tin görkɛ näkdɛ.