Diit 108 - RUAC KUƆTH IN RƐL RƆ

Pal kɛ kui̱ juɔ̱c

(Ɛ tuar ɛ dit Dee-bid)

¹ Cä lɔcdä rialikä lö Kuoth Nhial cä lɔcdä rialikä, ɣän bä ji̱ puany kɛ dit. Keri lö ti̱eeydä!

² Keri lö thom yɛnɛ löth! Ɣän bä bak ɣɔaa ker.

³ Ɣän bä ji̱ la̱r tɛ̈th lɔaac rɛy nath, lö Kuoth Nhial, kä bä ji̱ liak kɛ diit rɛy dööri.

⁴ Kɛ ɣöö nhökdu min thil pek te ni jɛn nhial kä pua̱a̱r, kä gɔɔydu min di̱i̱t cɛ räth ni rɛy puɔ̱rä.

⁵ Kuoth ɛ ji̱n la rueec nhial ɔ, kä ɛ buɔ̱mdu thiääŋ wi̱c muɔ̱ɔ̱n kɛɛliw.

⁶ Kän kɔ kä luäk kɔ kɛ buɔ̱mdu, kɛ ɣöö bi nɛy tin nhɔki cu kään.

⁷ Kä cu Kuoth ruac ni luaakdɛ wëë i̱, “Kɛ tɛ̈th lɔaac, ɣän bä Cɛ-kɛm da̱a̱k, kä bä Lo̱o̱l Cu-koth dääk kä nɛɛkä.

⁸ Gil-yad ɛ duŋdä, kä Ma-na-thɛ ɛ duŋdä bä, kä Ɛ-pa-rim ɛ kum köörä, kä Juda ɛ kɛɛt kuäärädä.

⁹ Kä Mo-ab ɛ gua̱a̱th la̱kdä, kä Ɛ-dɔm bä wa̱a̱rikä yuɔr thi̱n mi lot ni ɣöö duŋdä, kä bä rɔal kɛ tɛ̈th lɔaac kä Pi-li-thɛt.”

¹⁰ Kä ɛŋa mi bi ɣä naŋ rɛy wec in bum bum? Kä ɛŋa mi bi ɣä nöŋ Ɛ-dɔm?

¹¹ Ɛ cikɔ ku lo̱k inu lö Kuoth ɛ /ci bi ku wä kɛɛl kɛ rɛmda?

¹² Ku kɔ mal luäk kä gua̱n tɛ̈r, kɛ ɣöö luäk ran thilɛ jɛ luɔt.

¹³ Kɛ ɣöö te Kuoth kɛ kɔ kɛɛl, bak kɔ ji̱ tɛ̈r joc, kɛ ɣöö ɛ jɛn bi ji̱ tɛ̈ra joc ɔ.