Diit 107 - RUAC KUƆTH IN RƐL RƆ

Bok Dhi̱eec ( Diit 107—150 ) Liak Kuoth kɛ kui̱ gɔɔyädɛ

¹ La̱rɛ Kuoth Nhial tɛ̈th lɔaac, kɛ kui̱ gɔɔyädɛ, kɛ ɣöö nhökdɛ min thil pek ɛ do̱raar!

² Kä ɛ nɛy tin ci Kuoth Nhial kɛ kän la ruac inɔ, kɛn nɛy tin cɛ kän rɛy rikni,

³ kɛn tin cɛ ma̱a̱t wi̱i̱ni tin kɔ̱ŋ, nɛy tin cɛ ma̱a̱t kui̱ känyä ca̱ŋ kɛnɛ kui̱ konyä ca̱ŋ, kɛ cam ɣɔaa kɛnɛ cuec ɣɔaa.

⁴ Kä cu tha̱a̱ŋ nath yi̱i̱c där dɔaar mi luɔ̱t, kä /ca duɔ̱ɔ̱p mi wee kɛ wec mi deekɛ cieŋ thi̱n jek,

⁵ kä näk buɔthkɛ kɛnɛ rɛw, kä ci lo̱ckiɛn baath.

⁶ Kä cukɛ Kuoth Nhial cɔl kɛ rikiɛn, kä cuɛ kɛ kän rɛy cucädiɛn,

⁷ cuɛ kɛ bo̱th kɛ duɔ̱ɔ̱p mi cuŋ, cu mäni mëë cikɛ cop wi̱c mi deekɛ cieŋ thi̱n.

⁸ Akɛ la̱r kɛ Kuoth Nhial tɛ̈th lɔaac kɛ kui̱ nho̱kädɛ min thil pek, kɛnɛ kui̱ lätnikɛ tin ga̱ykɛ naath kɛ kui̱ nath.

⁹ Kɛ ɣöö cɛ ram mi näk rɛw ɛ kayŋua̱a̱k, kä cɛ ram mi näk buɔthɛ riäŋ kɛ ti gɔw.

¹⁰ Kä tha̱a̱ŋ nath nyuurkɛ rɛy muɔ̱th mi col, kä nɛy tin ca yian cuckɛ kɛ kuatni ciikni,

¹¹ kɛ ɣöö cikɛ ruac Kuɔth Nhial lo̱k, kä cikɛ luek Kuɔth in Di̱t ni Jɛn lo̱k.

¹² Kä cuɛ kɛ jak kä cuc kɛ la̱t mi bɛc bɛc, la raan a tɛth kä thilɛ ram mi luäk jɛ.

¹³ Kä cukɛ Kuoth Nhial cɔl kɛ rikiɛn, kä cuɛ kɛ kän rɛy cucädiɛn.

¹⁴ Kä cu Kuoth kɛ ka̱m raar rɛy muɔ̱th mi col, kä cuɛ yieynikiɛn puɔ̱t.

¹⁵ Akɛ la̱rkɛ Kuoth Nhial tɛ̈th lɔaac kɛ kui̱ nho̱kädɛ min thil pek, kɛnɛ kui̱ lätnikɛ tin ga̱ykɛ naath kɛ kui̱ nath.

¹⁶ Kä cuɛ thiekni cikä min yian töl, kä cuɛ gääkni ladiitdä ŋuɔ̱k.

¹⁷ Tha̱a̱ŋ nath te dɔ̱a̱a̱r cuckɛ kɛ kui̱ lätnikiɛn tin jiäk, kɛ kui̱ nyuɔɔnikiɛn ɛ jɛn moockɛ ti bɛ̈c bɛ̈ɛ̈c ɔ,

¹⁸ kä thil ɛ mi̱eth mi go̱o̱r kɛn mi̱ethdɛ, ci thia̱k nikɛn kɛ lia̱a̱.

¹⁹ Kä cukɛ Kuoth Nhial cɔl kɛ rikiɛn, kä cuɛ kɛ kän rɛy cucädiɛn,

²⁰ kä cu Kuoth ruacdɛ jäkä raar kä cuɛ kɛ jakä gɔaa, kä cuɛ kɛ kän rɛy däkä.

²¹ Akɛ la̱r kɛ Kuoth Nhial tɛ̈th lɔaac kɛ kui̱ nho̱kädɛ min thil pek, kɛnɛ kui̱ lätnikɛ tin ga̱ykɛ naath kɛ kui̱ nath.

²² Kä akɛ thöpkɛ muc tɛthä lɔaac, kä latdɛ lätkɛ kɛ ket din kɛ tɛ̈th lɔaac.

²³ Kä cu tha̱a̱ŋ nath wä rɛy baar kɛ babuuri, lätkɛn la̱t rɛy baar in di̱i̱t,

²⁴ cukɛ lät Kuɔth Nhial nɛn, lätkɛ tin ga̱ykɛ naath rɛy baar.

²⁵ Kä cuɛ ruac lat cu jiɔam mi di̱i̱t puɔ̱t, min cu muaŋ baar jiac ni pua̱a̱r.

²⁶ Kä cuɛ babuuri kap ni nhial, kä cuɛ kɛ luɔc ni piny baar. Cu naath rɔ̱ cu luär kɛ riɛk in cikɛ jek,

²⁷ cukɛ riääth kä cukɛ tëth ce̱tkɛ nɛy ti ci yɔ̱ŋ kɛ kɔaŋ, kä cu ŋäcdiɛn cua̱ baŋ.

²⁸ Kä cukɛ Kuoth Nhial cɔl kɛ rikiɛn, kä cuɛ kɛ kän ka̱m raar rɛy cucädiɛn,

²⁹ cuɛ jiɔam ka̱p cuɔ̱ŋ, kä cu muaŋ baar cu biɛt.

³⁰ Kä cu lo̱ckiɛn tɛɛth mëë ci jiɔam kɛnɛ muaŋ biɛt, kä cu Kuoth kɛ nööŋ thok waath guäth in go̱o̱r kɛn wä thi̱n.

³¹ Akɛ la̱rkɛ Kuoth Nhial tɛ̈th lɔaac kɛ kui̱ nho̱kädɛ min thil pek, kɛnɛ kui̱ lätnikɛ tin ga̱ykɛ naath kɛ kui̱ nath.

³² Akɛ liakɛ jɛ rɛy dolä nath, kä a jɛ puanykɛ rɛy matdä nɛɛni tin di̱t.

³³ Kä jɛn Kuoth Nhial la locɛ kiɛr ɛla dɔr, kä la locɛ wäŋ pi̱i̱ni piny mi ci ba̱k,

³⁴ kä locɛ mun ciɛkä bɛɛl kä mun milɛkä mi luɔ̱t, kɛ kui̱ nyuɔɔni nɛɛni tin cieŋ thi̱n.

³⁵ Kä duundɛ ɣöö la locɛ där dɔaar mi luɔ̱t pul pi̱i̱ni, kä jakɛ mun mi kööt kä waŋ pi̱i̱ni.

³⁶ Kä ɛn wani cuɛ nɛy tin näk buɔthkɛ naŋ thi̱n, kä cukɛ wec mi bikɛ cieŋ thi̱n la̱t.

³⁷ Cukɛ ka̱a̱k pith kä cukɛ ka̱a̱k wal kɛ kui̱ kɔaŋ pith, kä cukɛ dɛy ti ŋuan kuir.

³⁸ Kɛ puɔ̱th Kuɔth Nhial cukɛ rɔ̱ rep ɛlɔ̱ŋ, kä /ci ɣɔ̱ɔ̱kiɛn bi met kuɛ̈ɛ̈.

³⁹ Kä mi ci pekdiɛn kuɛ̈ɛ̈ ɛ cikɛ tuil, kɛ kui̱ yaakä kɛnɛ rik kɛ jiath lɔaac,

⁴⁰ la Kuoth kɛ la ɣɔɔr kä nɛy tin yɔaŋkɛ kɛ, lakɛ a jakɛ kä yi̱c rɛy dɔaar mi luɔ̱t mi thil duɔ̱ɔ̱p.

⁴¹ Duundɛ ɣöö, la kämɛ can raar kä nɛy tin yakɛ kɛ, kä la jakɛ dho̱rkiɛn kä rëpkɛ rɔ̱ ce̱tnikɛ det.

⁴² Kä mi ci ji̱ cuŋni nɔmɔ nɛn la lo̱ckiɛn cua̱ tɛ̈th, duundɛ ɣöö la ji̱ nyuɔɔni diaal cua̱ bit.

⁴³ Kä ɛ nɛy diaal tin pɛl tiɛtkɛ ŋɔak ti̱ti̱, kä carɛ nhök Kuɔth Nhial in thil pek.