Diit 106 - RUAC KUƆTH IN RƐL RƆ

Lat ji̱ I-thɛ-rɛl kɛ dueerkiɛn

¹ Liakɛ Kuoth Nhial, la̱rɛ Kuoth Nhial tɛ̈th lɔaac, kɛ kui̱ gɔɔyädɛ, kɛ ɣöö nhökdɛ min thil pek ɛ do̱raar!

² Kä ɛŋa mi de̱e̱ lät Kuoth Nhial tin bum lat, kiɛ de̱e̱ liakdɛ kɛɛliw nyoth?

³ Puɔ̱th akɛ nɛy tin tiɛtkɛ thuɔ̱ɔ̱k, tin la̱tkɛ ni cuŋ gua̱thni diaal.

⁴ Tim ɣä lö Kuoth Nhial, mi wi̱i̱ nɛɛku wä nyuɔ̱th nhök, kä luäk ɣä mi wi̱i̱kɛ wä kän,

⁵ kɛ ɣöö dëë gɔɔy ciɛŋä nɛɛniku tin ci mɛk nɛn, kɛ ɣöö de̱e̱ lɔcdä tɛɛth kɛ gɔɔy lɔaac dööru, dëë rɔ ma̱t nɛɛku tin gɔw lo̱ckiɛn.

⁶ Kɔn kɛ gua̱a̱rikɔ cakɔ duer, kɔn cakɔ ti jiäk la̱t, cakɔ nyuɔɔn ti di̱t la̱t.

⁷ Gua̱a̱rikɔ mëë tekɛ kä I-jëp, /kenkɛ lätku tin ga̱ykɛ naath tit, kä /kenkɛ nhökdu min thil pek tim. Cu kɛ luɔ̱c ni rɔ̱ Kuoth in Di̱t ni Jɛn Bar in Tidh.

⁸ Kä cuɛ ŋot kɛ mi käänɛ kɛ kɛ kui̱ cio̱tädɛ, kɛ ɣöö bɛ buɔ̱mdɛ min di̱i̱t nyoth.

⁹ Kä cuɛ Bar in Tidh la̱r ri̱et kä cuɛ kööt, kä cuɛ kɛ bo̱th kɛ där yiëër ce̱tdɛ kɛ mi ɛ där dɔaar.

¹⁰ Kä cuɛ kɛ kän kä gua̱n tɛ̈r, kä cuɛ kɛ ka̱m raar rɛy bumä gua̱n tɛ̈r.

¹¹ Kä cu pi̱ ji̱ tɛ̈riɛn muɔy, kä cuɛ thil ram kɛl kä kɛ mi cu kään.

¹² Kä cukɛ rieetkɛ ŋäth, kä cukɛ jɛ liak kɛ diit.

¹³ Duundɛ ɣöö cukɛ lätkɛ pa̱l ruëëc kɛ pɛ̈th, kä /kenkɛ luekdɛ lɛ lip.

¹⁴ Kä cukɛ mi̱eth go̱r däär dɔaar, cukɛ Kuoth ɣɔ̱n däär dɔaar.

¹⁵ Kä cuɛ kɛ ka̱m tëë diaal tëë cikɛn kɛ thi̱ec. Duundɛ ɣöö cuɛ kɛ jäkä juey mi jiäk.

¹⁶ Kä cukɛ tekɛ tiɛɛl kɛ Muthɛ rɛy wec kɛnɛ Ä-ron, raan Kuɔth Nhial in rɛl rɔ.

¹⁷ Kä cu piny rɔ lɛp, kä cuɛ Da-tan roc, kä cuɛ buɔ̱n Ä-bi-ram kuɔ̱m piny.

¹⁸ Kä cu mac päl raar bä rɛy bunädiɛn, kä cu bo̱l maac ji̱ nyuɔɔni waŋ.

¹⁹ Kä cukɛ ruath tha̱a̱k dääpä täth kä Thi-nay, kä cukɛ jɛ pal.

²⁰ Kä cukɛ buɔ̱m Kuɔth luɛl kɛ puɔ̱ny tha̱a̱k mi la laak ni wal.

²¹ Cukɛ Kuoth in la luääkdiɛn pa̱l ruëëc, jɛn ram ëë lät ti buɔ̱m buɔ̱ɔ̱m kä I-jëp,

²² lät tëë ga̱ykɛ naath muun Ɣɛ̈m, kɛn lät tin bum tëë cɛ la̱t Bar in Tidh.

²³ Kɛ kui̱c ɛmɔ cuɛ lat ɛn ɣöö bɛ kɛ däk, kä cu ja̱ŋdɛ ni Muthɛ ben cuɔ̱ŋ nhiamdɛ, kɛ ɣöö bɛ ŋɛ̈ɛ̈ny Kuɔth ben jakä kɔ̱c kä ɣöö bɛ kɛ däk.

²⁴ Kä cukɛ mun in gɔaa cany, kɛ ɣöö thilɛ kɛ ŋa̱th kɛ ruac in ci Kuoth ɛ lar.

²⁵ Kä cu komnikɛn rɛy kɛmɛnikiɛn, kä /kenkɛ Kuoth Nhial luɔ̱th.

²⁶ Kä cuɛ tetdɛ kap nhial kä yaacɛ kɛ, ɛn ɣöö bɛ kɛ jakä li̱w däär dɔaar.

²⁷ Kä bɛ kuaykiɛn cu jakä na̱kɛ ɛ döör, kä bɛ kɛ riaw wi̱i̱ muɔ̱ɔ̱n.

²⁸ Kä cukɛ rɔ̱ mat palä kuɔth baaŋ ni Baal-pɛ-or, kä cukɛ mi̱th kɛ ri̱ŋ mucni tin ca thöp kuth baaŋ,

²⁹ cukɛ Kuoth Nhial jakä ŋɛ̈ɛ̈ny kɛ lätkiɛn, kä cu juey mi di̱i̱t ben rɛydiɛn.

³⁰ Kä cu Pi-nɛ-ɣath ben pal kɛ kui̱diɛn, kä cu juey cu cuɔ̱ŋ.

³¹ Kä cua nɔmɔ cu kuën jɛ ala la̱t cuŋni, rɛy ri̱cni diaal tɔ̱ bi ben tɔ̱ amäni cäŋ kɛl.

³² Kä cukɛ lɔc Kuɔth Nhial jakä jiäk guäth pi̱i̱ni Mɛ-ri-baa, kä cu Muthɛ riɛk jek kɛ kui̱diɛn,

³³ kɛ ɣöö cikɛ Muthɛ jakä ŋɛ̈ɛ̈ny, kä cuɛ cu lat ni rieet ti /kenɛ car.

³⁴ Kä /ken ji̱ I-thɛ-rɛl naath näk ce̱tnikɛ mëë ci Kuoth Nhial ɛ la̱r kɛ,

³⁵ kä duundɛ ɣöö cukɛ liɔmni rɔ̱ kɛ döör tin kɔ̱ŋ, kä cukɛ nyiath ni lätkiɛn.

³⁶ Kä cukɛ Kuth dööri tɔ̱tɔ̱ pal, tëë ci cua dëëpkiɛn.

³⁷ Cukɛ gaatkiɛn kɛnɛ nyieekiɛn thöp kuth jiɛn,

³⁸ kä cukɛ riɛm nɛɛni ti thil bɛ̈l wuɔ̱th piny, riɛm dhɔɔlikiɛn kɛnɛ nyieekiɛn, tëë cikɛn kɛ thöp kuth jiɛn rööl Kɛ-naan, cua mun ya̱r kɛ riɛmdiɛn.

³⁹ Kä inɔ cukɛ rɔ̱ cu ya̱r kɛ lätkiɛn, kä cukɛ cu thil ŋa̱th kɛ Kuoth kɛ kui̱ lätnikiɛn.

⁴⁰ Kä ɛ jɛn cu ŋɛ̈ɛ̈ny Kuɔth cu ben kä nɛɛkɛ, cuɛ cu kɛ̈c ɛlɔ̱ŋ kɛ nyinkɛ,

⁴¹ kä cuɛ kɛ la̱th tetni dööri, kä cua kɛ cu ruac ɛ nɛy tin lo̱k kɛ.

⁴² Kä cu ji̱ tɛ̈riɛn kɛ yak, kä cukɛn kɛ cu la̱th pinydiɛn kɛ buɔ̱mdiɛn.

⁴³ Gua̱thni ti ŋuan la käänɛ kɛ, duundɛ ɣöö la kɛn rɔ̱ la luc jɛ, kä ɛ jɛn cikɛ di̱ŋ ɔ rɛy dueeri.

⁴⁴ Duundɛ ɣöö caarɛ rikiɛn, mi cɛ luliɛn liŋ.

⁴⁵ Kä kɛ kui̱diɛn la tiimɛ mat ruacdɛ, kä la nyuthɛ kɛ kɔ̱a̱c lɔaac, kɛ kui̱ nho̱kädɛ min thil pek.

⁴⁶ Kä la kɛ a jak kä nhɔakɛ, ɛ nɛy tɔ̱ cakɛ pɛc tɔ̱.

⁴⁷ Luäk kɔ lö Kuoth Nhial ni Kuothda, kä ruuli kɔ rɛy dööri, kɛ ɣöö dɔ̱ŋ dëëkɔ ciötdu min rɛl rɔ la̱r tɛ̈th lɔaac, kä dëëkɔ ji̱ liak kɛ tɛ̈th lɔaac.

⁴⁸ A liak tekɛ Kuoth Nhial, ni Kuoth I-thɛ-rɛl, puanyɛ jɛ ɛn täämɛ amäni cäŋ kɛl. Kä a nɛy diaal gamkɛ jɛ i̱, “Inɔnɔ.” Liakɛ Kuoth Nhial!