Diit 105 - RUAC KUƆTH IN RƐL RƆ

Cäät ji̱ I-thɛ-rɛl mi gɔaa

¹ La̱tdɛ Kuoth Nhial tɛ̈th lɔaac, kä palɛ ciötdɛ, kä jakɛ lätkɛ kä ŋa̱ckɛ rɛy dööri.

² Këtdɛ jɛ diit, kä puanyɛ jɛ kɛ diit, latdɛ lätkɛ diaal tin ga̱ykɛ naath.

³ A lo̱ckun tɛth kɛ ɣöö kɛ kɔn nyinkɛ, kä a lo̱ckun tɛth yɛn nɛy tin palkɛ Kuoth Nhial!

⁴ Go̱rɛ Kuoth Nhial kɛnɛ buɔ̱mdɛ go̱rɛ nhiamdɛ a thil pek!

⁵ Kä tiɛmɛ lätkɛ tin ga̱ykɛ naath tëë cɛ la̱t, lätkɛ tin ga̱ykɛ naath kɛnɛ ŋukdɛ kɛ luk,

⁶ lö kuay jäŋädɛ ni A-bɛ-ram, lö gaat Je-kɔb raandɛ mëë cɛ mɛk!

⁷ Jɛn Kuoth Nhial ni Kuothdan lukdɛ tëë wi̱i̱ muɔ̱ɔ̱n kɛɛliw.

⁸ Kä jɛn bɛ mat ruacdɛ tim amäni cäŋ kɛl, ruac ëë cɛ la̱t ri̱c ti bathdɔɔr,

⁹ ɛn mat ruac ëë cɛ lat kɛnɛ A-bɛ-ram, ɛn ya̱c ëë cɛ guɔ̱k Ay-dhɛk.

¹⁰ Mëë cɛ ben lat kɛ Je-kɔb ala ŋut, mëë la mat ruac mi thil pek kɛ I-thɛ-rɛl.

¹¹ Cɛ wee i̱, “Ɣän bä ji̱ ka̱m mun Kɛ-naan ala kui̱du mi rɛɛli.”

¹² Mëë ŋot pekdiɛn kɛ kuɛ̈ɛ̈, mëë kuiy kɛn ɛlɔ̱ŋ kä kɛ ja̱a̱l rɛydɛ,

¹³ mëë yi̱ckɛ kamni dööri, mëë yi̱ckɛ rɛy kuääri,

¹⁴ /kenɛ kɛ pa̱l ɣöö bakɛ ciɛŋ a jiäk, cuɛ kua̱r luek kɛ kui̱diɛn,

¹⁵ wëë i̱, “/Cuarɛ duŋdä min cä mɛk gueer, /cuarɛ gökdä lät kä mi jiääk.”

¹⁶ Kä mëë cɛ buɔth cɔal rɛy wec, kä ci mi̱th diaal thuuk,

¹⁷ cuɛ wut kɛl jäkä nhiam, Jo-thɛp ëë kɔakɛ ce̱tkɛ kuany.

¹⁸ Kä cua ciökɛ moc buɔ̱ɔ̱t kɛ kuat ciikni, kä ca ŋuäkdɛ yiɛn kɛ gäk ladiɛt,

¹⁹ mäni mëë ci ruacdɛ mëë cɛ lat jɔɔc ala thuɔ̱k, kä cu ri̱et Kuɔth Nhial ɛ ka̱m cuɔ̱ɔ̱ŋ.

²⁰ Kä cu kuäär ruac ja̱k kä cua jɛ lony, cu ruëëc nath ɛ jakä luɔnykɛ ɛ lɔr.

²¹ Kä cu kuäär jɛ kuany ala bo̱o̱th dhɔaarɛ, kä cuɛ jakä ruëc kuaknikɛ diaal,

²² cu di̱t ni jɛn kä tha̱a̱ŋ ruëëcni, kä cuɛ cua̱ ŋi̱i̱cdiɛn mi nyuuthkɛ kɛ pɛl.

²³ Kä cu I-thɛ-rɛl ben muun I-jëp, cu Je-kɔb cieŋ muun Ɣɛ̈m ala juɔ̱r.

²⁴ Kä cu Kuoth Nhial nɛɛkɛ jakä repkɛ rɔ̱, kä cu buɔ̱m nikɛn kä ji̱ tɛ̈riɛn.

²⁵ Mëë cuɛ lɔcdɛ ri̱t kɛ ɣöö bɛ nɛɛkɛ lo̱k, kä cuɛ nɛɛkɛ ciɛŋ a jiäk.

²⁶ Kä cuɛ ja̱ŋdɛ ni Muthɛ ja̱k kɛnɛ Ä-ron ëë cɛ kuany.

²⁷ Kä cua nyuuthnikɛ tin ga̱ykɛ naath la̱t rɛydiɛn, cua ti ga̱ykɛ naath la̱t muun Ɣɛ̈m.

²⁸ Kä cu Kuoth muth ja̱k, kä cu wec cuɔl ɛ cuc, duundɛ ɣöö cukɛ ruacdɛ lo̱k.

²⁹ Kä cuɛ pi̱i̱kiɛn loc ni riɛm, kä cuɛ rɛckiɛn jakä li̱w.

³⁰ Kä cu wecdiɛn thia̱ŋ kɛ guëëk, cu mäni duël kua̱rikiɛn.

³¹ Kä cu Kuoth ruac lat, kä cu luaŋ ti ŋuan ben, kä cu bur buur rɛy wecdiɛn thiaŋ kɛɛliw.

³² Kä cuɛ jäk nikɛ kä guiy ala nhiaal mi dɛm, kɛnɛ yiel nhial muundiɛn kɛɛliw.

³³ Kä cuɛ buɔ̱ckiɛn kɛnɛ jiɛn ŋɔ̱a̱p to̱l kä piny, kä cuɛ jiɛn wecdiɛn ciel.

³⁴ Kä mëë ci Kuoth ruac lat cu kɔaryɔamni ti ŋuan ben, kɔaryɔamni ti ŋuan ti /ca luäŋ kɛ kuën,

³⁵ cukɛ tin tɔ̱ɔ̱c diaal cam muundiɛn, kä cua dɛy jiɛnkiɛn diaal cam.

³⁶ Kä cuɛ key diaal näk muundiɛn, key diaal tëë jio̱l cukɛ li̱w.

³⁷ Kä cu Kuoth ji̱ I-thɛ-rɛl böth raar, kä cukɛ ciɛk in bo̱r kɛnɛ da̱a̱p naŋ, kä kɛn diaal puɔl pua̱nykiɛn kä bumkɛ.

³⁸ Kä cu I-jëp lɔcdɛ tɛɛth mëë ci ji̱ I-thɛ-rɛl jiɛn, kɛ ɣöö ci I-jëp dual kɛ ji̱ I-thɛ-rɛl.

³⁹ Kä cu Kuoth nɛɛkɛ kum kɛ pua̱r, kä cuɛ kɛ moc kɛ mac mi mockɛ buay kɛ wäär.

⁴⁰ Kä mëë cikɛ thiec cuɛ kɛ nöŋ kaaŋkuɔ̱ɔ̱tni, kä cuɛ kɛ ro̱ŋ kɛ mi̱eth nhial mi di̱i̱t.

⁴¹ Kä cuɛ päm lɛp cu pi̱w ben raar thi̱n, cukɛ lo̱o̱ny däär dɔaar ce̱tkɛ kir.

⁴² Kä cuɛ ruacdɛ min rɛl gɔɔydɛ rɔ tim, kɛnɛ ja̱ŋdɛ ni A-bɛ-ram.

⁴³ Kä cuɛ nɛɛkɛ nööŋ raar kɛ tɛ̈th lɔaac, kɛn nɛɛkɛ tin cɛ mɛk cukɛ ben kɛ ki̱et.

⁴⁴ Kä cuɛ kɛ ka̱m mun dööri ti kɔ̱kiɛn, kä cukɛ ria̱ŋ nɛɛni kɔ̱kiɛn ka̱n ala duŋdiɛn,

⁴⁵ kɛ ɣöö dɔ̱ŋ ba ciɛŋkɛ tit, kä ba ŋuɔ̱tkɛ käp. Liakɛ Kuoth Nhial!