Diit 104 - RUAC KUƆTH IN RƐL RƆ

Dit kɛ kui̱ Kuɔth in la cääk ɣɔaa

¹ Liak Kuoth Nhial, lö tieeydä. Lö Kuoth Nhial ni Kuothdä ji̱n di̱tdi ɛlɔ̱ŋ. Ji̱n ci rɔ rony kɛ luth kɛnɛ buɔ̱m,

² ci rɔ rith kɛ buay ce̱tdɛ nikɛ bi̱i̱. Kä ji̱n ci pua̱a̱r yiath piny ce̱tnikɛ kɛmɛ,

³ kä ji̱n ci duelu la̱t wi̱i̱ pi̱i̱ni, kä ci pua̱a̱r jakä thurbilu, kä la jäli ni rɛy jiɔam.

⁴ Kä ci jiɔam jak kä jääkdu, kä ci lew mac jak kä läätdu.

⁵ Kä ji̱n ci piny la̱th ni guäthdɛ, kɛ ɣöö thilɛ mi bi jɛ lɛ wany.

⁶ Kä ji̱n ci jɛ kum kɛ pi̱w ce̱tkɛ bi̱i̱, kä cuŋ pi̱w ni wi̱i̱ päämni nhial.

⁷ Kä mɔ ci pi̱w la̱t ruacɔ la barkɛ rɔ̱, kä mɔ ca jɔwdu liŋɔ la ŋɔackɛ jɛ nikɛ wuɔ̱ɔ̱r.

⁸ La lo̱nykɛ wuɔ̱thni päämni lo̱nykɛ piny rɛy löli, wäkɛ guäth in ci mɛk kɛ kui̱diɛn.

⁹ Kä ji̱n ci ke̱y la̱t mi /ci kɛn ɛ bi bäl, kɛ ɣöö /cikɛ piny bilɛ nyɔk kɛ thia̱ŋ.

¹⁰ Kä ci pi̱w cu jakä lo̱nykɛ rɛy täpni, la lo̱nykɛ kɛ kam päämni.

¹¹ Moc kɛn ley dɔaar diaal kɛ pi̱ ma̱th, ala muɔ̱li dɔaar rɛwdiɛn cua̱ thuuk thi̱n.

¹² La lät diit duëlkiɛn gëëkni pi̱i̱ni, bikɛ diit cu kɛt kɛ tɛ̈th lɔaac kari jiɛn.

¹³ La waci pääm dueelu ni nhial, ci piny ro̱ŋ kɛ tin diaal tin ci la̱t.

¹⁴ Ci juaac jakä pith kɛ kui̱ ɣɔ̱ɔ̱k, kɛnɛ juaac ti bi raan kɛ pith, kɛ ɣöö bɛ rɔɔdɛ jëk mi̱eth muun,

¹⁵ kɛnɛ kɔaŋ mi bi raan moc kɛ tɛ̈th lɔaac, kɛ liɛɛth mi bi jɛ moc puath pua̱a̱ny, kɛnɛ mi̱eth mi bi jɛ moc kɛ buɔ̱m pua̱a̱ny.

¹⁶ Kɛn jiɛn Kuɔth Nhial cakɛ wac agɔaa, kɛn jiɛn luɔ̱ɔ̱ri rööl Lɛ-ba-nɔn tëë cɛ pith.

¹⁷ Kä lät diit duëlkiɛn thi̱n kä lät ŋökni duëlkiɛn kari jiɛn luiiyni.

¹⁸ Kä cieŋ de̱t dɔaar wuɔ̱thni päämni tin ba̱r ba̱a̱r, kä kɔ̱a̱k pa̱a̱m ɛ gua̱a̱th tɔ̱wä kunnyikaaŋni.

¹⁹ Curi pay cak kɛ ɣöö bɛ päth da̱a̱k, kä ŋäc cäŋ gua̱a̱th in bɛ kony thi̱n.

²⁰ Curi muth cak min ci cua̱ wäär, la ley dɔaar diaal cua bä raar rɛy ruɔ̱ɔ̱p.

²¹ Kä la loony cua bur min käk kɛ, görkɛ mi̱ethdiɛn kä Kuoth.

²² Kä mɔ ci cäŋ käny ɔ, la kɛn cua loc ruup, bikɛ wä tɔ̱ɔ̱c ɣo̱tnikiɛn.

²³ Kä la wä raan lätnikɛ, kä bɛ lät amäni thiaŋ.

²⁴ Aɣ Kuoth Nhial lätku ŋuankɛ ɛlɔ̱ŋ! Cikɛ la̱t kɛn diaal kɛ pɛl, ci piny thia̱a̱ŋ kɛ tin ci cak.

²⁵ Kä tha̱a̱ŋi mi ɛ bäpdiit di̱tdɛ kä /ca pekdɛ nɛn, kä thiäŋɛ kɛ ŋɔak ti /ca dëë luäŋ kɛ kuën, ŋɔak ti tëk, ti di̱t kɛnɛ tin tɔatni.

²⁶ Kä jäl babuuri thi̱n, kɛnɛ nyaŋ in di̱i̱t in ci cak kɛ ɣöö bɛ cieŋ rɛydɛ.

²⁷ Kɛn ti diaal ti̱ti̱ guɛckɛ ni ji̱, kɛ ɣöö bikɛ moc mi̱eth kɛ gua̱a̱thdɛ.

²⁸ Kä mi cikɛ ka̱m mi̱eth, la cam kɛ jɛ, kä mɔ cikɛ lëp tetku mɔ la ro̱ŋkɛ kɛ ŋɔak diaal ti gɔw.

²⁹ Kä mɔ ci jiɛɛn kä kɛ mɔ, lakɛ cua̱ dual, kä mɔ ci yiëëdiɛn woc ɔ, la li̱wkɛ, kä bikɛ loc tuur.

³⁰ Kä mɔ ci yiëëdu jäkä kɛ mɔ, la kɛn cua nɛy ti ca cak, kä la nyɔki piny kɛ loc gɔɔyädɛ.

³¹ A buay Kuɔth Nhial te thi̱n amäni cäŋ kɛl, kä a lɔc Kuoth Nhial tɛth kɛ lätkɛ,

³² la guicɛ wi̱c muɔ̱ɔ̱n bɛ cu lath, kä mi cɛ pääm thiap lakɛ cua kɛŋ kɛ tol.

³³ Ɣän bä Kuoth Nhial puany kɛ diit min ŋuɔtdä teekä, bä Kuothdä puany kɛ diit kɛ gua̱a̱th in ta̱a̱ te̱e̱kä.

³⁴ Ci lɔcdɛ mal tɛɛth kɛ ditdä ce̱tkɛ mi tɛth lɔcdä, kɛ Kuoth Nhial ɛ.

³⁵ A ji̱ dueeri da̱kɛ wi̱i̱ muɔ̱ɔ̱n, kä ɛ ji̱ nyuɔɔni ku riaw. Liak Kuoth Nhial lö tieeydä. Puɔnyni Kuoth Nhial!