Diit 103 - RUAC KUƆTH IN RƐL RƆ

Liak kɛ kui̱ gɔɔyä Kuɔth

(Dit Dee-bid)

¹ Liak Kuoth Nhial lö tieeydä, ji̱n puɔ̱nydä kɛɛliw, liak ciötdɛ min rɛl gɔɔydɛ rɔ.

² Liak Kuoth Nhial lö tieeydä, kä /cu gɔɔydɛ päl ruëëc.

³ Jɛn pälɛ ɣä dueerkä diaal, kä jakɛ liawkä kä gɔw,

⁴ kä cɛ tëkdä luɛl kɔ̱k, kä cɛ ɣä kum kɛ nhökdɛ min thil pek kɛnɛ kɔ̱a̱c lɔaac.

⁵ Kä jɛn cɛ ɣä ro̱ŋ kɛ ti gɔw, kɛ ɣöö bä kula ŋuɛ̈t mi bum ce̱tnikɛ cuɔɔr.

⁶ Kä Kuoth Nhial bɛ lat ni cuŋ kɛnɛ thuɔ̱ɔ̱k kɛ kui̱ nɛɛni tin yɔaŋkɛ.

⁷ Jɛn cɛ duɔ̱pkɛ nyuɔ̱th Muthɛ, kä cɛ lätkɛ nyuɔ̱th ji̱ I-thɛ-rɛl.

⁸ Kuoth Nhial tëë kɛ kɔ̱a̱c lɔaac kɛnɛ nhök, kuiy ŋɛ̈ɛ̈nydɛ kä thil nhökdɛ pek.

⁹ Kä jɛn /cɛ naath gɔny ni ciaŋ, kä gakdɛ /ciɛ gak mi do̱raar.

¹⁰ /Cɛ nɛy ciɛŋ kɛ ta̱a̱ dueerikɔ, kä /cɛ kɔ culikä ce̱tkɛ ta̱a̱ jiäknikɔ.

¹¹ Ce̱tkɛ mɔ te ni pua̱a̱r nhialɔ kä piny, jɛn Kuoth bä di̱t nhökdɛ kɛ nɛy tin luɔ̱thkɛ jɛ,

¹² ce̱tnikɛ min nɔ̱a̱n nhiam ɣɔaa kɛ jɔk ɣɔaa, cɛ dueerkɔ nɔa̱a̱n ni nɔ kɛ kɔ.

¹³ Ce̱tkɛ min la gua̱n gan a tekɛ kɔ̱a̱c lɔaac kɛ gaatkɛ, bi Kuoth tekɛ kɔ̱a̱c lɔaac inɔ bä kɛ nɛy tin luɔ̱thkɛ jɛ.

¹⁴ Kɛ ɣöö jɛn ŋäcɛ jɛ ca kɔn cak i̱di, jɛn tiimɛ jɛ ɛn ɣöö kɛ kɔn tur.

¹⁵ Kä kɛ ɣöö raan ce̱t tëkdɛ kɛ ta̱a̱ juaacni, la raan a pith ce̱tkɛ gaakni juaacni rɛy ka̱a̱kni.

¹⁶ Kä mɔ ci jiɔam puɔ̱t ɔ, la gaakni cua̱ thil, kä ca gua̱a̱thdiɛn la ŋa̱ckɛ.

¹⁷ Kä nhök Kuɔth Nhial in thil pek, tëëkɛ nɛy tin luɔ̱thkɛ jɛ, kä bi cuŋkɛ te kä gaat gankiɛn.

¹⁸ Kɛ nɛy tin ka̱pkɛ mat ruacdɛ, nɛy tin tiɛtkɛ ɣöö ba ŋuɔ̱tkɛ la̱t.

¹⁹ Kä Kuoth Nhial cɛ kuäärɛ yiath piny puɔ̱ɔ̱rä, kä kuäärɛ ruaacɛ ti diaal.

²⁰ Liakɛ Kuoth Nhial yɛn ja̱a̱kɛ, kä puanyɛ jɛ yɛn nɛy tin bum tin la̱tkɛ la̱tdɛ, yɛn nɛy tin luɔ̱thkɛ ruacdɛ.

²¹ Liakɛ Kuoth Nhial yɛn ji̱ nhial diaal, yɛn nɛy diaal tin la̱tkɛ lätkɛ.

²² Liakɛ Kuoth Nhial yɛn tin diaal tin cɛ cak, puanyɛ jɛ gua̱thni diaal tin ruecɛ thi̱n. Liak Kuoth Nhial, lö tieeydä.