Diit 102 - RUAC KUƆTH IN RƐL RƆ

Pal kɛ kui̱ lua̱k

(Pal ran guäth in cɛ cuuc)

¹ Liŋ palä lö Kuoth Nhial, kä ɛ wieedä cup kä ji̱.

² /Cu rɔɔdu tey kɛ ɣä kɛ cäŋ riknikä. Gäŋni ji̱thdu ɣä, kä loc palä kɛ pɛ̈th mi wa̱a̱ ji̱ wä cɔl.

³ Kɛ ɣöö la ni̱nkä cua̱ thuk ɛ yut ce̱tkɛ tol, kä pɛt cɔ̱wkä ce̱tnikɛ mac.

⁴ Kä lɔcdä cɛ ŋɛ̈ɛ̈r ɛ cɛ kööt ce̱tnikɛ juaac, a cä pa̱l ni mi̱eth ruëëc.

⁵ Kä kɛ kui̱ jiɛthä lɔaacdä, ci puɔ̱nydä thuuk ɛ ci duɔth ni guɔ̱p puɔ̱ɔ̱ny cɔ̱ɔ̱nikä.

⁶ Ɣän cä pa̱a̱r nikɛ manliɛɛth dɔaar, kiɛ manliɛɛth mi te rɛy dɔaar mi thil naath.

⁷ Ɣän la tɔa̱a̱cä kä /ca ɣä nin, ɣän cä ce̱tnikɛ dit mi te kä rɔaadɛ wi̱i̱ duëël nhial.

⁸ Ku ji̱ tɛ̈rä kuëth ni ɣä kɛ cäŋ kɛɛliw, kɛn nɛy tin lɛ̈ŋkɛ ɣä, ku kɛn ciötdä lɛ jakä duŋ lamä.

⁹ Ci mi̱ethdä cua ni ŋɛ̈th in pa̱rä thi̱n, kä liɔm pi̱i̱kä tin maathä rɔ̱ kɛ merkä,

¹⁰ kɛ kui̱ ŋɛnyädu kɛ ɣöö curi ɣä kap nhial kä curi ɣä yuɔr raar.

¹¹ Ni̱nkä ce̱tkɛ nikɛ ti̱eep thiaŋ, cä cu kööt ce̱tkɛ juaac.

¹² Duundɛ ɣöö ji̱n Kuoth Nhial ti̱i̱ nyuurä wi̱c kɔamdu amäni cäŋ kɛl, kä ciötdu te rɛy ri̱cni diaal.

¹³ Ji̱n bi jiɛɛn kä bi kɔ̱a̱c lɔaac nyuɔ̱th Dha-yɔn, kɛ ɣöö ɛ gua̱a̱th mi bi nyuth ni jɛ nhök, ci gua̱a̱th in thuɔ̱k ben.

¹⁴ Kɛ ɣöö päämkɛ gɔwkɛ kä ja̱a̱ŋku nhɔk kɛn ɛ amäni tupdɛ.

¹⁵ Kä bi döör diaal ciöt Kuɔth Nhial luɔ̱th, kä ba buɔ̱mdɛ luɔ̱th ɛ kua̱r wec muɔ̱ɔ̱n diaal.

¹⁶ Kɛ ɣöö bi Kuɔth Nhial Dha-yɔn nyɔk kɛ ta̱th, jɛn bi buɔ̱mdɛ jɔɔc ɛn wi̱ni.

¹⁷ Bɛ pal nɛɛni tin cuc liŋ, /cɛ paliɛn bi dhɔt.

¹⁸ Ɛ nɛmɛ gɔ̱a̱rkɛ piny kɛ kui̱ ri̱cä mɔ bi ben ɔ, kɛ ɣöö bi nɛy tɔ ka̱n ni cak tɔ̱ Kuoth Nhial liak!

¹⁹ Kuoth Nhial guicɛ ni luaakdɛ mi rɛl gɔɔydɛ rɔ, ɛn Kuoth Nhial guicɛ ɣɔw ni nhial,

²⁰ kɛ ɣöö bɛ wiee nɛɛni tin ca yian liŋ, kä bɛ nɛy tin ca kum kɛ lia̱a̱ lony.

²¹ Kä ba ciöt Kuɔth Nhial lat kä Dha-yɔn, kä ba jɛ liak kä Jɛ-ru-tha-lɛm,

²² mi wä döör diaal kɛnɛ kuääri rɔ̱ mat kɛɛl, kɛ ɣöö ba Kuoth Nhial pal.

²³ Ci Kuoth ɣä jak kä thil lua̱ŋ ɛ ŋuɔtdä kɛ ŋuɛɛt, cɛ ni̱n teekädä jak kä ciɛk.

²⁴ Kä cua̱ wee i̱, “Aɣ Kuothdä /cu ɣä naŋ ɛ ŋot ni̱n teekädä, ji̱n ram in thuuk ni̱n teekädu ri̱c diaal.”

²⁵ Ni mëëdan ɛ ji̱n ɛ nëë cak piny, kä pua̱a̱r lätdɛ ji̱n kɛ tetku.

²⁶ Kä kɛn bikɛ nuɔɔr kä ji̱n bi ŋot thi̱n, kɛn diaal bikɛ da̱k ce̱tnikɛ bi̱i̱. Kä ji̱n bikɛ wäny ce̱tnikɛ bi̱i̱, kä bikɛ cu thil.

²⁷ Kä duundɛ ɣöö ba jɛn ta̱du, kä run teekädu thilɛ kɛ pek.

²⁸ Kä bi gaat ja̱a̱ŋniku cieŋ kɛ mal, kä bi kuaykiɛn piith ni nhiamdu.