Diit 10 - RUAC KUƆTH IN RƐL RƆ

Pal kɛ kui̱ luɔ̱k mi cuɔ̱ɔ̱ŋ

(Dit Dee-bid)

¹ Ɛŋu mɔ ci rɔ nɔa̱a̱n ɔ lö Kuoth Nhial? Ɛŋu mɔ ci rɔ tɛ̱̈ɛ̱̈ ɔ guäth in ta̱a̱ kɛ riɛk?

² Kɛ ciaŋ jiääk la yɔŋ gua̱n nyuɔɔni ram mi can. Akɛ kua käp ɛ lätkiɛn tin ci kɛn kɛ la̱t.

³ Kɛ ɣöö ji̱ nyuɔɔni la liakɛ ni rɔ̱ kɛ cär lo̱cnikiɛn, la nhɔakɛ ni nyin ɣɔaa lökɛ Kuoth Nhial.

⁴ Kä ji̱ dueeri la liakɛ ni rɔ̱, kä lökɛ Kuoth. Cärkiɛn diaal la latkɛ ni ɣöö thil ɣɔw Kuoth.

⁵ La gɔw ŋɔak diaal kä kɛ gua̱thni diaal, nɔ̱a̱n ŋuɔ̱tku kɛ cärkiɛn ɛlɔ̱ŋ la kɛn ji̱ tɛ̈riɛn a yɔŋ.

⁶ Kä ruackɛ kɛ lo̱ckiɛn wäkɛ i̱, “Kɔn /cakɔ bi pɛ̈ɛ̈n, kä /cakɔ bi tekɛ riɛk ni̱nikɔ rɛy ri̱cni diaal.”

⁷ Kä thokdiɛn te ni bit kɛnɛ mɛ̈ɛ̈t kɛ yiöŋ nath thi̱n, kä lat lɛpdiɛn ni kac kɛnɛ nyuɔɔn.

⁸ Kä la pa̱thkɛ ni ja̱a̱l duɔ̱pni rɛy wec, kä näkɛn nɛy tin can gua̱thni tin cuɔl cuɔɔl. La tiɛtkɛ ni nɛy tin thil lua̱ŋ.

⁹ La bi̱emkɛ naath tɔ̱ɔ̱cä ce̱tnikɛ lony, li̱p kɛ kɛ ɣöö ba can kulɛ käp. La guɛckɛ can kä ba jɛ käp kɛ cambakdiɛn.

¹⁰ Kä la kɛn can a to̱l kä piny, la kɛn kɛ a kui̱r kä piny kɛ buɔ̱m.

¹¹ Kä bikɛ cu ca̱r kɛ lo̱ckiɛn wäkɛ i̱, “Ci Kuoth ɛ pa̱l ruëëc /cɛ min tuɔɔk lɛ nɛn.”

¹² Bër lö Kuoth Nhial, kapni tetdu nhial lö Kuoth, /cu ram mi cuc lɛ pa̱l ruëëc.

¹³ Kä ɛŋu mɔ la gua̱n dueeri Kuoth a lo̱k ɔ, kä ruac ɛ kɛ lɔcdɛ wëë i̱, “/Ci Kuoth ɣä bi luk”?

¹⁴ Duundɛ ɣöö la nɛɛni riɛk lö Kuoth Nhial, la ŋäci jɛ kä bi jɛ käp kɛ tetdu, kɛ ɣöö la käp can rɔ ka ji̱, kä ɛ ji̱n gääŋ rɛ̈tni.

¹⁵ Woc buɔ̱m ji̱ nyuɔɔni kɛnɛ la̱a̱t jiäkni, woc nyuɔɔnkiɛn diaal amäni mi cikɛ thuɔ̱k.

¹⁶ Kuoth Nhial ɛ kuäär mi do̱raar, kä bɛ ji̱ wi̱i̱ni tin /ca jɛ pal riaw muundɛ.

¹⁷ Ci min go̱r can ɛ liŋ lö Kuoth Nhial, ku kɛ bum kä liŋ wieediɛn.

¹⁸ Kämni rɛ̈tni kɛnɛ nɛy tin yɔaŋkɛ cuɔ̱ɔ̱ŋdiɛn, kɛ ɣöö /ci ji̱ nyuɔɔni ti la ji̱ ɣɔaa ti duɛ̈k kɛ bilɛ nyɔk kɛ jak kä dual.