Dhɛp 2 - RUAC KUƆTH IN RƐL RƆ

Thiec kɛ luny kä Kuoth

¹ Matdɛ rɔ̱ guäth kɛl lö do̱r mi thil pöc,

² a /ken yɛn ni li̱w, ce̱tkɛ gaak juacä, a /ken kɛ̈c lɔaac Kuɔth Nhial ni ben kä yɛ, a /ken cäŋ gaak Kuɔth Nhial ni ben kä yɛ.

³ Go̱rɛ Kuoth Nhial yɛn nɛy diaal tin mua̱l mua̱a̱l wi̱i̱ muɔ̱ɔ̱n, tin luɔ̱thkɛ ruaacnikɛ. Thiec cuɔ̱ɔ̱ŋ kɛnɛ kɔ̱a̱c, dɔ̱ŋ ba ji̱ gaŋ kɛ cäŋ kɛcä lɔaac Kuɔth Nhial.

Luk ji̱ thieekä ji̱ I-thɛ-rɛl

⁴ Bɛ thil ram mi bi duɔth kä Gadha, kä ba Ac-kɛ-lon päl. Kä ba ji̱ Ac-dod juɔc raar, kä ba ji̱ Ɛk-ron woc wi̱i̱diɛn.

⁵ Riɛk akɛ yɛn nɛy tin cieŋ thok yiëër, yɛn do̱r ji̱ Kɛ-reth! Gak Kuɔth Nhial akɛ yɛ lö ji̱ Kɛ-naan, mun ji̱ Pi-li-thɛt. Kä bɛ yɛ däk amäni mi cɛ thil ram mi doth.

⁶ Kä bi mundun in te thok yiëër, a gua̱a̱th ji̱ yien deet kɛnɛ kal deet.

⁷ Kä bi mun thuɔk yiëër a duŋ ji̱ dhɔaar Juda tin ci duɔth, ba gua̱a̱th la̱k, kä kɛ thiaŋ bikɛ la tɔ̱ɔ̱c kä Ac-kɛ-lon, kä bi Kuoth Nhial Kuothdiɛn kɛ tit, kä bɛ kɛ luɔ̱c mundiɛn.

⁸ “Ɣän cä kuethni ji̱ Mo-ab kɛnɛ ji̱ A-mon liŋ, tin kueth kɛnkɛ ni nɛɛkä, kä dua̱ckɛ kɛ dual muundiɛn.”

⁹ Kä cu Kuoth Nhial in la Ruey Ɣɔaa, Kuoth I-thɛ-rɛl wee i̱, “Ɣän cä yac i̱ bä Mo-ab jak kä ce̱tkɛ Thɔ-dɔm, kä bä A-mon jak kä ce̱tkɛ Go-mo-ra, a ba gua̱a̱th korwaayä kɛnɛ milɛ, ba dɔr amäni cäŋ kɛl. Kä bakɛ pɛc ɛ duɔth nɛɛnikä, a bi nɛɛkä tin ŋot kɛ tëk mundiɛn ka̱n.”

¹⁰ Kä bi nɔmɔ a duŋdiɛn mi bä ka̱m kɛ ala duŋ liakädiɛn, kɛ kui̱ kä ɣöö ca nɛɛ Kuɔth Nhial in la Ruey Ɣɔaa kuëth kä cakɛ dɔl.

¹¹ Kä bi Kuoth Nhial rɔ̱ɔ̱th kɛ kɛ, mi wëë kuth wec muɔ̱ɔ̱n diaal wä däk, kä ba jɛ pal ɛ döör diaal, bi ramɔ jɛ pal gua̱a̱thdɛ.

¹² Kä yɛn bä lö ji̱ Kuc, bä yɛ näk.

¹³ Kä bi Kuoth Nhial A-thi-ri-ya däk kɛ buɔ̱mdɛ. Kä bɛ Ni-nɛ-be ba̱ny piny ni baaŋ, ala mi day ce̱tnikɛ dɔr mi luɔ̱t.

¹⁴ Kä ba gua̱a̱th tɔ̱ɔ̱cä leeyni diaal, kä bi cuɔɔr kɛnɛ rumciduaar cieŋ rɛydɛ. Kä bi gumut wiee wernyinikɛ, kä bi jakɔ̱k ciɛŋ ni rɛydɛ, kɛ ɣöö ci duɔth ni jiɛn gua̱a̱thdɛ.

¹⁵ Ɛn nɔmɔ ba jɛn ta̱a̱ wec mi liak rɔ, cieŋɛ kɛ mal, kä laarɛ jɛ i̱, “Ɛ ni ɣän kä rɔa thilɛ ram mi dɔ̱ŋ.” Kä ɛ da̱k mi tëë di tekɛ jɛ mi, ba ni gua̱a̱th lɔ̱ŋä leeyni! Kä nɛy diaal tɔ̱ bi rët kɛ jɛ tɔ̱ bikɛ ga̱a̱c ɛlɔ̱ŋ a ba wuɔ̱thkiɛn tiŋ.