Dhɛp 1 - RUAC KUƆTH IN RƐL RƆ

¹ Nɛmɛ ɛ ruac Kuɔth Nhial ëë ci ben kä Dhɛ-pɛ̈n-yaa gat Kuci gat Gɛ-dɛ̈l-yaa gat Ä-mɛ̈r-yaa gat Ɣidh-ki-yaa mëë ruec ni Yo-ci-yaa gat A-mon kuäär Juda.

Cäŋ luɔ̱k Kuɔth Nhial

² Kä cu Kuoth Nhial wee i̱, “Ɣän bä ti diaal poc wi̱i̱ muɔ̱ɔ̱n.”

³ Kä cuɛ wee i̱, “Ɣän bä naath kɛnɛ ley woc. Kä bä diit nhial kɛnɛ rɛc yiëër woc. Kä bä ji̱ dueeri woc. Kä bä kuɛ̈ɛ̈ ran thuk wi̱i̱ muɔ̱ɔ̱n.

⁴ Kä ɣän bä ji̱ Juda duäc, kɛnɛ ji̱ Jɛ-ru-tha-lɛm diaal. Kä bä duɔth nɛɛni tin palkɛ kuoth Baal däk ɛn wa̱nɛ, kɛ ciööt bööthni palä tin, la palkɛ jɛ.

⁵ Kä bä nɛy tin la palkɛ nyin nhial wi̱i̱ duëël, nɛy tin palkɛ ɣä kä yackɛ rɔ kɛ ciötdä, kä ŋotkɛ kɛ mi yackɛ rɔ̱ kɛ ciöt Mo-lɛk däk.

⁶ Kɛ nɛy tin ci rɔ̱ ri̱et jɔk kɔɔrä, kɛ nɛy tin /ci bä kä ɣä, kä /ca ɣä thiec.”

⁷ Päli rɔ piny nhiam Kua̱r ni Kuoth Nhial! Kɛ ɣöö ci cäŋ Kuɔth Nhial thia̱k. Ɣän Kuoth Nhial cä muc rialikä, kä cuɛ ja̱a̱lkɛ tin cɛ cɔl jakä lɛ̈y lɛ̈y.

⁸ Kä ɛn cäŋ mucädä ɛmɔ “Ɣän bä bööth kɛnɛ gaat kua̱ri duäc, kɛ nɛy diaal tin la̱tkɛ nyin ciɛŋni juri.

⁹ Ɛn cäŋ ɛmɔ ɣän bä nɛy diaal tin palkɛ kuth kɔ̱kiɛn, tin thia̱ŋkɛ duël kuthnikiɛn kɛ ti ma̱a̱ckɛ kɛnɛ tin pɛ̈ckɛ däk.”

¹⁰ Kä cu Kuoth Nhial wee i̱, “Ɛn cäŋ ɛmɔ, bia wiee liŋ thok in la Thok Rɛc, kä bia lul liŋ guäth in pay la̱t kä Jɛ-ru-tha-lɛm, kɛ jɔw mi di̱i̱t wi̱i̱ päämni.

¹¹ Kä wieeɛ yɛn nɛy tin cieŋ rɛy ciëëŋni, kɛ ɣöö bi nɛy tin la kɔakɛ kuak li̱w, kɛn tin diaal tin kɔakɛ, ciɛk in bo̱r kɛnɛ da̱a̱p.

¹² Ɛn guäth ɛmɔ ɣän bä Jɛ-ru-tha-lɛm go̱r kɛ lɛmbärni, kä bä nɛy tin ci ro̱ŋ kä cärkɛ kɛ lo̱ckiɛn i̱, ‘Thilɛ mi gɔaa kiɛ mi jiääk mi bi Kuoth Nhial ɛ la̱t.’

¹³ Ba kuakiɛn pɛc kä ba dho̱rkiɛn däk. A cäŋ ni mɔ cikɛ duël la̱t ɔ, /cikɛ bi cieŋ thi̱n. A cäŋ ba ka̱a̱k wal kɛ kui̱ kɔaŋ pith, /cikɛ kɔaŋdiɛn bi math.”

¹⁴ Cäŋ Kuɔth Nhial in di̱i̱t cɛ thia̱k, ɛ thia̱k ɛlɔ̱ŋ, kä bëë kɛ kɛ pɛ̈th. Bi wiee bɛ̈c ɛlɔ̱ŋ kɛ cäŋ Kuɔth Nhial, bi wääth wiee kɛ jɔw mi di̱i̱t ɛn wi̱ni.

¹⁵ Ba cäŋ gaak ɛn cäŋ ɛmɔ, ɛ cäŋ rikä mi bɛc bɛc, ɛ cäŋ däkä, cäŋ muɔ̱th cäŋ lieth, ɛ cäŋ wunä mi col.

¹⁶ Ɛ cäŋ kuthä kaaŋä kɛnɛ köök köör wi̱i̱ni tin buɔ̱m buɔ̱ɔ̱m, kɛnɛ duël tin te biɛɛni.

¹⁷ Kä bä naath miɛɛt, a bikɛ ja̱l ce̱tnikɛ ciöör, kɛ ɣöö cikɛ ɣä duer duer. Kä ba riɛmdiɛn wuɔ̱th piny ce̱tnikɛ tup, kä ba ri̱ŋdiɛn yiäk ce̱tnikɛ waw.

¹⁸ Kä /ci ciɛkdiɛn in bo̱r kɛnɛ da̱a̱pdiɛn kɛ bi kän, kɛ cäŋ kɛcä Kuɔth Nhial. Kä bi wi̱c muɔ̱ɔ̱n kɛɛliw da̱k kɛ mac kɛckä lɔaacdɛ. Kä bi guut cu ben inɔ, kä nɛy diaal tin tëk wi̱i̱ muɔ̱ɔ̱n.