Dhɛk 9 - RUAC KUƆTH IN RƐL RƆ

Luk ji̱ tɛ̈r ji̱ I-thɛ-rɛl

¹ Kä cu nɛmɛ a ruac Kuɔth Nhial kɛ kui̱ wec Ɣad-rak kɛnɛ Da-math-kɛth, kɛ ɣöö wäŋ ji̱ Ä-ram kɛnɛ thuk duëli I-thɛ-rɛl diaal guɛckɛ ni Kuoth Nhial.

² Amäni Ä-math min te këth Ɣad-rak, a wä ni kä Dhor kɛnɛ Dhi-don, cäŋ ni min tekɛ ŋäc mi di̱i̱t.

³ Kä cu ji̱ Dhor rɔ̱ ta̱th ti̱ec ti buɔ̱m buɔ̱ɔ̱m, kä cikɛ ciɛk in bo̱r dol ce̱tdɛ nikɛ di̱r tupä, kɛ da̱a̱p mi ce̱tnikɛ tuäk duɔ̱p.

⁴ Duundɛ ɣöö bi Kuäär ni Kuoth nyinkɛ diaal woc kä jɛ, kä bɛ ria̱ŋdɛ yuɔr rɛy yiëër, kä ba jɛ cu waŋ ɛ mac.

⁵ Kä bi ji̱ Ac-kɛ-lon ɛ nɛn, kä bikɛ cu dual. Amäni ji̱ Gadha, bikɛ cuuc kɛ bɛ̈c. Kä bi ji̱ Ɛk-ron ŋa̱thdiɛn cu ria̱r, kä bi Gadha kuäärɛ cu bath, kä /ca Ac-kɛ-lon bilɛ ciɛŋ.

⁶ Kä ba Ac-dod ciɛŋ ɛ nɛy ti kɔ̱ŋ, kä bä liak ji̱ Pi-li-thɛt cu moc pëk.

⁷ Kä cäkɛ bilɛ jak kä camkɛ riŋ a te riɛmdɛ thi̱n, mi̱eth in ca yac bä woc kä kɛ. Kä kɛn tin ci duɔth, bikɛ cua̱ nɛɛkä, bikɛ ce̱tkɛ thok duëël kä Juda. Kä bi ji̱ Ɛk-ron ce̱tkɛ ji̱ Yɛ-buth.

⁸ Kä ɣän bä cu cieŋ luaakdä ce̱tkɛ gääŋ, kä bɛ cu thil ram mi bi wä kɛ jɛ kiɛ mi bi ben thi̱n. Kä thilɛ ram mi bi nɛɛkä lɛ nyɔk kɛ ciëŋ a jiäk, kɛ ɣöö ɣän cä cuɔ̱c nɛɛnikä nɛn kɛ nyinkä.

Kuäär Dha-yɔn mi bi ben

⁹ A lɔcdu tɛth, lö nya Dha-yɔn! Kä a rɔal ni ji̱n, lö nya Jɛ-ru-tha-lɛm! Nɛnɛ, kuääru a bëë kä ji̱ ni. Jɛn ɛ cuɔ̱ŋ kä cɛ naath joc, jɛn muɔ̱lɛ kä cɛ kɔt kɛ muul, tëë jɔɔk ruath muɔ̱l.

¹⁰ Kä ɣän bä thurbiɛɛli woc kä Ɛ-pa-rim, kä bä jiöŋkööri woc kä Jɛ-ru-tha-lɛm. Kä bä bääri köör töl, kä bɛ la̱t ni dör mal. Kä bɛ ruecdɛ ka̱n ni yieer a wä ni yieer, kä bɛ lɛ ka̱n ni kiir amäni pek ɣɔaa.

Luuc nɛɛni Kuɔth Nhial jɔk

¹¹ Kä cu Kuoth Nhial wee, kɛ kui̱ riɛm matdä ruacdä kɛ ji̱, ɣän bä nɛɛku tin ca pɛc lony guäth ɛ dak pi̱kɛ tɔ̱.

¹² Luɔcɛ rɛy duëlikun tin buɔ̱m buɔ̱ɔ̱m lö pɛ̈ɛ̈c ŋäthä. Ɛn walɛ ɣän cä lar ɛn ɣöö bä yɛ luɔ̱ɔ̱c jɔk nikä rɛɛw.

¹³ Ɣän bä Juda jak kä bäärä, kä bä Ɛ-pa-rim jak kä dɔwdɛ. Ɣän cä gaatkun jak kä mut, lö ji̱ Dha-yɔn, kä bikɛ ben nyiëëny kɛ gaatkun lö ji̱ Gɛ-rith, kä cä yɛ jak kä ce̱tkɛ mut wääthä.

¹⁴ Kä bi Kuoth Nhial jɔɔc wi̱i̱ nɛɛnikɛ, kä bɛ bäärɛ yuɔr ce̱tkɛ yiël nhial kä bi Kuäär ni Kuoth Nhial kaaŋ koth, kä bɛ ja̱l kɛ thul kui̱c cuëëc.

¹⁵ Kä bi Kuoth Nhial in la Ruey Ɣɔaa nɛɛkɛ gaŋ, kä bikɛ ji̱ tɛ̈riɛn däk. Kä bikɛ riɛmdiɛn math ce̱tkɛ jiɔam, a bikɛ thia̱a̱ŋ ce̱tkɛ tuɔk, bikɛ lo̱o̱ny ce̱tkɛ riɛm mucni mi ca wuɔc tuɔ̱ŋni yi̱kä.

¹⁶ Ɛn cäŋ ɛ mɔ, bi Kuoth Nhial Kuothdiɛn kɛ kän, ce̱tnikɛ det nɛɛnikɛ, bikɛ riaaw rɛy muɔ̱ɔ̱ndɛ ce̱tkɛ päm kumä mi bil.

¹⁷ Kä bɛ naath kulɛ dir i̱di, kä bi gɔɔydɛ kulɛ ce̱tkɛ ŋu! Kä bi ŋuɛ̈tni piith a bum kɛ bɛlkɛ kɛnɛ kɔaŋdɛ.