Dhɛk 8 - RUAC KUƆTH IN RƐL RƆ

Lär Kuɔth Nhial kɛ luuc Jɛ-ru-tha-lɛm jɔk

¹ Kä cu ruac Kuɔth Nhial in la Ruey Ɣɔaa ben kä ɣä, wëë i̱,

² “Ɣän cä tekɛ tiɛɛl mi di̱i̱t kɛ Dha-yɔn, tiɛɛl mi ci ɣä jak kä gak kɛ kui̱dɛ.

³ Kä cuɛ ruac ɛn ɣöö, ɣän bä loc kä Dha-yɔn, a bä wä cieŋ ni rɛy Jɛ-ru-tha-lɛm, kä ba cɔli wec ŋäthä kä päm Kuɔth Nhial in la Ruey Ɣɔaa, päm in rɛl gɔɔydɛ rɔ.

⁴ Kä cu Kuoth Nhial in la Ruey Ɣɔaa lɛni ruac bä ɛn ɣöö bi dɔŋ wutni kɛnɛ dɔŋ mään tin nhiatkɛ rɔ̱ kɛ to̱ŋ rɔ̱ nyɔk kɛ nyuur duɔ̱pni Jɛ-ru-tha-lɛm.

⁵ Kä bi duɔ̱pkɛ ɛn wec thia̱a̱ŋ kɛ dhɔɔl kɛnɛ nyier ti ŋar thi̱n.

⁶ Kä cuɛ lɛni ruac bä mɔ ba guic ɛ nɛy ti ci duɔth ti ɛn ni̱ni ti̱ti̱ ɛ mi gääy naath, kä jɛn ba mi gääy ɣä bä? Ruac ni ɣän Kuoth Nhial in la Ruey Ɣɔaa.

⁷ Kä cuɛ lar ɛn ɣöö ɣän bä nɛɛkä kän kä wi̱i̱ kuec känyä ca̱ŋ kɛnɛ wi̱i̱ konyä ca̱ŋ.

⁸ Kä bäkɛ cu jak kä cieŋ kä Jɛ-ru-tha-lɛm. Kä bikɛ cua̱ nɛɛkä, bä cua̱ Kuothdiɛn kɛ rɛy ŋäthä kɛnɛ rɛy cuŋni.”

⁹ Kä cu Kuoth Nhial in la Ruey Ɣɔaa wee i̱, “Buɔ̱mɛ rɔ̱, yɛn nɛy tin ci ruac göökni liŋ ɛn ni̱ni ti̱ti̱, mëë yiathkɛ keŋ luaak Kuɔth Nhial in la Ruey Ɣɔaa piny, kɛ ɣöö ba luak Kuɔth Nhial in la Ruey Ɣɔaa la̱t.

¹⁰ Kɛ ɣöö mëë ŋot ni̱n ti̱ti̱ thilɛ raan kök kä thilɛ ley kök, kä thilɛ mal kɛ ram mi ci wä ko̱o̱r kiɛ ci luny wi̱c kä ji̱ tɛ̈rɛ. Kɛ ɣöö cä raan kuɔ̱ɔ̱th kɛnɛ gua̱n thieekädɛ.

¹¹ Kä ɛn täämɛ ɣän /cä duɔth nɛɛni ti̱ti̱ bi la̱t ce̱tkɛ ta̱a̱ ëë wal, ruac ni ɣän Kuoth Nhial in la Ruey Ɣɔaa.

¹² Kä bikɛ pi̱eth kɛ mal. Bi jiɛn dɛykiɛn kui̱r, kä bi mun dɛykɛ rep, kä bi pua̱a̱r nhiaal jak kä dɛm. Kä ɣän bä duɔth nɛɛni ti̱ti̱ ka̱m kɛn ti̱ti̱ diaal.

¹³ Kä ce̱tnikɛ mëë la yɛ a latkɛ ala ka̱a̱ŋ rɛy dööri, yɛn ji̱ Juda yɛnɛ ji̱ I-thɛ-rɛl, ɣän bä yɛ kän kä bia tekɛ puɔ̱th. /Cuarɛ dual, buɔ̱mɛ ni rɔ̱.”

¹⁴ Kä cu Kuoth Nhial in la Ruey Ɣɔaa wee i̱, “Mëë ci guuri ɣä jak kä gak, cua̱ jɛ car ɛn ɣöö bäkɛ lät kä mi jiääk. Kä /ka̱nɛ päl,

¹⁵ kä ɛn täämɛ bä, cä lɛni car ɛn ɣöö bä Jɛ-ru-tha-lɛm kɛnɛ ji̱ Juda lät kä mi gɔaa. /Cuarɛ dual.

¹⁶ Kä ti̱ti̱ kɛ tin bia la̱t. La̱tdɛ rɔ̱ thuɔ̱k kamnikun, kä latdɛ ni luɔ̱ɔ̱k ti cuŋ, kä la̱tdɛ ni mal.

¹⁷ Kä cu gua̱n thieekädu lät ca̱p mi jiäk, kä /cuarɛ ya̱c mi kac lat, kɛ ɣöö lökä kɛn tɔ̱ diaal tɔ̱tɔ̱.”

¹⁸ Kä cu ruac Kuɔth Nhial in la Ruey Ɣɔaa lɛni ben kä Dhɛ-kar-yaa i̱,

¹⁹ “Cäŋ ti̱mä ŋuaani päthni kɛnɛ dhieec päthni kɛ bärɔw päthni kɛ wäl päthni, ba cäŋ ti̱mä tɛthkä lɔaac kä ji̱ Juda. Kɛ kui̱c ɛmɔ nhɔakɛ ni thuɔ̱k kɛnɛ mal.”

²⁰ Kä cuɛ lɛni wee i̱, “Bi nɛy ti ŋuan ben, amäni ji̱ wi̱i̱ni ti ŋuan,

²¹ kä bi ji̱ wec kɛl wä wi̱c in dɔ̱ŋ, kä bikɛ wee i̱, ‘Wanɛ Kuoth Nhial pal ni kä kɛɛl, banɛ Kuoth Nhial in la Ruey Ɣɔaa wä thiec. Ɣän puɔ̱nydä wa̱a̱kɛ.’

²² Kä bi nɛy ti ŋuan kɛ döör ti buɔ̱m buɔ̱ɔ̱m Kuoth Nhial in la Ruey Ɣɔaa ben go̱o̱r kä Jɛ-ru-tha-lɛm. Ba puɔ̱thdɛ ben thiec.

²³ Kä cuɛ ruac ɛn ɣöö, ɛn ni̱ni ti̱ti̱ bi nɛy da̱ŋ wäl kä döör tin kɔ̱ŋ rɔ̱ ka̱p kä raan ji̱ Juudh wäkɛ i̱, ‘A kɔ wa̱kɔ kɛɛl kɛ ji̱, kɛ ɣöö cakɔ liŋ ɛn ɣöö te Kuoth kɛɛl kɛ yɛ.’ ”