Dhɛk 7 - RUAC KUƆTH IN RƐL RƆ

Kuëth Kuɔth Nhial kɛ thëk mi baŋ

¹ Kɛ ŋuaan runi ruëc kua̱r ni Dɔr-ya-wɛc, cu ruac Kuɔth Nhial ben kä Dhɛ-kar-yaa kɛ cäŋ kä ŋuaan kä pay bäŋuan min la (tɛɛr).

² Kä cu ji̱ Beth-ɛl Thar-ɛ-dhɛr kɛnɛ Rɛ-gɛm-mɛ-lɛk ja̱k kɛɛl kɛ nɛɛkiɛn ba Kuoth Nhial ben thiec kɛ puɔ̱th.

³ Kɛ ɣöö ba bööth palä kɛnɛ go̱o̱k thiec i̱, “Kɔn bakɔ ŋot kɛ mi pär nɛy kä bakɔ thɛɛk kɛ dhieec päthni, ce̱tkɛ min la nɛy a lät kɛ run ti ŋuan?”

⁴ Kä cu ruac Kuɔth Nhial in la Ruey Ɣɔaa ben kä ɣä i̱,

⁵ “Läri jɛ ji̱ wec kɛnɛ bööth palä, mëë thek yɛn kä pa̱rɛ, kɛ pay dhieec kɛnɛ pay bärɔw kɛ run da̱ŋ bärɔw tëë ci wä, thek yɛn kɛ kui̱dä?

⁶ Kä mëë mi̱th yɛn kä mäth yɛn, ɛ nëë, ci yɛn kɛ cäm rɔ̱?

⁷ Kä ti̱ti̱ /cikɛ rieet Kuɔth Nhial tëë cɛ lat kɛ go̱o̱k tëë kɔn, mëë ŋot Jɛ-ru-tha-lɛm kɛnɛ wi̱i̱ tëë te gekädɛ nikɛ wi̱i̱ kuec cuëëc kɛnɛ wi̱i̱ kuec känyä ca̱ŋ kɛ gɔɔy, kä tekɛ kɛ mal?”

Thil luthä kɛ mëë pɛ̈ckɛ naath

⁸ Kä cu ruac Kuɔth Nhial lɛni ben kä Dhɛ-kar-yaa ɛn ɣöö

⁹ ci Kuoth Nhial in la Ruey Ɣɔaa ruac ɛmɛ lat wëë i̱, “Latdɛ luk mi cuŋ, kä nyuɔ̱thɛ rɔ̱ nhök kɛnɛ kɔ̱a̱c lɔaac kamnikun.

¹⁰ Kä /cuarɛ ciek jɔkä ciɛŋ a jiäk, kɛnɛ rɛ̈tni kɛ jur kɛ can. Kä cu mi jiääk car kɛ rɛydu kɛ kui̱ dämuɔɔr.

¹¹ Duundɛ ɣöö cukɛ li̱eŋdɛ lo̱k, cu buɔ̱m ni wuɔ̱thkiɛn kä cukɛ gäk ni wuɔ̱thkiɛn.

¹² Kä cukɛ lo̱ckiɛn jak kä bum ɛ tet ce̱tnikɛ päm, kɛ lo̱kdiɛn kɛ ŋuɔ̱t kɛnɛ ruac Kuɔth Nhial in la Ruey Ɣɔaa mëë cɛ ja̱k kɛ göökɛ tëë nhiam. Kɛ kui̱c ɛmɔ cu Kuoth Nhial in la Ruey Ɣɔaa gaak ɛlɔ̱ŋ.

¹³ ‘Kä mɔ cä ciöt ɔ, /ci kɛn ɣä liŋ, kɛ /cä kɛ liŋ mɔ cɔɔlkɛn ɣä mɔ.’ Ruac ni ɣän Kuoth Nhial in la Ruey Ɣɔaa.

¹⁴ Kä cua̱kɛ däk kä rɛy dööri diaal ti kui̱c kɛn kɛ ce̱tnikɛ thul. Kä cu mun lɔ̱ te baaŋ, kä cuɛ thil ram mi wä thi̱n, kä cuɛ thil ram mi bä thi̱n. Inɔ cukɛ mun in gɔaa cu jak kä te baaŋ.”