Dhɛk 6 - RUAC KUƆTH IN RƐL RƆ

Nyuuth thurbiɛɛli da̱ŋ ŋuaan

¹ Ɛ jɛn cua̱ rɔ nyɔk kɛ guec, cua̱ thurbiɛɛli da̱ŋ ŋuaan nɛn bäkɛ raar kam päämni da̱ŋ rɛw. Kä pääm kɛ pääm yieethä min yian.

² Kä thurbil in nhiam tëë kɛ jiöŋkööri ti luaal, kä min rɛwdɛ tëë kɛ jiöŋkööri ti ca̱a̱r,

³ kä diɔ̱ɔ̱kdiɛn tëë kɛ jiöŋkööri ti bo̱o̱r, kä ŋuaandiɛn tëë kɛ jiöŋkööri ti tekɛ biɛɛl ti yiël.

⁴ Kä cua jääk in ruac kɛ ɣä thiec i̱, “Kɛ ŋuni kɛn ti̱ti̱ kuäärä?”

⁵ Kä cuɛ ɣä loc i̱, “Kɛ yi̱ey puɔ̱ɔ̱rä da̱ŋ ŋuaan bäkɛ raar nhiam Kua̱r wec muɔ̱ɔ̱n kɛɛliw.

⁶ Thurbil in tekɛ jiöŋkööri ti ca̱a̱r wëë kui̱c caam kä Bɛ̈-bi-lɔn, kä min tekɛ jiöŋkööri ti bo̱o̱r ɔ wëë kui̱c konyä ca̱ŋ. Kä min tekɛ biɛɛl wëë kui̱c cuëëc.”

⁷ Kä min ci tin yiël ben raar, cukɛ wä, wa wi̱c muɔ̱ɔ̱n jäl. Kä cu jääk wee i̱, “Wiaa ja̱lɛ wi̱c muɔ̱ɔ̱n.” Kä cukɛ jɛ wä jäl.

⁸ Kä cu jääk ɣä cɔl i̱, “Jiöŋkööri tin ci wä kui̱c caam kä Bɛ̈-bi-lɔn, ca lɔcdä jak kä wä piny.”

Lär kɛ muɔ̱c Jɔ-cua kɛ kum kuäärä

⁹ Kä cu ruac Kuɔth Nhial ben kä ɣä wëë i̱,

¹⁰ “Käni muc tin ca ŋun ɛ Ɣɛl-day kɛnɛ To-bi-yaa kɛ Yɛ-dɛ̈-yaa nɛy tëë luny jɔk pecä kä Bɛ̈-bi-lɔn. Kä niɛ cäŋ ɛmɔ wër dhɔr Yo-ci-yaa gat Dhɛ-pɛ̈n-yaa.

¹¹ Kä täth kum kɛ ciɛk in bo̱r kɛnɛ da̱a̱p, kä läthni jɛ wi̱i̱ Jɔ-cua bo̱o̱th palä in di̱i̱t gat Yɛ-ɣo-dha-dak.

¹² Kä jio̱k ni jɛ ci Kuoth Nhial in la Ruey Ɣɔaa wee i̱, ‘Ram in cɔal i̱ Kaar, bɛ piith gua̱a̱thdɛ a bɛ luak Kuɔth Nhial la̱t.

¹³ Ba jɛn bi luak Kuɔth Nhial la̱t ɔ, kä bi luth kuäärä tekɛ jɛ, kä bɛ ruëc wi̱i̱ kɔaam kuäärädɛ. Kä bɛ tekɛ bo̱o̱th palä kuäärädɛ, bikɛ lät kɛɛl nikɛ mal kɛnɛ tɛ̈th lɔaac.’ ”

¹⁴ Kä kum bɛ te rɛy luaak Kuɔth Nhial, mi ba tim Ɣɛl-day kɛnɛ To-bi-yaa kɛ Yɛ-dɛ̈-yaa kɛ Yo-ci-yaa gat Dhɛ-pɛ̈n-yaa.

¹⁵ “Kä nɛy tin nɔ̱a̱n nɔa̱a̱n bikɛ ben, ba naath ben luäk kɛ ta̱th luaak Kuɔth Nhial. Kä biɛ cu ŋa̱c ɛn ɣöö jäk ɣä Kuoth Nhial in la Ruey Ɣɔaa kä ji̱. Kä ɛn nɛmɛ bɛ ben, mi wi̱i̱ jɔw Kuɔth Nhial Kuothdu wä tit agɔaa.”