Dhɛk 4 - RUAC KUƆTH IN RƐL RƆ

Nyuuth cuuŋä lɛmbärä

¹ Kä cu jääk Kuɔth in ruac kɛ ɣä rɔ nyɔk kɛ ben, kä cuɛ ɣä ker, ce̱tnikɛ min la raan a kërkɛ ni̱n.

² Kä cuɛ ɣä jiök i̱, “Ɛŋu nɛɛni mɔ?” Kä cua̱ jɛ loc i̱, “Nɛ̈ɛ̈nä cuuŋ lɛmbärä mi da̱a̱p kɛɛliw, a te liɛɛrɛ wi̱i̱dɛ, kä te lɛmbärni bärɔw rɛydɛ, kɛ dup bärɔw ti wä kä lɛmbär.

³ Kä te gëkdɛ kɛ jiɛn Ɔ-lip da̱ŋ rɛw, te kɛl kui̱c cuëëc lirä, kä te min dɔ̱ŋ kui̱c caam.”

⁴ Kä cua̱ jääk in ruac kɛ ɣä jiök i̱, “Kɛ ŋuni kɛn ti̱ti̱ kuäärä?”

⁵ Kä cuɛ ɣä loc i̱, “Ji̱n kui̱ci kɛn ti̱ti̱?” Kä cua loc i̱, “Eey kuecä kɛ kuäärä.”

⁶ Kä cuɛ ɣä jiök i̱, “Nɛmɛ ɛ ruac Kuɔth Nhial kɛ kui̱ Dhɛ-ru-ba-bɛl. Kä ciɛ lua̱ŋ kiɛ buɔ̱m, ɛ yiëëdä, ruac ni ɣän Kuoth Nhial in la Ruey Ɣɔaa.

⁷ Kä ɛ ji̱n ŋa lö päm in bum bum? Kä bi ce̱tnikɛ wi̱c muɔ̱ɔ̱n kä Dhɛ-ru-ba-bɛl. Kä bɛ päm gɔŋtɔtdä ka̱m raar, kä bɛ cu rɔal i̱, ‘Kuoth pothɛ! Kuoth pothɛ!’ ”

⁸ Kä cuɛ ŋot kɛ mi bä ruac Kuɔth Nhial kä ɣä, wëë i̱,

⁹ “Ɛn tuk duëël ɛmɛ ci Dhɛ-ru-ba-bɛl ɛ la̱t kɛ tetdɛ, kä bɛ jɛ thuk. Kä ɛ jɛn bia ŋa̱c ɔ jäk ɣä Kuoth Nhial in la Ruey Ɣɔaa kä yɛ.

¹⁰ Kä ram ɔ bi cäŋ kä mi tɔt cany ɔ, mi wëë Dhɛ-ru-ba-bɛl nɛn a lätdɛ luak, bi lo̱ckiɛn tɛɛth. “Kä kɛn bärɔw ti̱ti̱ kɛ wäŋ Kuɔth Nhial, tin guicɛ wi̱c muɔ̱ɔ̱n kɛɛliw.”

¹¹ Kä cua̱ jɛ jiök i̱, “Kä kɛ ŋuni kɛn jiɛn Ɔ-lip da̱ŋ rɛw tɔ̱tɔ̱, tɔ̱ te kɛl kui̱c cuëëc cuuŋä lɛmbärä, kä te min dɔ̱ŋ kui̱c caam ɔ?”

¹² Kä cua nyɔk kɛ thiec in rɛwdɛ i̱, “Kä kɛ ŋuni kɛn yuan jiaath Ɔ-lip da̱ŋ rɛw tɔ̱tɔ̱, tɔ̱ te gekä mathuuri dääpä da̱ŋ rɛw tin la ka̱mkɛ liɛɛth raar thi̱n ɔ?”

¹³ Kä cuɛ ɣä loc i̱, “Ji̱n kui̱ci ti̱ti̱ kɛ ŋuni?” Kä cua loc i̱, “Eey, kuäärä.”

¹⁴ Kä cuɛ ɣä jiök i̱, “Kɛ kɛn rɛw tin ca kuany, kɛ ɣöö ba Kuäär ni Kuoth lätikä wi̱i̱ muɔ̱ɔ̱n kɛɛliw.”