Dhɛk 3 - RUAC KUƆTH IN RƐL RƆ

Nyuuth go̱kä kɛ bo̱o̱th palä in di̱i̱t

¹ Kä cu Kuoth Nhial ɣä lɛ nyuɔ̱th bo̱o̱th palä in di̱i̱t ni Jɔ-cua tëë cuŋä nhiam jääkä Kuɔth Nhial. Kä te Cɛy-tan cuŋä kui̱c cuëëc Jɔ-cua gɔɔnyɛ jɛ.

² Kä cu Kuoth Nhial Cɛy-tan jiök i̱, “Ci Kuoth Nhial ji̱ kuɛth Cɛy-tan! Ci Kuoth Nhial in ci Jɛ-ru-tha-lɛm mɛk ji̱ kuɛth. Ɛn Jɔ-cua ɛ mi ce̱tdɛ kɛ tɛ̈ɛ̈ mi kuanykɛ rɛy maac.”

³ Kä täämɛ Jɔ-cua tëë cuŋä nhiam jääkä Kuɔth kɛ bi̱i̱ mi lɔw.

⁴ Kä cu jääk Kuɔth nɛy tin te cuŋä nhiamdɛ jiök i̱, “Wuɔcɛ bieyni tɔ̱ lɔathni tɔ̱tɔ̱ puɔ̱ɔ̱nydɛ.” Kä cuɛ Jɔ-cua jiök i̱, “Ɣän cä dueerku woc kä ji̱, kä bä ji̱ moc kɛ bieyni ti gɔw.”

⁵ Kä cua̱ wee i̱, “Akɛ la̱th kɛ kum mi gɔaa wi̱i̱dɛ.” Kä cua jɛ la̱th wi̱i̱dɛ, kä cua jɛ moc kɛ bi̱i̱. Kä te jääk Kuɔth Nhial cuŋä kutdɛ.

⁶ Kä cu jääk Kuɔth Nhial Jɔ-cua jiök i̱,

⁷ “Nɛmɛ ɛ min ci Kuoth Nhial in la Ruey Ɣɔaa ɛ lar, ɛn ɣöö mi guuri ni duɔ̱ɔ̱pdä, kä tiitdi ŋuɔ̱tkä, deri luaakdä yop kä deri rɛy kalɛ tit, kä dëë ji̱ moc kɛ gua̱a̱th rɛy nɛɛni ti te cuŋä ti.

⁸ Kä liŋɛ täämɛ lö bo̱o̱th palä in di̱i̱t ni Jɔ-cua, yɛnɛ mäthniku tin te nhiamdu. Kɛn kɛ ji̱ nyuuthä ti gɔw. Ɣän bä ja̱ŋdä ni yuan jiaath nööŋ.

⁹ Kä nɛnɛ ɣän la̱thä päm kɛl nhiam Jɔ-cua, ɛn päm ɛ mɔ tëë kɛ pek da̱ŋ bärɔw. Kä ɣän bä gɔ̱r, kä bä duer muɔ̱ɔ̱n ɛ mi woc kɛ jɛn cäŋ ɔ kɛl ɔ, ruac ni ɣän Kuoth Nhial in la Ruey Ɣɔaa.

¹⁰ Kä cu Kuoth Nhial in la Ruey Ɣɔaa ruac ɛn ɣöö ɛn cäŋ ɛmɔ bi ramɔ gua̱n thieekädɛ cɔal thaar jiaathdɛ kɛ mal.”