Dhɛk 12 - RUAC KUƆTH IN RƐL RƆ

Luäk Jɛ-ru-tha-lɛm mi bi ben

¹ Nɛmɛ ɛ ruac Kuɔth Nhial kɛ kui̱ I-thɛ-rɛl, ci Kuoth Nhial in cak nhial kɛnɛ piny kä ci raan ka̱m tëk wee i̱,

² “Ɣän bä Jɛ-ru-tha-lɛm jak kä liɛɛr kɔaŋ mi bi döör diaal tin te thieekädɛ jak kä yɔ̱ŋ. Kä ba Juda go̱l ce̱tnikɛ Jɛ-ru-tha-lɛm.

³ Kä ɛn cäŋ ɛmɔ, mi wä döör wec muɔ̱ɔ̱n diaal rɔ mat kɛ makdɛ, ɣän bä Jɛ-ru-tha-lɛm cu jak kä ce̱tnikɛ päm mi thiɛk thiɛk kä döör diaal. Kä nɛy tɔ̱ bi wee kapkɛ jɛ nhialɔ, bikɛ rɔ moc buɔ̱ɔ̱t.

⁴ Kä ɛn cäŋ ɛ mɔ, ɣän bä jiöŋkööri diaal moc kɛ mi bɛc, kä bä nɛy tin kɔatkɛ kɛ jak kä yɔ̱a̱ŋ. Kä bä ciëëŋ Juda guic, kä bä jiöŋkööri dööri diaal jak kä ciöör.

⁵ Kä bi thok duëël Juda ruac kä rɔ̱ i̱, ‘Ji̱ Jɛ-ru-tha-lɛm cikɛ buɔ̱m kɛ kui̱ Kuɔth Nhial in la Ruey Ɣɔaa Kuothdiɛn.’

⁶ “Kä ɛn cäŋ ɛ mɔ, ɣän bä thok duëël Juda jak kä ce̱tkɛ mac rɛy ruɔ̱ɔ̱p, kä ce̱tkɛ bo̱l maac rɛy burä. Bikɛ kui̱c cuëëc kɛnɛ kui̱c caam kɛ nɛy diaal tin thieek kɛ kɛ dup. Kä bi Jɛ-ru-tha-lɛm ŋot guäthdɛ.

⁷ “Kä bi Kuoth Nhial Juda ka̱m juc nath kɛ nhiam, kɛ ɣöö /ci liak ji̱ thuɔk duëël Dee-bid kɛnɛ ji̱ Jɛ-ru-tha-lɛm bi di̱t kä ji̱ Juda.

⁸ Kä ɛn cäŋ ɛ mɔ, bi Kuoth Nhial ji̱ Jɛ-ru-tha-lɛm gaŋ, kä bi kɔ̱a̱c kɔ̱a̱a̱ckiɛn ce̱tnikɛ Dee-bid, kä bi gaat Dee-bid kɛ bo̱th ce̱tnikɛ jääk Kuɔth Nhial, kiɛ ce̱tnikɛ Kuoth puɔ̱nydɛ.

⁹ Kä ɛn guäth ɛmɔ bä go̱r ni ɣöö da̱kä nɛy tin ca Jɛ-ru-tha-lɛm mak.

¹⁰ “Kä ɣän bä yiëë nho̱kädä kɛ pal wuɔ̱c gaat Dee-bid kɛnɛ ji̱ Jɛ-ru-tha-lɛm, kä mi wäkɛ ram in ca näk wä guic, bikɛ jɛ par, ce̱tkɛ min la raan gat kɛl a paar, kä bɛ wiee wi̱i̱dɛ ɛlɔ̱ŋ ce̱tkɛ min la raan a wiee kɛ kui̱ gatdä min kɛ̱̈ɛ̱̈.

¹¹ Ɛn cäŋ ɛmɔ bi pa̱r kä Jɛ-ru-tha-lɛm di̱t ce̱tnikɛ pa̱r Ɣä-dɛ̈d-ri-mon rɛy tɔ̱ɔ̱rä Mɛ-gi-do.

¹² Kä bi wi̱c muɔ̱ɔ̱n pa̱r, dhɔrɔ kä rɔa, bi dhɔr Dee-bid pa̱r kä rɔa, kä bi mänkiɛn pa̱r kä rɔ̱. Kä bi dhɔr Na-than pa̱r kä rɔ̱, kä bi mänkiɛn pa̱r kä rɔ̱.

¹³ Kä bi dhɔr Lii-bay pa̱r kä rɔa, kä bi mänkiɛn pa̱r kä rɔ̱. Kä bi dhɔr Cimi pa̱r kä rɔa, kä bi mänkiɛn pa̱r kä rɔ̱.

¹⁴ Kä duɔth dho̱ri diaal tin ci duɔth pär dhɔrɔ kɛ pa̱rɛ, kä pär mänkiɛn kɛ pa̱riɛn.