Dhɛk 11 - RUAC KUƆTH IN RƐL RƆ

¹ Lɛp thi̱ekniku, lö Lɛ-ba-nɔn, kɛ ɣöö dee mac jiɛn ŋuërku waŋ.

² Kä wieeɛ, lö jiɛn luɔ̱ɔ̱r, kɛ ɣöö ci jiɛn ŋuer jiäk. Kä ci jiɛn tin gɔw li̱w! Kä wieeɛ yɛn jiɛn mɛ̈th Ba-can, kɛ ɣöö ca rup in thi̱ŋ jɔap piny!

³ Kä liŋ lul yiëëni deet, kɛ ɣöö ci wal thil rɛy tɔ̱ɔ̱rä! Kä liŋ lul lonyni, kɛ ɣöö ci rupdiɛn in te kä Jɔr-dɛn waaŋ!

Yieen da̱ŋ rɛw

⁴ Kä nɛmɛ ɛ min laar Kuoth Nhial ni Kuothdä jɛ lar i̱, “Yien det ti ba wä näk ti.

⁵ Kä ci ji̱kiɛn kɛ näk kä cikɛ wä a /ka̱nkɛ duäc. Kä cu nɛy tin kɔkɛ wee i̱, ‘Ɛ puɔ̱th tekɛ Kuoth Nhial, kɛ ɣöö cakɔ tekɛ ti ŋuan.’ Kä /ken yiëënkiɛn kɛ nhɔk.

⁶ Kä cu Kuoth Nhial ruac ɛn ɣöö ɣän /cä bi tekɛ nhök kɛ ji̱ wec muɔ̱ɔ̱n. Kä ɣän bä nɛy diaal la̱th tetni kua̱rikiɛn. Kä bikɛ wi̱c muɔ̱ɔ̱n däk, kä thilɛ ram mi bä luäk tetnikiɛn.”

⁷ Ɛ jɛn cua̱ det tin ba wä näk ɛ nɛy tin ciaŋkɛ det a jiäk wä yien. Kä cua̱ rɔ moc kɛ kɛtni da̱ŋ rɛw. Cua kɛl cɔl i̱ gɔɔy kä cua min dɔ̱ŋ cɔli mat. Kä cua̱ det tit.

⁸ Kä kɛ pay kɛl cua̱ da̱k kɛ yiëën da̱ŋ diɔ̱k. Ɣän cä ŋɔ̱a̱ŋ kɛ kɛ kä cikɛ ŋɔ̱a̱ŋ bäkɛ ɣä.

⁹ Kä cua det jiök i̱, “/Ci ɣän bia̱ yieendun. Kä mɔ bi li̱wɔ a jɛ li̱w. Kä a tɔ̱ bi riaw tɔ̱, riaw. Kä a tɔ̱ bi duɔth tɔ̱ ramɔ cam ri̱ŋ kä mɔ.”

¹⁰ Kä cua̱ kɛɛtdä min cɔal i̱ gɔɔy ka̱n, kä cua̱ jɛ to̱l, da̱kä mat ruac mëë cä la̱t kɛ döör diaal.

¹¹ Inɔ cua mat ruac däk ɛn cäŋ ëë. Kä cu nɛy tin ciaŋkɛ det a jiäk, tëë guɛckɛ ɣä jɛ ŋa̱c ɛn ɣöö ɛ ruac Kuɔth Nhial la̱tdä mɔ.

¹² Kä cua̱ kɛ jiök i̱, “Mi guic yɛnɛ, ɛ cuɔ̱ɔ̱ŋ kä ɣä, kä ka̱mɛ ɣä kökdä. Kä mi guic yɛnɛ /ciɛ cuɔ̱ɔ̱ŋ kä ɣä, akɛ tekɛ yɛ.” Kä cukɛ ɣä ka̱m yio̱w ti jiɛn diɔ̱k.

¹³ Ɛ jɛn cu Kuoth Nhial ɣä jiök i̱, “Läth nikɛ guäth tɔ̱ɔ̱wä yio̱o̱ni.” Kɛn yio̱w tëë ca ka̱m ɣä ɛ kɛn. Kä cua̱ kɛn yio̱w ti jiɛn diɔ̱k ka̱n, kä cua̱ kɛ la̱th guäth tɔ̱wä yio̱o̱ni rɛy luaak Kuɔth Nhial.

¹⁴ Kä cua̱ kɛɛtdä min rɛwdɛ, min cɔali mat töl, da̱kä mat kam Juda kɛnɛ I-thɛ-rɛl.

¹⁵ Kä cu Kuoth Nhial ɣä jiök i̱, “Nyɔk yien deet mi thil luɔt kɛ lätni.

¹⁶ Kɛ ɣöö ɣän bä yieen deet nööŋ wi̱i̱ muɔ̱ɔ̱n, mi /ci bi diɛɛr kɛ det tin ci riaw, kä /cɛ tin ci bath bi go̱r, kä /cɛ tin tekɛ buɔ̱ɔ̱t bi jak kä gɔaa, kä /cɛ tin ci duɔth bi la̱a̱k, duundɛ ɣöö bɛ cam ni ri̱ŋ kä tin ci cuath, kä bɛ ka̱m ni barkaknikiɛn raar.

¹⁷ Riɛk akɛ yieen deet mi thil luɔt, mi bäny det piny! Ɛ mut yiɛɛth tetdɛ kɛnɛ waŋ cuëëcdɛ! Kä a tetdɛ kööt kä bi waŋ cuëëcdɛ muɔ̱t!”