Dhɛk 10 - RUAC KUƆTH IN RƐL RƆ

Lär Kuɔth Nhial kɛ luäk

¹ Thiëcɛ Kuoth Nhial kɛ nhiaal rueel, ɛ jɛn Kuoth Nhial in la pua̱a̱r a ŋun. La mocɛ naath kɛ nhiaal, kä jakɛ ka̱a̱k nɛɛni diaal kä tekɛ bɛl.

² Kä la kolaaŋ a lat ni baŋ, kä la ti̱t a nɛɛn ni kac. Kä lat ji̱ la̱a̱kni ni ka̱a̱cni, kä thöpkɛ ni lui̱k mi baŋ. Kɛ kui̱c ɛmɔ yi̱c naath ce̱tkɛ det, cuckɛ kɛ ɣöö thilɛ kɛ yieen.

³ Kä cu Kuoth Nhial wee i̱, “Gakdä tëë kɛ yiëën deet, kä ɣän bä bööth duäc. Kɛ ɣöö ɣän Kuoth Nhial, bä detkä gaŋ, ni ji̱ Juda, bäkɛ jak kä ce̱tkɛ jio̱k köör mi tuɔ̱p rɛy köör.

⁴ Kä ji̱ Juda bi päm gɔŋtɔtdä ben thi̱n, kä bi lo̱c kɛmɛkä ben kä kɛ, kä bi bäär köör ben kä kɛ, kä bi rueec ben kä kɛ.

⁵ Kɛn diaal kɛɛl bikɛ ce̱tnikɛ wäth köör, ti dɔanykɛ ji̱ tɛ̈riɛn kä rɛy tua̱a̱k dup. Bikɛ ko̱r tɛr kɛ ɣöö te Kuoth Nhial kɛɛl kɛ kɛ, a bikɛ jiöŋkööri joc.

⁶ “Ɣän bä ji̱ Juda jak kä bum, kä bä ji̱ I-thɛ-rɛl luäk. Kä bäkɛ luɔ̱ɔ̱c jɔk kɛ ɣöö ta̱a̱ kɛ nhök kɛ kɛ, kä bikɛ ce̱tnikɛ mi /ka̱n kɛ kɔn lo̱k, kɛ ɣöö ɛ ɣän Kuoth Nhial ni Kuothdiɛn ɣän bä paliɛn liŋ.

⁷ Kä bi Ɛ-pa-rim ce̱tnikɛ wääth köör, kä bi lo̱ckiɛn tɛɛth ce̱tkɛ ji̱ kɔŋä. Kä bi gaatkiɛn ɛ nɛn, kä bi lo̱ckiɛn tɛɛth, kä bikɛ Kuoth Nhial liak.

⁸ “Ɣän bä nɛɛkä cɔl, kä bäkɛ mat guäth kɛl, kɛ ɣöö cäkɛ luɛl, kä bikɛ ŋuan ce̱tnikɛ ta̱a̱ ëë wal.

⁹ A cäŋ ni mɔ cäkɛ däk kä rɛy dööri mɔ, ŋotdɛ cäŋ tekɛ nɔ̱nä, ba ɣä tim. Kä kɛn kɛ gaatkiɛn bikɛ tëk kä bikɛ luny jɔk.

¹⁰ Ɣän bäkɛ luɔ̱ɔ̱c jɔk kä I-jëp, kä bäkɛ ma̱a̱t kä A-thi-ri-ya. Kä bäkɛ nööŋ muun Gil-yad kɛnɛ Lɛ-ba-nɔn, amäni mi cɛ thil duël kɛ kui̱diɛn.

¹¹ Kä bikɛ wä kɛ yier rikni, kä bi muaŋ pi̱i̱ni rɔ yɔ̱t, kä bi luɔl kiɛɛr diaal kööt. Kä bi liak A-thi-ri-ya ben piny, kä bi buɔ̱m I-jëp cu bath.

¹² Ɣän bäkɛ jak kä bum, kä ba ɣä pal ɛ kɛn.”