Dhɛk 1 - RUAC KUƆTH IN RƐL RƆ

Ciöt Kuɔth kɛ luny nɛɛnikɛ kä jɛ

¹ Kɛ bädäk päthni kɛ rɛw runi ruëc Dɔr-ya-wɛc, cu ruac Kuɔth Nhial ben kä gök ni Dhɛ-kar-yaa gat Bɛ-rɛk-yaa gat Ido ɛn ɣöö

² Kuoth Nhial cɛ gaak kɛ guuri ɛlɔ̱ŋ.

³ Kɛ kui̱c ɛmɔ la̱rɛ jɛ naath i̱ ci Kuoth Nhial in la Ruey Ɣɔaa nɛmɛ lari, “Luɔ̱nyɛ kä ɣä, bä loc kä yɛ.

⁴ Kä /cuarɛ ce̱tkɛ guuri, tëë ca la̱t ruac ɛ go̱o̱k tëë wal i̱, ‘Ci Kuoth Nhial in la Ruey Ɣɔaa ɛ lar ɛn ɣöö rietdɛ rɔ̱ kä dueerkun, kä pa̱lɛ la̱t jiäknikun.’ Kä duundɛ ɣöö /ken kɛ ɣä liŋ, ruacni Kuoth Nhial.

⁵ Kä guurikun a nikä täämɛ? Kä go̱o̱k kɛ do̱raari?

⁶ Kä ruacdä kɛnɛ ŋuɔ̱tkä tëë cä la̱r guuri kɛ thuk ja̱a̱ŋnikä ni go̱o̱k, /ken guurikun kɛ ba̱ny piny? Kä cukɛ rɔ̱ ri̱t a wäkɛ i̱, ‘Ci Kuoth Nhial in la Ruey Ɣɔaa kɔn lät kä mi ce̱tkɛ dupkɔn kɛnɛ lätkɔn, ce̱tnikɛ min cɛ car i̱ bɛ la̱t.’ ”

Nyuuth go̱kä kɛ jiöŋkööri

⁷ Kɛ cäŋ kä jiɛn da̱ŋ rɛw wi̱cdɛ ŋuaan kä pay in cɔali Cɛ-bat (kur) kɛ rɛw runä ruëc Dɔr-ya-wɛc, cu ruac Kuɔth Nhial ben kä ɣä, ɣän Dhɛ-kar-yaa gat Bɛ-rɛk-yaa gat Ido.

⁸ Kɛ wäär cua̱ wut mi ci kɔt jɔk jiöŋköör mi lual nɛn! Tëë cuŋä rɛy jiɛn ti tɔ̱ɔ̱c rɛy lo̱o̱lä. Jɔkdɛ te jio̱o̱k ti dɛɛr li̱tdä kɛ jio̱o̱k ti bo̱o̱r thi̱n.

⁹ Kä cua̱ wee i̱, “Kä kɛ ŋuni kɛn ti̱ti̱ kuäärä? Kä cu jääk Kuɔth in ruac kɛ ɣä wee i̱, ‘Bäkɛ nyuɔ̱th ji̱ ɛn ɣöö kɛ ŋuni.’

¹⁰ Kä cu ram in te cuŋä kam jiɛn ti tɔ̱ɔ̱c rɛy lo̱o̱lä jɛ loc i̱, ‘Kɛ tin ci Kuoth Nhial kɛ ja̱k kɛ ɣöö ba wi̱c muɔ̱ɔ̱n ben jäl.’

¹¹ Kä cukɛ jääk in te cuŋä kam jiɛn ti tɔ̱ɔ̱c rɛy lo̱o̱lä loc i̱, ‘Cakɔ wi̱c muɔ̱ɔ̱n jäl, kä nɛnɛ wi̱c muɔ̱ɔ̱n tëë lɔ̱ŋä ni kɛɛliw kɛ mal.’

¹² Kä cu jääk Kuɔth Nhial wee i̱, ‘Kuoth Nhial in la Ruey Ɣɔaa, a bi ku thil nhök kɛ Jɛ-ru-tha-lɛm kɛnɛ wi̱i̱ Juda tin ci gaak kɛ kɛ ti kɛ run ti jiɛn bärɔw?’

¹³ Kä cu Kuoth Nhial jääk in ruac kɛ jɛ loc ɛ kɔ̱c kɛ rieet ti gɔw.

¹⁴ Kä cu jääk in ruac kɛ ɣä, ɣä jiök ɛn ɣöö lat min ci Kuoth Nhial in la Ruey Ɣɔaa ɛ lar i̱, ‘Ɣän di̱t nhökdä kɛ Jɛ-ru-tha-lɛm kɛnɛ Dha-yɔn.

¹⁵ Kä di̱t gakdä kɛ döör tin tekɛ mal. Kä mi gakä kɛ kɛ, la kɛn a lät ni ti jiäk.

¹⁶ Kɛ kui̱c ɛmɔ cu Kuoth Nhialɛ lar ɛn ɣöö cä luny kä Jɛ-ru-tha-lɛm kɛ kɔ̱a̱c lɔaac. Kä ba luaakdä la̱t thi̱n, kä ba Jɛ-ru-tha-lɛm nyɔk kɛ ta̱th.’

¹⁷ Kä cu jääk Kuɔth ɣä jiök bä, ɛn ɣöö ci Kuoth Nhial in la Ruey Ɣɔaa wee i̱, ‘Bi wi̱i̱kä rɔ̱ nyɔk kɛ gɔɔy, kä bä Dha-yɔn nyɔk kɛ cuɔ̱m, bä Jɛ-ru-tha-lɛm nyɔk kɛ mëk.’ ”

Nyuuth tuɔ̱ŋni

¹⁸ Kä nyuuth in dɔ̱ŋ, cua̱ guic kä cua̱ tuɔ̱ŋ da̱ŋ ŋuaan nɛn.

¹⁹ Kä cua̱ jääk Kuɔth in ruac kɛ ɣä jiök i̱, “Kɛ ŋuni kɛn ti̱ti̱?” Kä cuɛ ɣä loc i̱, “Kɛ tuɔ̱ŋ tëë da̱kɛ Juda kɛnɛ I-thɛ-rɛl kɛ Jɛ-ru-tha-lɛm.”

²⁰ Kä cu Kuoth Nhial ɣä nyuɔ̱th bel da̱ŋ ŋuaan.

²¹ Kä cua̱ wee i̱, “Kä bäkɛ kɛ ɣöö ba ŋu ben la̱t?” Kä cuɛ ɣä loc i̱, “Kɛ tuɔ̱ŋ tin da̱kɛ Juda, kɛ ɣöö bɛ cu thil ram mi kap wi̱cdɛ nhial. Kɛn ti̱ti̱ bäkɛ kɛ ɣöö bakɛ ben jak kä dual, kä ba tuɔ̱ŋ dööri tin ca kap nhial kɛ ɣöö ba ji̱ Juda ben riaw kä piny.”