Ŋuɔ̱t 9 - RUAC KUƆTH IN RƐL RƆ

Thil luthä nath

¹ “Liɛŋɛ jɛ lö ji̱ I-thɛ-rɛl. Ɛn ni̱ni ti̱ti̱ bia wä kui̱ Jɔr-dɛn, bia wi̱i̱ döri ti ŋuan kä bumnikɛn kä yɛ, kä tekɛ ti̱ec ti tekɛ pa̱nyni ti ba̱r ba̱a̱r wä ka̱n.

² Kɛ nɛy ti di̱t ti ba̱r ba̱a̱r, ce̱t ta̱a̱diɛn kɛ gaat Ä-nak tin ŋa̱c ɛ, kä cia liŋ lar kɛ jɛ i̱, ‘Ɛŋa mi dëë cuɔ̱ŋ nhiam gan Ä-nak?’

³ Kä ŋa̱cɛ jɛ niɛ walɛ, mi wëë tekɛ mac mi wä kɛ nhiamdun, ɛ Kuoth Nhial Kuothdun. Bɛ kɛ däk nhiamdun, biakɛ joc kä bia kɛ däk kɛ pɛ̈th, ce̱tkɛ min ci Kuoth Nhial ɛ guɔ̱k yɛ.

⁴ “Kä /cuarɛ jɛ lar kɛ lo̱ckun i̱, ‘Ɛ cuɔ̱ɔ̱ŋda kɛ ɣöö ci Kuoth Nhial kɔ nööŋ bɛ kɔ ben ka̱m mundiɛn.’ Gua̱a̱th in ci Kuoth Nhial Kuothdun kɛ juɔc raar nhiamdun. Kä ciɛ dualiɛn kɛn dör ti̱ti̱, ɛ ni̱n joc Kuoth Nhial ɛ nikɛ nhiamdun.

⁵ Ciɛ cuɔ̱ɔ̱ŋdun kä ciɛ ɣöö cia rɔ mat ɛnɔ bi wä cieŋ kɛ yɛ muundiɛn. Ɛ kɔ̱a̱cdiɛn kɛn dör tɔ̱tɔ̱, joc Kuoth Nhial kɛ raar nhiamdun, kɛ ɣöö ba riet ëë cɛ la̱r guuri ni A-bɛ-ram kɛnɛ Ay-dhɛk kɛ Je-kɔb.

⁶ “Kɛ kui̱ ɛmɔ /ci Kuoth Nhial Kuothdun yɛ käm mun agɔaa ɛ mi kɛ kui̱ gɔɔyädun i̱ bia ciɛŋ, kɛ ɣöö kɛ yɛn nɛy ti bum wuɔ̱thkun.”

Luɔc I-thɛ-rɛl kä Thi-nay

⁷ “Tiɛmɛ mi cia dëë me̱t pa̱l ruëëcɛ ɛn ɣöö cia Kuoth Nhial lät kä mi yär lɔcdɛ däär dɔaar. Gua̱a̱th ëë bä yɛn raar muun I-jëp, mäni mi cia cop ɛn wa̱nɛ mi, la̱tdɛ Kuoth Nhial kä jiäk.

⁸ Kä Thi-nay cia Kuoth Nhial lɔcdɛ jak kä jiäk, cu lɔcdɛ jiääk ala ɣöö derɛ yɛ däk.

⁹ Kä mëë cä wä wi̱i̱ pa̱a̱m kɛ ɣöö bä pääm luëëkni wä ka̱n, luëëk tëë cia lat kɛ Kuoth Nhial. Cua̱ duɔth wi̱i̱ pa̱a̱m kɛ ni̱n ti jiɛɛn da̱ŋ ŋuaan /cä mi̱th kɛ kuän kä /cä mäth kɛ pi̱.

¹⁰ Cu Kuoth Nhial ɣä ka̱m pääm da̱ŋ rɛw ti cɛ gɔ̱r kɛ yiatdɛ. Kä te rieet diaal tëë cɛ lat kɛ yɛ thi̱n däär maac wi̱i̱ pa̱a̱m ni̱ni tëë duɔl kɛ naath.

¹¹ Kɛ kɔr ni̱ni ti jiɛɛn da̱ŋ ŋuaan, cu Kuoth Nhial ɣä ka̱m pääm gukä da̱ŋ rɛw.”

Tin go̱o̱r Kuoth kɛ

¹² Ɛ jɛn cu Kuoth Nhial ɣä jiök i̱, “Jiɛcni ɛn täämɛ ɛn wa̱nɛ mi kɛ pɛ̈th wër, nɛɛku tëë nööŋi raar kä I-jëp a lät ti jiäkni. Cikɛ kac raar dup ëë cä la̱rkɛ, ca rɔ ta̱th kuth baaŋ.”

¹³ Cuɛ ŋot jiök Kuoth Nhial ɣä i̱, “Nɛnɛ kɛn nɛy ɛ ti cäkɛ nɛn kɛ nɛy ti bum wuɔ̱thkiɛn.

¹⁴ Pälä kä rɔ, bäkɛ däk kä bä ciötdiɛn bath wi̱i̱ muɔ̱ɔ̱n, kä bä ji̱ jak kä nɛy ti ŋuan kä bum nikɛn kä kɛ.”

¹⁵ “Inɔ cua̱ ben piny wi̱i̱ pa̱a̱m a te pääm luëëkni da̱ŋ rɛw tetnikä da̱ŋ rɛw, kä päm pɛ̈tɛ kɛ mac.

¹⁶ Kä mëë cä guic cua̱ yɛ nɛn cia Kuoth Nhial Kuothdun dui̱rikä, kɛ rietdun kɛ rɔ dup ëë cɛ la̱r yɛ. Kɛ täthdun kɛ rɔ Kuoth ruaath yieethä mi palɛ.

¹⁷ Kä cua̱ pääm luëëkni da̱ŋ rɛw tëë rɔamä kɛ tetkä yäk, kä ci kɛ töl ni waaŋdun.

¹⁸ Ɛn wa̱nɔ cua̱ lɛni pal kɛ ni̱n ti jiɛɛn da̱ŋ ŋuaan nhiam Kuɔth Nhial, ti /ci ɣä mi̱th thi̱n kä /cä mäth kɛ pi̱. Kɛ kui̱ dueeri diaal ti jiäk, tëë cia la̱t waaŋ Kuɔth Nhial. Tëë jak kɛ jɛ kä gak.

¹⁹ Kɛ ɣöö Kuoth Nhial go̱rɛ däkdun cua̱ kulɛ dual kɛ lëth kɛcä lɔaac Kuɔth Nhial kɛnɛ thil tɛthkä lɔacdɛ kɛ yɛ. Duundɛ ɣöö cuɛ ɣä ku lɛ liŋ bä ɛn guäth ëë.

²⁰ Kä cu Kuoth lɔcdɛ jiääk ɛlɔ̱ŋ kɛ Ä-ron, ɛ ni ɣöö cä kulɛ pal kɛ kui̱dɛ bä ɛn guäth ëë.

²¹ Kä cua̱ thäk dui̱rädun ëë cia la̱t ka̱n, kä cua̱ jɛ yuɔr maac. Kä cua̱ jɛ guär a ba tup, kä cua̱ tupdɛ wä yuɔr ni rɛy waŋ in lo̱ny thaar pa̱a̱m.

²² “Cu yɛn Kuoth Nhial lɔcdɛ lɛni jak kä jiäk bä kä Tab-e-raa kɛnɛ Mathaa kɛ Kib-rot-ɣata-waa.

²³ Kä mëë ci Kuoth Nhial yɛ ja̱k kä Ka-dɛc-bar-ni-ya i̱, ‘Wiaa cieŋɛ muun in cä ka̱m yɛ,’ /ka̱nɛ ruac Kuoth Nhial Kuɔthdun lo̱k, /cuarɛ rɔ ri̱t ŋuɔ̱tnikɛ.

²⁴ La yɛn Kuoth Nhial a lo̱k nikɛ cäŋ ëë ŋa̱cä ni yɛ.

²⁵ “Ɣän cua pal kɛ ni̱n ti jiɛɛn da̱ŋ ŋuaan nhiam Kuɔth Nhial, kɛ ɣöö cɛ lar i̱ bɛ yɛ däk.

²⁶ Cua̱ Kuoth Nhial pal i̱, ‘Aɣ Kuoth Nhial cu nɛɛku däk, nɛɛku tëë kääni kɛ buɔ̱mdu, tëë kämi raar kä I-jëp kɛ bumdu.

²⁷ Tim kuanydu ni A-bɛ-ram kɛnɛ Ay-dhɛk kɛ Je-kɔb. Cu buɔ̱m wi̱c nɛɛni ti̱ti̱ kɛnɛ kɔ̱a̱cdiɛn kɛ dueerkiɛn car,

²⁸ kɛ ɣöö ci nɛy tëë nööŋi kɔ rɛydiɛn ɛ bi lar i̱, “/Ci Kuoth Nhial kɛ luäŋ kɛ mi bɛ kɛ naŋ muun ëë cɛ guɔ̱k kɛ, kɛnɛ ɣöö lökɛ kɛ, ɛ jɛn cɛ kɛ naŋ raar ɔ kɛ ɣöö bɛ kɛ wä näk däär dɔaar.”

²⁹ Kɛ nɛɛku ti la nyinku, tëë nööŋi raar kɛ buɔ̱mdu.’ ”