Ŋuɔ̱t 8 - RUAC KUƆTH IN RƐL RƆ

Mun mi gɔaa mi wa ciɛŋ

¹ “Tiɛtdɛ la̱t luëëk diaal tëë cä la̱t yɛ, kët dɔ̱ɔ̱ derɛ tëk kä derɛ ŋuan ɛ bia mun ëë ci Kuoth Nhial ɛ guɔ̱k guuri i̱ bɛ ka̱m kɛ ciɛŋ.

² Carɛ dup diaal tëë bööth Kuoth Nhial kɛ ni kɔn kɛ run ti jiɛɛn ŋuaan däär dɔaar, tëë ɣɔ̱nɛ ni lo̱ckun kɛ ɣöö bɛ ŋa̱c ɛŋu mi caar yɛnɛ. Mi derɛ luëëkɛ tit kiɛ cia kɛ dëë tit.

³ Kä cuɛ yɛ pa̱l buɔth, kä cuɛ yɛ mi̱eeth kɛ mana mi kuecɛ, kä kui̱c guuri jɛ bä. Nyuthɛ ni jɛ yɛ ɛn ɣöö ciɛ mi̱eth kä rɔa dëë raan tëkɔ. Tëk raan kɛ riet mi bä raar kä Kuoth Nhial.

⁴ Kɛ run ti jiɛɛn ŋuan /ken bieynikun rɛ̈t kä /kenɛ ciökun pua̱a̱t.

⁵ Kä ŋa̱cɛ jɛ kɛ lo̱ckun, ce̱tkɛ min la raan gatdɛ a luëëk, inɔ bä Kuoth Nhial Kuothdu luëëkɛ ji̱.

⁶ Inɔ luthni Kuoth Nhial Kuothdu, kɛ lukdu kɛ dupkɛ kɛnɛ ti̱et ŋuɔ̱tnikɛ.

⁷ Kɛ ɣöö naŋ Kuoth Nhial ji̱ muun in gɔaa, mun kiɛri kɛnɛ wäŋ, mi bä pi̱kɛ rɛy löli kɛnɛ pääm.

⁸ Mun bɛɛl, mun liɛth kɛn tuaar,

⁹ mun mi thilɛ mi deri diw thi̱n, mi te mi̱thdɛ raar, mun mi te guiykɛ kɛ yiëëth kä päämkɛ jëk kɛ yio̱m thi̱n.

¹⁰ Puɔthɛ Kuoth Nhial Kuothdun, kɛ mun riäŋä mi gɔaa mi cɛ ka̱m yɛ.”

Luek kɛ kui̱ pälä Kuɔth rueec

¹¹ “Ŋa̱cɛ jɛ, /cuarɛ Kuoth Nhial Kuothdun bi pa̱l rueec, kɛ thil tiitädun kɛ ŋuɔ̱tkɛ kɛnɛ luëëkɛ tëë cä la̱t yɛ.

¹² Kɛ ria̱ŋdun kɛnɛ ta̱thdun kɛ duel tin gɔw tin ciaŋɛ,

¹³ kɛnɛ mi wä ɣɔ̱ɔ̱kun kɛnɛ detkun kiɛ da̱a̱pdun kɛnɛ ciɛkdun in bo̱r wä ŋuan, kiɛ mi wä nyinkun diaal wä ŋuan,

¹⁴ bi lɔcdun cu tɛ̈ɛ̈th kä bia Kuoth Nhial Kuothdun ëë nööŋ yɛ raar muun I-jëp mëë lapɛ kuany thi̱n cu pa̱l rueec.

¹⁵ Mëë bööth yɛ däär dɔaar in bɛ̈c, rɛy thɔ̱ɔ̱li kɛnɛ jiɛth mun rɛ̈w mi thil pi̱, kä cuɛ yɛ moc pi̱ rɛy pa̱a̱m mi kööt.

¹⁶ Mëë mi̱i̱th guuri kɛ mana mi kui̱c kɛnɛ, kä cuɛ yɛ ɣɔ̱n kɛ nhiam, kɛ ɣöö bɛ yɛ lät kä mi gɔaa kɛ jɔak.

¹⁷ Tiɛtdɛ jɛ, /cuarɛ bi wee kɛ buɔ̱m tetkädä cä ria̱ŋ jëk.

¹⁸ Tiɛmɛ Kuoth Nhial Kuothdun min käm yɛ buɔ̱m ɛ jëk yɛnɛ ni ria̱ŋ ɛ mi. Dɔ̱ɔ̱ bɛ gukdɛ mëë cɛ guɔ̱k guuri jak kä gua̱a̱thdɛ ce̱tkɛ ni̱n ti̱ti̱.

¹⁹ Kä mi wä yɛn Kuoth Nhial Kuothdun wä pa̱l rueec, ɛ bia guɔ̱ɔ̱r ni kuth kɔ̱kiɛn, kä bia pal nikɛ, bä la̱r yɛ ɛ puc bia thuɔ̱k.

²⁰ Ce̱tnikɛ nɛy tëë ci Kuoth Nhial kɛ däk nhiamdun. Kä bia cu da̱k, kɛ ɣöö /ken yɛn ruac Kuɔth Nhial Kuothdun luɔ̱th.”