Ŋuɔ̱t 7 - RUAC KUƆTH IN RƐL RƆ

Nɛɛ Kuɔth Nhial ti rɛl kɛ rɔ

¹ “Mi wä Kuoth Nhial Kuothdun yɛ wä naŋ muun in bia wä cieŋ thi̱n, bɛ dör da̱ŋ bärɔw ti bumnikɛn kä yɛ joc thi̱n nhiamdun. Kɛn dör ɛ tɔ̱ kɛ ji̱ ɣɛ̈th kɛnɛ ji̱ Pɛ-rii-dhi kɛ ji̱ Iwi kɛ ji̱ Yɛ-buth,

² mi wä Kuoth Nhial Kuothdun kɛ wä ka̱m yɛ. Da̱kɛ kɛ a thil pälikä, kä /cuarɛ guk lät kɛ kɛ.

³ /Cuarɛ kuen kɛ kɛ, kä /cuarɛ nyieekun käm gaatkiɛn ala män, kä /cuarɛ gaatkun kuen nyieekiɛn.

⁴ Amäni mi dëë gaatkun rit kɔɔr Kuɔth Nhial, a ba wä pal ni kuth ti guäy. Amäni mi dëë kɛ̈c Kuɔth Nhial ben kä yɛ a bɛ yɛ dup kɛ pɛ̈th.

⁵ Bia lät nikɛ kä nɛmɛ bia yi̱knikiɛn da̱k piny, kä bia riäknikiɛn töl töölni, kä bia döölkiɛn thia̱y piny, kä bia kuth jiɛnkiɛn waŋkɛ mac.

⁶ “Kɛ ɣöö kɛ yɛn nɛɛ Kuɔth Nhial Kuothdun ti ca ley ɛ. Kä bi yɛn a nɛɛkɛ ti cɛ mɛk rɛy nɛɛni diaal tin ciɛŋkɛ wi̱c muɔɔn.

⁷ Ciɛ ŋuandun kä naath ɛnɔ cu Kuoth Nhial nhökdɛ ka̱m yɛ mɔ, kua kɛn yɛn nɛy tin kui̱ynikɛn.

⁸ Ɛ ɣöö nhɔk Kuoth Nhial ni yɛ, kɛnɛ ti̱t gukä mëë cɛ gok kɛnɛ gua̱nikun, ɛ jɛn ci Kuoth Nhial yɛ ka̱m raar kɛ tet mi bum, kä cɛ yɛ kän duëël yieenä kä Pɛro.

⁹ Kɛ ɣöö Kuoth Nhial Kuothdun ɛ Kuoth mi gɔaa mi gua̱n nhökä, tiitdɛ gukdɛ kɛnɛ nhökdɛ min thil pëk kɛ nɛy tin nhɔakɛ jɛ, kä tiɛtkɛ luëëkɛ kä ri̱c ti bathdɔɔri.

¹⁰ Kä lucɛ nɛy tin lökɛ jɛ rikkiɛn, kɛ däkdɛ kɛ kɛ. Cɛ bi kɔ̱a̱c kɛ tin lökɛ jɛ.

¹¹ Kɛ kui̱ ɛmɔ tiɛtdɛ luëëkɛ kɛnɛ ŋuɔ̱tkɛ ti cä la̱t yɛ walɛ ti.”

Puɔ̱th nɛɛni ti tekɛ luthä

¹² “Kɛ ɣöö cia ŋuɔ̱t ɛ ti liŋ, kä cia kɛ la̱t, bi Kuoth Nhial Kuothdun yɛ ti̱et gukdɛ kɛnɛ nhökdɛ min thil pëk, mëë cɛ guɔ̱k gua̱nikun i̱ ba tit.

¹³ Bɛ yɛ poth, kä bɛ yɛ nhɔk, kä bɛ yɛ jak kä ŋuan. Bɛ Gaatkun poth kɛnɛ bɛl. Kä bɛ ɣɔ̱ɔ̱kun kɛnɛ detkun rëp rɛy muɔ̱ɔ̱n ëë cɛ ya̱c gua̱nikun i̱ bɛ ka̱m yɛ.

¹⁴ Ba poth ni yɛ kä nɛy diaal. Thilɛ raan kä yɛ kiɛ kä ɣɔ̱ɔ̱kun mi bia̱ rol.

¹⁵ Kä thilɛ juey mi jiääk ce̱tkɛ jua̱th I-jëp tëë ŋa̱cɛ, mi bi raan käp kä yɛ, bi Kuoth Nhial kɛ woc, bɛ kɛ ka̱m löökun.

¹⁶ Kä bi yɛn nɛy tin bi Kuoth Nhial kɛ ka̱m yɛ däk, kä bia thil waŋ mi gɔaa kɛ kɛ. Kä /cia Kuthkiɛn bi lätikä, kɛ dëëpkun.

¹⁷ “Kä mi wi̱i̱ jɛ lar kɛ lɔcdu i̱ dör ɛ ti bum nikɛn kä ɣä, a dëë wi̱i̱kiɛn ku lɛ ka̱n i̱di?

¹⁸ Car mëë ci Kuoth Nhial Kuothdun ɛ lät kä Pɛro kɛnɛ ji̱ I-jëp diaal. Cu dual kɛ kɛ.

¹⁹ Ci guic kɛ waŋdu, kɛ nyuuthni tëë ga̱ykɛ naath kɛnɛ buɔ̱m ëë käm Kuoth Nhial Kuothdun yɛ raar kɛ jɛ. Inɔ bä bi Kuoth Nhial Kuothdun ɛ lɛni lät kä kɛn nɛy diaal tin dual yɛn kɛ kɛ ti.

²⁰ Kä bɛ rɛydiɛn lɛni jäk kä piɛɛn gua̱r, kä tɔ̱ bi rɔ tɛ̱̈ɛ̱̈ thi̱n ɔ, bia kɛ cu ben däk.

²¹ /Cuarɛ dual kɛ kɛ Kuoth Nhial ɛ rɛydun. Ɛ Kuoth mi dual naath kɛ jɛ.

²² Bi Kuoth Nhial Kuothdun kɛ juɔc raar kɛn dör ti diaal ɛ ti ɛ määth, /cia kɛ bi cu joc kä kɛɛl, cäŋɛ ley dɔaar dëë ŋuan ni kɛn kä yɛ.

²³ Bi Kuoth Nhial Kuothdun kɛ ka̱m yɛ, kä bɛ wi̱cdiɛn nyon, bia kɛ joc mäni mi cikɛ riaw.

²⁴ Kä bɛ kua̱rkiɛn jak kä pɛn tetädun, kä bia ciötdiɛn cu bath wi̱i̱ muɔ̱ɔ̱n kä thilɛ ram mi bilɛ cuɔ̱ŋ nhiamdun mäni mi cia kɛ däk.

²⁵ Kä kuthkiɛn bia kɛ waŋ kɛ mac, kä a lɔcdun ci di̱t kɛ ciik pua̱nynikiɛn kiɛ da̱a̱pnikiɛn i̱ bia kɛ ka̱n ala nyinkun. Kɛ ɣöö ca yɛ bi dɛp kɛ jɛ, lo̱k Kuoth Nhial Kuothdun ɛ.

²⁶ Kä /cuarɛ tin lo̱k Kuoth kɛ naŋ dho̱rikun ɛ bia jiääk ce̱tkɛ jɛ. Lökɛ a cu kɛ liɛc, kɛ ɣöö kɛ ti ca lam.”