Ŋuɔ̱t 6 - RUAC KUƆTH IN RƐL RƆ

Luek in bum ni jɛn

¹ “Täämɛ nɛmɛ ɛ jɛn luek in ci Kuoth Nhial Kuothdun ɛ la̱rä min bä ŋi̱i̱c ni yɛ, kä bia kɛ wä la̱t muun in bia wä cieŋ thi̱n.

² Kä bia Kuoth Nhial Kuothdan luɔ̱th amäni karku, kä tiɛtdɛ ŋuɔ̱tkɛ tëë cä la̱r yɛ kɛ ni̱n teekädun diaal, dɔ̱ɔ̱ bi tëkdun jääny wi̱i̱ muɔ̱ɔ̱n.

³ Di̱elɛ kɛ lieŋ lö ji̱ I-thɛ-rɛl, kä tiɛtdɛ la̱tdiɛn. Dɔ̱ɔ̱ derɛ gɔaa kɛ yɛ, kä derɛ ŋuan muun ëë ci Kuoth Nhial Kuoth guurikun ɛ guɔ̱k yɛ mun caak kɛnɛ liɛɛth tuar.

⁴ “Liŋɛ lö I-thɛ-rɛl, Kuoth Nhial Kuothdun ɛ Kuoth kɛl.

⁵ Nhɔk Kuoth Nhial Kuothdu kɛ lɔcdu kɛɛliw, kɛ ca̱ru kɛɛliw, kɛ buɔ̱mdu kɛɛliw.

⁶ Kä rieet ti cä la̱t ji̱ ti titkɛ kɛ lɔcdu.

⁷ Kä ŋi̱i̱cnikɛ kɛ kä gaatku, lat kɛ mi ti̱i̱ nyuurä ciëëŋdu, kɛnɛ mi jäli dup, kiɛ ti̱i̱ catdä kɛ mi ti̱i̱ cuŋä.

⁸ Yiɛni kɛ tetädu ala nyuuth kɛnɛ nhiam kaandu röm nyiinku.

⁹ Kä gɔ̱a̱rɛ kɛ tutdä duëëlu kɛnɛ wi̱c thiek dhɔru.”

Luek kɛ kui̱ thil luthä

¹⁰ “Kä mëë nööŋ Kuoth Nhial Kuothdu ji̱ muun ëë cɛ ka̱m ji̱, mëë cɛ ya̱c guuri, A-bɛ-ram kɛ Ay-dhɛk kɛnɛ Je-kɔb, wi̱i̱ tin di̱t tin gɔw, kä thilɛ mi cia la̱t thi̱n,

¹¹ ciëëŋ ti ci thia̱a̱ŋ kɛ ti diaal ti gɔw, ti /keni la̱th thi̱n kɛ jieer ti /keni tɛt, kɛ ka̱a̱k wal kɛ kui̱ kɔaŋ kɛnɛ jiath Ɔ-lip ti /keni pith, kä curi mi̱th ɛ bi ria̱ŋ.

¹² Tit rɔ, cu Kuoth Nhial ëë nööŋ ji̱ raar muun I-jëp, mëë lapɛ ja̱a̱ŋ bi pa̱l rueec.

¹³ Yac rɔ kɛ ciöt Kuɔth Nhial Kuothdu kä luth ni jɛ.

¹⁴ Kä cu guur ni kuth tin te thieekädu.

¹⁵ Ɛ ŋɛɛny Kuɔth Nhial Kuothdu /ci rɔ bi tok kɛ ji̱, a bɛ ji̱ thum wi̱i̱ muɔ̱ɔ̱n. Kɛ ɣöö Kuoth Nhial Kuothdu in te rɛydun ɛ Kuoth mi gua̱n tiilä.

¹⁶ “/Cuarɛ Kuoth Nhial Kuothdun ɣɔ̱n ce̱tkɛ mëë cia ɣɔ̱n kä Mathaa.

¹⁷ Ka̱mɛ luëëk Kuɔth Nhial Kuothdun tiit kɛnɛ ŋuɔ̱tkɛ ce̱tnikɛ min cɛ la̱r yɛ.

¹⁸ Dɔ̱ɔ̱ bia wä cieŋ muun in gɔaa ëë ci Kuoth Nhial ɛ yac i̱ bɛ ka̱m guurikun, mi wä yɛn la̱t ni ti gɔw waaŋdɛ, bɛ gɔaa kɛ yɛ.

¹⁹ Bɛ ji̱ tɛ̈ru juɔc raar kɛn diaal nhiamdu ce̱tkɛ min ci Kuoth Nhial ɛ gok.

²⁰ “Kä mi wä gaatku ji̱ wä thiec kɛ ni̱n tɔ̱ bi ben tɔ̱, i̱ ɛŋu lot luëëk kɛnɛ ŋuɔ̱t ti ci Kuoth Nhial Kuothdan kɛ la̱t ji̱ ti?

²¹ Jiök nikɛ i̱, ‘Mëëdan kɛ kɔn kuaany kä Pɛro. Cu Kuoth Nhial nɛy ku lɛ ka̱m raar kä I-jëp kɛ buɔ̱mdɛ.

²² Cu Kuoth Nhial ti buɔ̱m buɔ̱ɔ̱m kɛnɛ ti ga̱ykɛ naath kɛ ti bɛ̈c bɛ̈ɛ̈c lät kä Pɛro kɛnɛ ji̱ dhɔaarɛ diaal kɛ ji̱ I-jëp diaal waaŋda.

²³ Cuɛ nɛy cu ka̱m raar thi̱n, kä cuɛ nɛy cu ka̱m mun ëë cɛ guɔ̱k gua̱nikɔ.

²⁴ Cu Kuoth Nhial nɛy cu la̱t luëëk kɛnɛ ŋuɔ̱t, kɛ ɣöö ba jɛ luɔ̱th ɛn Kuoth Nhial Kuothdan. Mi la̱t kɛ kɛ agɔaa ni ciaŋ, derɛ kɔn jak kä tëk, ce̱t mi ta̱nɛ mi.

²⁵ Kä mi la̱tnɛ luëëkɛ kɛnɛ ŋuɔ̱tkɛ ce̱tkɛ min cɛ la̱r kɔn ɛn Kuoth Nhial Kuothdan, bɛ cieŋ agɔaa kɛ kɔn.’ ”