Ŋuɔ̱t 5 - RUAC KUƆTH IN RƐL RƆ

Luëëk da̱ŋ wäl

¹ Cu Muthɛ ji̱ I-thɛ-rɛl diaal cɔl, kä cuɛ kɛ jiök i̱, “Luëëk ti la̱tdä yɛ ti lö ji̱ I-thɛ-rɛl kɛ ɣöö bia kɛ ŋa̱c kä tiɛtdɛ ciɛŋkiɛn.

² Kuoth Nhial Kuothdan cɛ guk la̱t kɛ kɔn kä Thi-nay.

³ /Cikɛ gua̱nikɔn kɛn tëë lät Kuoth Nhial guk kɛ kɛ, lätdɛ jɛ kɛ kɔn, kä kɛ kɛn kɔn diaal tëk ɛn walɛ ti.

⁴ Kuoth Nhial cɛ ruac kɛ yɛ nhiam kɛ nhiam däär maac wi̱i̱ pa̱a̱m,

⁵ guäth ëë ta̱a̱ kamdun kɛ Kuoth Nhial, mëë la̱tdä yɛ ruacdɛ. Mëë dual yɛn kɛ mac, mëë /ka̱nɛ wä nhial wi̱i̱ pa̱a̱m. Wee i̱,

⁶ “Ɛ ɣän Kuoth Nhial Kuothdu, mëë käm ji̱ raar muun I-jëp, duëël yieenä.

⁷ “/Cuarɛ tekɛ kuoth mi dɔ̱diɛn nhiamdä.

⁸ “/Cuarɛ rɔ täth kuoth jiɛn, ti cäät kɛ duɔ̱ɔ̱r puɔ̱rä Nhial, kiɛ mi cäät kɛ duɔ̱ɔ̱r wi̱i̱ muɔ̱ɔ̱n piny, kiɛ rɛy pi̱i̱ni piny muɔɔn.

⁹ /Cuarɛ rɔ goŋ kɛ kɛ kiɛ bia kɛ pal. Kɛ ɣöö ɣän Kuoth Nhial Kuothdu ɛ ɣän gua̱n tiilä, mi la dueer gua̱ni gan a käm gaatkiɛn amäni ri̱c in diɔ̱ɔ̱kdiɛn kɛnɛ ŋuaandiɛn, kä nɛy tin lökä.

¹⁰ Kä la nhök mi thil pëk a nyuɔ̱thä tin nhɔakɛ ɣä kä tiɛtkɛ luëëkä.

¹¹ “Kä /cu ciötdä cɔl baŋ. Kɛ ɣöö cä dueer raam in cɔl ciötdä baaŋ bi päl.

¹² “Tit cäŋ lɔ̱ŋä, ɛ cäŋ mi rɛl rɔ ce̱tkɛ min cä la̱r ji̱ ɣän Kuoth Nhial Kuothdu.

¹³ Kɛ ni̱n bäkɛl bi lätku diaal la̱t.

¹⁴ Kɛ bärɔw ni̱ni ɛ cäŋ lɔ̱ŋä mi ca leyä, ɣän Kuoth Nhial Kuothdu. Thilɛ la̱t mi bia la̱t thi̱n. Ji̱n kiɛ gatdu kiɛ nyaadu, kiɛ läätdu, kiɛ thääkdu, kiɛ mulu kiɛ duɔ̱ɔ̱r kä ɣɔ̱ɔ̱ku, kiɛ ram mi cieŋ kɛɛl kɛ ji̱. Bi la̱a̱tku lɔ̱ɔ̱ŋ ce̱tkɛ mɔ ti̱i̱ ɔ.

¹⁵ Kä titdɛ ɛn ɣöö cikɔn ɛ kuany muun I-jëp, ɛ Kuoth Nhial Kuothdu käm ji̱ raar thi̱nɔ kɛ tet mi bum, kɛ kui̱ ɛmɔ Kuoth Nhial Kuothdu jiökɛ ji̱ i̱, tit cäŋ lɔ̱ŋä.

¹⁶ “Luthni guur kɛnɛ muɔɔr, ce̱tkɛ min cä lär ji̱ Ɣän Kuoth Nhial Kuothdu, dɔ̱ɔ̱ bi ni̱nku jääny wi̱i̱ muɔ̱ɔ̱n, dɔ̱ɔ̱ bɛ gɔaa kɛ ji̱ muun in cä Ɣän Kuoth Nhial Kuothdu ka̱m ji̱.

¹⁷ “/Cu raan näk.

¹⁸ “/Cu dhöm.

¹⁹ “/Cu kuel.

²⁰ “/Cu gua̱n thieekädu naŋ luɔm kɛ kac.

²¹ “Ɛ lɔcdu /ci di̱t kɛ ciek gua̱n thieekädu, ɛ lɔcdu /ci di̱t kɛ duŋ gɔaal radɔ̱diɛn, kiɛ kaakdɛ, kiɛ kuanydɛ, thääkdɛ kiɛ mulɛ kiɛ mi la duŋ gua̱n thieekä.

²² “Ti̱ti̱ kɛ kɛn luëëk tëë lät Kuoth Nhial kɛ duɔlun kɛɛliw a thil rëp, kɛ jɔw mi di̱i̱t rɛy maac wunä mi col wi̱i̱ pa̱a̱m. Kä cɛ kɛ gɔ̱a̱r rɛy päämni da̱ŋ rɛw ti pat paat, kä cuɛ kɛ ka̱m ɣä.”

Dual nath

²³ “Kä mëë cia jɔw liŋ däär muɔ̱th kä pɛt päm kɛ mac, cu bööth thuk duëlikun kɛnɛ di̱tkun kɛn diaal ben kutdä,

²⁴ kä /cuarɛ wee, ‘Nɛnɛ, ci Kuoth Nhial Kuothda kɔ nyuɔ̱th gɔɔydɛ kɛnɛ liakdɛ, kä cakɔ jɔwdɛ liŋ däär maac. Cakɔ nɛn ɛn ɣöö ruac Kuoth kɛ raan kä ŋotdɛ kɛ tëk.

²⁵ Ɛŋu ba̱kɔ li̱w ɔ, ɛn täämɛ? Ɛn mac ɛ di̱i̱t ɛmɛ bɛ kɔ näk. Ba̱kɔ li̱w mi wa̱kɔ ŋot kɛ mi liɛŋkɔ jɔw Kuɔth Nhial Kuothda.

²⁶ Ɛŋa kä nɛy diaal, mi ci jɔw Kuɔth in tëk kɔn liŋ däär maac, ce̱t mi te kɔnɛ kä ŋotdɛ kɛ tëk?

²⁷ Wër thiekä, kä liŋ tin diaal tin bi Kuoth Nhial Kuothdan kɛ lat, kä ber lätni nɛy tin diaal tin ci Kuoth Nhial Kuothdan kɛ la̱t ji̱, ba̱kɔ kɛ liŋ kä ba̱kɔ kɛ la̱t.’

²⁸ “Ci Kuoth Nhial yɛ liŋ guäth ëë ruacɛ thi̱n kɛ ɣä. Kä cu Kuoth Nhial ɣä jiök i̱, ‘Ɣän cä ruac nɛɛni ti̱ti̱ liŋ, tin ca la̱t ji̱, kɛn tin lat kɛn kɛ kɛ cuŋ.

²⁹ Kä mi deekɛ ca̱r inɔ ni ciaŋ, luɔ̱thkɛ ɣä kä tiit kɛn luëëkä, derɛ gɔaa kɛ kɛ amäni karkiɛn amäni cäŋ kɛl!

³⁰ Wër jiök nikɛ i̱ luɔcɛ dho̱rikun.

³¹ Kä ji̱n cuŋni wa̱nɛ mi kutdä, mäni mi cä ji̱ la̱t luëëk kɛnɛ ŋuɔ̱t tin bi wä ŋi̱i̱c nikɛ. Kɛ ɣöö bikɛn kɛ wä la̱t muun in cä ka̱m kɛ in ba wä ciɛŋ.’

³² “Kä tiɛtdɛ jɛ yɛn ɛn ɣöö bia kɛ la̱t ce̱tnikɛ min ci Kuoth Nhial Kuothdun ɛ la̱r yɛ. /Cuarɛ rɔ cak riet caam kiɛ cuëëc.

³³ Luɔ̱kɛ ni duɔ̱ɔ̱p in ci Kuoth Nhial Kuothdun ɛ la̱r yɛ, kɛ ɣöö bia cu tëk, bɛ cu gɔaa kɛ yɛ, kä bi ni̱nkun ŋuan wi̱i̱ muɔ̱ɔ̱n in bia wä cieŋ thi̱n.”