Ŋuɔ̱t 34 - RUAC KUƆTH IN RƐL RƆ

Lia̱a̱ Muthɛ

¹ Cu Muthɛ jiɛɛn paan Mo-ab wee wi̱i̱ Pa̱a̱m Nɛbo, ni biikä Pa̱a̱m Pi̱dh-ga, min lot ni Jɛ-ri-ko. Kä cu Kuoth Nhial ɛ nyuɔ̱th muɔ̱n diaal, nikä Gil-yad a räth ni kä Daan,

² Nap-ta-li kɛɛliw ni këth Ɛ-pa-rim kɛnɛ Ma-na-thɛ, mun Juda kɛɛliw bapɛ jɛ ni kui̱ konyä ca̱ŋ Bar in Bo̱r in te kam wi̱i̱ni.

³ A lɛnɛ ka̱n ni kä Nɛ-gɛb a wä kueer min mɔ lööl Jɛ-ri-ko wec thɔa̱a̱ri, a räth ni kä Dho-ar.

⁴ Kä cu Kuoth Nhial Muthɛ jiök i̱, “Nɛmɛ ɛ jɛn mun ëë cä ya̱c A-bɛ-ram kɛnɛ Ay-dhɛk, kɛ Je-kɔb, ‘Bä ka̱m karku.’ Bä ji̱ jak kä nɛ̈ɛ̈ni jɛ kɛ waŋdu, duundɛ ɣöö ci bi cop thi̱n.”

⁵ Ɛ jɛn cu Muthɛ kuany Kuɔth Nhial cu li̱w ɛn wi̱i̱ni muun Mo-ab, nikɛ ruac Kuɔth Nhial,

⁶ kä cu Kuoth Nhial jɛ kony rɛy lo̱o̱lä muun Mo-ab lotdä Beth-pɛ-yor. Kä thilɛ ram mi ŋäc gua̱a̱th in ca kony thi̱n mäni walɛ.

⁷ Kä cu Muthɛ li̱w a tëë kɛ run ti kuɔr wi̱cdɛ jiɛɛn da̱ŋ rɛw /kenɛ cɔr kä ŋuɔ̱t buɔ̱mdɛ ni thi̱n.

⁸ Cu ji̱ I-thɛ-rɛl diaal Muthɛ par rɛy paan Mo-ab kɛ ni̱n ti jiɛɛn diɔ̱k. Kä mëë ci ni̱n pärä Muthɛ thuɔ̱k.

⁹ Cu Jɔ-cua gat Nun thia̱a̱ŋ kɛ yiëë ŋäcä kɛ ɣöö, ci Muthɛ jɛ poth. Cua jɛ luɔ̱th ɛ ji̱ I-thɛ-rɛl diaal, kä cukɛ jɛ la̱t ce̱tnikɛ mëë ci Kuoth Nhial ɛ la̱t Muthɛ.

¹⁰ Kä cuɛ thil gök mi cu rɔ jiɛc rɛy ji̱ I-thɛ-rɛl mi ce̱tkɛ Muthɛ, min ŋäc Kuoth Nhial ni puɔ̱nydɛ.

¹¹ Kä cuɛ thil ram mi cäät kɛ jɛ kɛ nyuuthni diaal kɛnɛ tin ga̱ykɛ naath tëë ci Kuoth Nhial kɛ jäk ni jɛ i̱ bɛ wä la̱t muun I-jëp, ti bɛ lät kä Pɛro kɛnɛ la̱a̱tkɛ kɛ wecdɛ kɛɛliw.

¹² Kä cuɛ thil ram mi cäät kɛ jɛ kɛ bum diaal kɛnɛ bɛ̈c bɛ̈ɛ̈c tëë cɛ la̱t waaŋ ji̱ I-thɛ-rɛl diaal.